“Anthropic” Хятадын компаниуд “Claude”-ийн хариултыг зөвшөөрөлгүйгээр загвар сургахад ашигласан талаар мэдээллээ
АНУ-ын “Anthropic” компани “Alibaba”, “Moonshot AI”, “DeepSeek” зэрэг Хятадын компаниуд “Claude”-ийн хариултыг ашиглан өөрсдийн загварыг сургах томоохон ажиллагааг илрүүлж, таслан зогсоосноо мэдээллээ. “Alibaba”-тай холбоотой ажиллагаа хамгийн өргөн хүрээтэй байсан ба 5-7-р сарын хооронд “Claude”-тай 151 сая гаруй удаагийн харилцан яриа үүсгэсэн гэж “Anthropic” тооцоолжээ. Тэргүүлэх загваруудын гаргалгааг өрсөлдөгч загвар сургахад ашиглах алхам нэмэгдэж байгаа нь оюуны өмч, мэдээллийн нууцлалтай холбоотой эрсдэлийг улам тодотгож байна.

АНУ-ын хиймэл оюуны “Anthropic” компани Хятадад төвтэй хэд хэдэн ижил чиглэлийн компани өөрийн “Claude” загварын гаргасан хариултыг зөвшөөрөлгүйгээр ашиглан хиймэл оюуны загваруудаа сургаж байсныг илрүүлж, холбогдох ажиллагааг таслан зогсоосноо пүрэв гарагт нийтэлсэн аюул заналын судалгааны тайландаа мэдээллээ.
Anthropic” үүнийг “хууль бус 'distillation' буюу мэдлэг шилжүүлэн сургах арга” хэмээн тодорхойлжээ. Хиймэл оюуны салбарт "distillation" буюу мэдлэг шилжүүлэн сургах арга нь илүү чадварлаг загварын гаргалгааг ашиглан өөр загварт ижил төстэй чадвар эзэмшүүлэхийг хэлдэг. Харин “Anthropic”-ийн мэдээлснээр Хятадын компаниуд уг аргыг зөвшөөрөлгүй ашиглаж, хуурамч хаягаар дамжуулан “Claude”-ийн хамгаалалтыг тойрчээ.
Тайланд дурдсанаар “Claude”-д илгээсэн зарим хүсэлтэд хувь хэрэглэгчид, олон улсын томоохон компаниуд болон төрийн байгууллагатай холбоотой этгээдүүдийн нууц мэдээлэл багтжээ. “Anthropic”-ийн үзэж буйгаар хэрэглэгчийн ийм мэдээллийг зөвшөөрөлгүйгээр дамжуулж, загвар сургахад ашигласан үйлдэл нь мэдээллийн нууцлалын хууль болон тухайн компаниудын үйлчилгээний нөхцөлтэй зөрчилдөж болзошгүй байна.
“Alibaba”-тай холбоотой 151 сая гаруй хүсэлт
Хятадын технологийн “Alibaba” компанитай холбоотой операторууд “Claude”-ийн гаргалгааг тус компанийн “Qwen” хиймэл оюуны загваруудыг сургахад ашигласан гэж “Anthropic” мэдээлэв.
Тодруулбал, тавдугаар сараас долдугаар сарын хооронд “Alibaba”-тай холбоотой 151 сая гаруй хүсэлт бүртгэгдсэн нь “Anthropic”-ийн илрүүлсэн хамгийн том "distillation" ажиллагаа болжээ. Идэвхжил оргил үедээ өдөрт нийт 3,500 гаруй хаягаар гурван сая орчим харилцан яриа үүсгэсэн байна.
“Anthropic”-ийн мэдээлснээр “Alibaba” зөвхөн загвараа сургаад зогсохгүй "reinforcement learning" буюу туршилт, үр дүнд тулгуурлан загварын ажиллагааг сайжруулах арга болон загварын архитектурын судалгаанд “Claude”-ийг ашиглажээ.
“Kimi”-ийн хүсэлтийг “Claude” руу шилжүүлсэн гэж мэдээлэв
Бээжинд төвтэй, “Kimi” хиймэл оюуны загварыг хөгжүүлэгч “Moonshot AI” компанийн хувьд хэрэглэгчдийн зарим хүсэлтийг мэдэгдэлгүйгээр “Claude” руу дамжуулсан гэж тайланд дурджээ.
“Anthropic”-ийн мэдээлснээр хэрэглэгчид анх “Kimi”-тэй харилцаж байна гэж ойлгож байсан ч зарим тохиолдолд “Claude”-ийн боловсруулсан хариултыг хүлээн авч байв. Арван өдрийн хугацаанд “Moonshot AI” 5,380 хуурамч хаягаар дамжуулан 300,000 орчим хэрэглэгчийн хүсэлтийг “Anthropic” руу илгээсэн бөгөөд дийлэнхийг нь “Claude Opus” загвар боловсруулжээ.
Тавдугаар сараас долдугаар сарын хооронд “Moonshot AI”-тай холбоотой нийт 23 сая гаруй харилцан яриа бүртгэгдсэн байна. Тус компани эдгээрийн заримыг хадгалж, “Claude”-ийн "reasoning" буюу асуудлыг шийдвэрлэх үе шатны мэдээллийг өөрийн загваруудын сургалтын өгөгдөл болгон ашигласан гэж “Anthropic” мэдэгдэв.
Үүний зэрэгцээ хэрэглэгчдийн зарим хүсэлтэд нууц мэдээлэл багтсан бөгөөд тэдний мэдээллийг “Anthropic”-ийн систем рүү дамжуулж байгааг “Moonshot AI” урьдчилан мэдэгдсэн эсэх нь тодорхойгүй гэж тайланд тэмдэглэжээ.
“DeepSeek”-тэй холбоотой 12 сая гаруй тохиолдол
Хямд өртгөөр өндөр хүчин чадалтай хиймэл оюуны загвар хөгжүүлснээр өнгөрсөн онд олон улсын анхаарлын төвд орсон Хятадын “DeepSeek” компани мөн хэрэглэгчдэдээ мэдэгдэлгүйгээр зарим хүсэлтийг “Claude” руу шилжүүлж байсан гэж “Anthropic” мэдээлсэн байна.
Тус компани энэ оны долдугаар сарын 14 хоногийн хугацаанд “DeepSeek”-тэй холбоотой 12 сая гаруй "distillation" оролдлого илрүүлсэн гэж тайландаа дурджээ.
“Anthropic”-ийн тайлан нь 2025 оны арванхоёрдугаар сараас энэ оны наймдугаар сарын хооронд илрүүлж, таслан зогсоосон ажиллагааг хамарсан байна. Судалгаанд кибер ажиллагаа, нөлөөллийн ажиллагаа, тандалт, залилан, биологийн технологийн зүй бус хэрэглээ, уламжлалт зэвсгийн хөгжүүлэлт болон AI загварын "distillation" зэрэг долоон чиглэлийг авч үзжээ.
CNBC тайлбар авахаар “Alibaba”, “Moonshot AI”, “DeepSeek”, “Xiaomi” болон “Anthropic”-т хандсан боловч нийтлэл гарах үед компаниуд хариу өгөөгүй байв.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





