АНУ дэвшилтэт роботод тавьсан шинэ хориг Хятадын стартапуудыг Сингапурт бодит суурь байгуулж тойрох хувилбар яригдав

АНУ гадаадад үйлдвэрлэсэн дэвшилтэт роботын шинэ загваруудад зах зээлийн зөвшөөрөл олгохоо зогсоосны дараа Хятадтай холбоотой стартапууд Сингапурт бодит ажиллагаа байгуулах хувилбарыг судалж эхэллээ. Сингапурын төрийн хөрөнгө оруулагч “Temasek”-ийн дэмжлэгтэй “Vertex Ventures China” өдөр тутмын удирдлага болон чухал бүрэлдэхүүн хэсгийн хяналтыг Сингапурт төвлөрүүлэх санал дэвшүүлжээ.

“Vertex Ventures China”-ийн удирдах түнш Чүүн Чонг Тай “CNBC”-д өгсөн ярилцлагадаа Хятадтай холбоотой стартапууд Сингапурт бодит үйл ажиллагаа явуулбал АНУ-ын хэрэглэгчдэд хүрэх боломжийг судалж болно гэж мэдэгдэв. Түүний саналд өдөр тутмын удирдлага, орон нутгийн ажлын байр, роботыг ажиллуулах чип зэрэг чухал бүрэлдэхүүн хэсгийн хяналтыг Сингапурт төвлөрүүлэх хувилбар багтжээ.

“Эдгээр нь бид яг одоо бодож эхэлсэн санаануудын нэг хэсэг” гэж Тай хэллээ. Түүний дэвшүүлсэн бүтэц нь зөвхөн барааг Сингапураар дамжуулах бус, тухайн улсад бодит удирдлага, ажиллах хүч болон технологийн хяналт бий болгоход чиглэж байна.

Гэвч АНУ-ын одоогийн зохицуулалт зөвхөн Хятадад үйлдвэрлэсэн роботыг "онилоогүй". Харилцаа холбооны комисс өнгөрсөн сарын 28-нд гадаадад үйлдвэрлэсэн дэвшилтэт хөдөлгөөнт роботуудыг үндэсний аюулгүй байдалд хүлээн зөвшөөрөх боломжгүй эрсдэлтэй тоног төхөөрөмжийн жагсаалтад оруулсан юм.

Жагсаалтад бие даан эсвэл алсаас удирдан газар дээр хөдөлдөг хүн дүрст, дөрвөн хөлт болон бусад хөдөлгөөнт робот оржээ. Шийдвэр гарснаас өмнө зөвшөөрөл авсан загваруудыг үргэлжлүүлэн худалдаалах боломжтой ч шинэ загварууд Харилцаа холбооны комиссын тоног төхөөрөмжийн зөвшөөрөл авах боломжгүй юм.

Хориг нь роботыг үйлдвэрлэсэн газарт үйлчилдэг. Иймээс Сингапурт үйлдвэрлэсэн төхөөрөмж мөн АНУ-аас гадна үйлдвэрлэсэн бүтээгдэхүүнд тооцогдох бөгөөд зөвхөн Сингапурын гарал үүслийн гэрчилгээ авснаар хоригийн гадна үлдэхгүй. Батлан хамгаалах байгууллагаас тухайн төхөөрөмж үндэсний аюулгүй байдалд эрсдэл учруулахгүй гэсэн тусгай нөхцлийг биелүүлсэн тохиолдолд чөлөөлөх боломжтой.

АНУ-ын гаалийн гарал үүслийн ерөнхий зарчимд бүтээгдэхүүнийг хаана “үлэмж хэмжээнд хувиргасан”-ыг харгалздаг. Гэхдээ энэ шалгуурыг үйлдвэрлэл, угсралтын цар хүрээ, үндсэн эд ангийн гарал, программчлал, туршилт болон ажилтны ур чадвар зэрэг нөхцөлийг бүхэлд нь үнэлж, тохиолдол бүрээр нь тогтоодог. Өдөр тутмын удирдлага, орон тооны ажилтан болон чипийн хяналтыг Сингапурт байрлуулах нь дангаараа бүтээгдэхүүний гарал үүслийг өөрчлөхгүй.

“Vertex Ventures China” компани ам.доллар болон юаниар нэрлэсэн сангуудаар нийт 20 тэрбум орчим юань буюу 3 тэрбум ам.долларт дөхөх хөрөнгө удирддаг. Тус компанийн багцад хүн дүрст болон дөрвөн хөлт робот үйлдвэрлэгч “Unitree Robotics”, өөрөө жолоодох технологийн чип үйлдвэрлэгч “Horizon Robotics”, логистикийн робот нийлүүлэгч “Geek+”, мэс заслын робот хөгжүүлэгч “Edge Medical”, фотоникийн чип үйлдвэрлэгч “Lightelligence” багтдаг.

Тус сан өмнө нь дугуй хуваалцах үйлчилгээний “Mobike”-д хөрөнгө оруулсан бөгөөд 2018 онд “Meituan”-д худалдагдсан. Энэ хэлцэл анхны хөрөнгө оруулалтаас ойролцоогоор 10 дахин өгөөж өгсөн гэж Тай мэдэгджээ.

“Unitree Robotics”-ийн хувьд орлогын ач холбогдолтой зах зээл хэвээр байна. “Morningstar”-ийн хувьцааны шинжээч Кангюсяо Лигийн мэдээлснээр компанийн 2025 оны орлогын 40 гаруй хувь нь гадаад зах зээлээс бүрдсэн бөгөөд АНУ дангаараа нийт орлогын 18 хүртэлх хувийг бүрдүүлж байна.

“Bernstein”-ийн хувьцааны шинжээч Дьен Ван АНУ-ын шийдвэрийг хоёр улсын шинээр хөгжиж буй роботын салбар дахь салан тусгаарлалтын чухал үе шат гэж тодорхойлов. Түүний үнэлгээгээр хязгаарлалт цаашид ухаалаг тээврийн хэрэгсэл болон үйлдвэр, агуулахад ашигладаг суурин роботыг хамарсан биет хиймэл оюуны өргөн хүрээнд тэлэх эрсдэлтэй.