АНУ "Redmoor"-ийн вольфрамын төсөлд 9.25 сая ам.долларын санхүүжилт олгожээ

АНУ-ын Батлан хамгаалах яам уул уурхайн “Strategic Minerals” компанийн 100 хувь эзэмшлийн “Cornwall Resources Limited” буюу CRL-д 9.25 сая ам.долларын санхүүжилт олгоод байна. Уг хөрөнгийг Их Британийн Корнуолл дахь “Redmoor” вольфрам-зэс-цагаан тугалганы төслийн судалгааг ахиулж, уурхайн хөрөнгө оруулалтын эцсийн шийдвэр гаргах түвшинд хүргэхэд зарцуулах аж.

АНУ-ын Ерөнхийлөгч Дональд Трамп өнгөрсөн оны есдүгээр сард “Department of War” буюу “Дайны яам” нэрийг Батлан хамгаалах яамны хоёрдогч нэршлээр албан харилцаа, олон нийттэй харилцах болон хууль тогтоомжийн бус баримт бичигт ашиглахыг зөвшөөрсөн. Харин хуульд заасан “Department of Defense” буюу Батлан хамгаалах яам гэсэн үндсэн нэршил өнөө ч хүчинтэй байгаа юм.

“Strategic Minerals” компани "Redmoor"-ийг Европод ашиглалтад ороогүй байгаа, хамгийн өндөр агуулгатай вольфрамын нөөцүүдийн нэг гэж тодорхойлж байна.

32 сарын хөгжүүлэлтийн хөтөлбөр

Санхүүжилтийн хүрээнд нөөцийг нарийвчлан тогтоох болон тэлэх өрөмдлөг хийхээс гадна геотехник, металлургийн судалгаа үргэлжилнэ. Мөн ашигт малтмалын нөөцийн тооцооллыг шинэчилж, урьдчилсан болон нарийвчилсан ТЭЗҮ боловсруулах, инженерийн судалгаа, уурхайн бүтээн байгуулалтын өмнөх ажлуудыг хийхээр төлөвлөжээ.

“Strategic Minerals” хөтөлбөр эхэлснээс хойш 32 сарын дотор хөрөнгө оруулалтын эцсийн шийдвэр гаргахад шаардлагатай техник болон арилжааны ажлыг дуусгах зорилт тавьсан байна.

Тус санхүүжилт нь компанийн цаашид нэмэлт хөрөнгө босгох, эсвэл бүтээгдэхүүн борлуулах гэрээ байгуулах боломжийг хязгаарлахгүй гэж компанийн зүгээс тодотгов. АНУ-тай холбоотой нийлүүлэлтийн сүлжээ болон худалдан авалтын талаар хэлэлцээ үргэлжилж байгаа аж.

Хувьцааны ханш 14 хувиар өсөв

Санхүүжилтийн мэдээллийн дараа “Strategic Minerals”-ийн хувьцааны ханш даваа гарагийн Лондоны арилжааны хаалтаар 14 хувиар нэмэгдэв. Компанийн зах зээлийн үнэлгээ 168.6 сая фунт стерлинг буюу 223 сая ам.долларт хүрээд байна.

“Strategic Minerals”-ийн гүйцэтгэх захирал Чарльз Маннерс уг санхүүжилт "Redmoor" төслийн хөрөнгө оруулалтын үндэслэлийг бататгаж байгааг онцлов. Түүний хэлснээр, АНУ-ын Засгийн газар сүүлийн хэдэн долоо хоногт холбоотон орнууд дахь өрнөдийн вольфрамын нийлүүлэлтийн сүлжээг дэмжих хөрөнгө оруулалтууд хийжээ.

CRL-ийн гүйцэтгэх захирал Деннис Роуландын мэдээлснээр "Redmoor" дахь хайгуулын ажил сүүлийн хоёр жилд эрчимжиж, компани Корнуоллд газрын гадаргуугаас хэрэгжүүлсэн хамгийн том алмаазан өрөмдлөгийн хөтөлбөрөө үргэлжлүүлж байна.

Вольфрам нь үйлдвэрлэлийн стратегийн түүхий эдэд тооцогддог тул "Redmoor"-ийн хөгжүүлэлт зөвхөн нэг уурхайн төслийн санхүүжилтээр хязгаарлагдахгүй. АНУ-ын Батлан хамгаалах яамны санхүүжилт төслийг хөрөнгө оруулалтын шийдвэрт ойртуулахын зэрэгцээ холбоотон орнуудаас бүрдэх вольфрамын нийлүүлэлтийн сүлжээг хөгжүүлэхэд чиглэж байна.