АНУ: Тэтгэвэрт гарах болсон ч хөдөлмөрийн зах зээлээс "зайгаа бүү барь"

АНУ-ын феминист хөдөлгөөний нэрт төлөөлөгч, сэтгүүлч Глория Стайнем 92 насандаа нас барахаасаа өмнө олон нийтийн үйл ажиллагаагаа үргэлжлүүлж байжээ. Тэрбээр есдүгээр сарын сүүлчээр эмэгтэйчүүдийн хөдөлмөр эрхлэлтийг дэмждэг “Dress for Success” байгууллагын арга хэмжээнд гол илтгэгчээр оролцохоор төлөвлөж, мөн есдүгээр сарын 22-нд хэвлэгдэх дурсамж номоо дуусгаад байжээ.

АНУ-ын дуучин, жүжигчин Долли Партон ч мөн 80 насандаа буюу нас барахаасаа өмнө кино, мюзикль баримтат бүтээл зэрэг хэд хэдэн төсөл дээр ажиллаж байсан гэж түүний менежер Дэнни Нозелл өгүүлжээ. Хоёр эмэгтэйн ажил т өрөл амьдралынх нь сүүлийн жилүүдэд ч үргэлжилсэн нь АНУ-д тэтгэврийн насныхан хөдөлмөрийн зах зээлээс бүрэн гарахгүй байгаа сая сая хүний нэг жишээ болж байна.

Тэтгэвэрт гарсан ч ажиллах шалтгаан харилцан адилгүй

АНУ-д Нийгмийн даатгалын тэтгэвэр авах нас төрсөн оноосоо хамааран 66-аас 67 байдаг. Тэтгэврээ 70 нас хүртэл хойшлуулбал авах тэтгэмжийн хэмжээ жил бүр нэмэгддэг байна.

Гэхдээ тэтгэврийн насанд хүрсэн хүн бүр ажлаа чөлөөтэй сонгох боломж тийм амар биш. “Employee Benefit Research Institute”-ийн энэ оны судалгаагаар ажиллаж буй тэтгэвэр авагчдын 41 хувь нь өдөр тутмын зардлаа нөхөхийн тулд хөдөлмөр эрхэлдэг гэж хариулжээ.

Нөгөө талд орлогоос бусад шалтгаанаар ажилласаар байгаа хүн ч олон. Судалгаанд хамрагдсан ажил эрхэлдэг тэтгэврийнхний 91 хувь нь идэвхтэй, нийгмийн оролцоотой хэвээр байхыг хүсдэг, 85 хувь нь хийж буй ажилдаа дуртай учраас үргэлжлүүлдэг гэжээ.

“Question Everything”, “Bookmarked” подкастын хөтлөгч, “Gloria Steinem Foundation”-ийн судлаач Даниэль Робэйгийн хэлснээр Стайнем, Партон зэрэг хүни хувьд “ажил” гэдэг ойлголт зөвхөн орлого олох үйл ажиллагаагаар хязгаарлагдахгүй.

“Хийдэг зүйл нь зорилго, бүтээлч байдал, харилцаа болон ертөнцийг ойлгох арга барилтай нь нягт холбоотой бол үргэлжлүүлэн ажиллах нь үүрэг мэт бус, бүрэн дүүрэн амьдарч буй мэдрэмж төрүүлж болно” гэж тэр тайлбарлажээ.

Гол зорилго нь санхүүгийн бие даасан байдал

АНУ-ын Техас мужийн Остин хотод ажилладаг санхүүгийн зөвлөх Скотт Бойлсын үзэж буйгаар тэтгэврийн төлөвлөгөөний гол зорилго нь тодорхой насанд ажлаа зогсоох бус, ажиллах шаардлагагүй болох түвшинд хүрэх явдал юм. Үүний тулд өрхийн амьжиргааны зардал, үлдэгдэл өр, ирээдүйн эмчилгээний зардлыг тооцож, Нийгмийн даатгалын тэтгэмж, тэтгэврийн данснаас авах мөнгө болон бусад орлоготой харьцуулах шаардлагатай.

Хэрэгцээтэй хөрөнгийн хэмжээ амьдрах газар, тэтгэвэрт гарах хугацаа, хүсЧ буй амьдралын хэв маягаас ихээхэн хамаардаг. Тухайлбал, “GoBankingRates”-ийн нэгдүгээр сарын тооцоогоор Хавайд 65 насандаа тэтгэвэрт гарахад Нийгмийн даатгалын орлогыг тооцсон ч ойролцоогоор 2.2 сая ам.долларын хуримтлал шаардлагатай байж болохоор байна.

Бойлсийн хэлснээр тэтгэврийн дансны жилийн шимтгэлийн хязгаараас шалтгаалан тэтгэврийн дансаар шаардлагатай бүх хөрөнгийг бүрдүүлэхэд хүндрэлтэй байж ч мэдэх юм.

Иймээс татвар ногдох брокерын данс болон эрүүл мэндийн хуримтлалын данс зэрэг бусад хэрэгслийг ашиглах нь ирээдүйн санхүүгийн уян хатан байдлыг нэмэгдүүлэх боломжтой. Ирээдүйн тэтгэврээ санхүүжүүлэхийн тулд өнөөдрийн хэрэглээний зарим сонголтоо хязгаарлах шаардлагатайг мэргэжилтнүүд зөвлөдөг.

“Бид тэтгэврийг ихэвчлэн барианы шугам мэт хардаг. Харин жинхэнэ бариа нь санхүүгийн бие даасан байдал. Тэр түвшинд хүрсний дараа цааш юу хийхээ өөрөө шийднэ” гэж Бойлс онцолжээ.