"Apple"-ийн Энэтхэгийн ухаалаг утасны зах зээлд эзлэх хувь анх удаа 10%-ийн босгыг давж магадгүй

АНУ-ын технологийн аварга “Apple” компани шинэ “iPhone 18 Pro” болон “Pro Max” загварын өндөр эрэлтэд түшиглэн Энэтхэгийн ухаалаг утасны зах зээл дэх байр сууриа тэлэх төлөвтэй байна. Хятадын үйлдвэрлэгчид болон БНСУ-ын “Samsung” брэнд голчлон давамгайлдаг тус зах зээлд “Apple”-ийн эзлэх хувь 2026 онд анх удаа хоёр оронтой түвшинд хүрнэ гэж шинжээчид тооцоолжээ. Шинэ “iPhone”-ийн худалдаа эхэлсэн өнгөрсөн баасан гарагт Мумбай, Дели, Бенгалуру зэрэг томоохон хотын “Apple” дэлгүүрүүдийн гадна урт дараалал үүссэн байна. Зарим худалдан авагч шинэ загварыг эхний ээлжид авахын тулд 10 гаруй цаг хүлээсэн бол жижиг хотуудаас хэдэн цаг зорчиж ирсэн хэрэглэгчид ч байжээ. “Counterpoint Research”-ийн судалгааны захирал Тарун Патак CNBC-д өгсөн ярилцлагадаа “Apple”-ийн борлуулалтын тоо ширхгээр хэмжсэн зах зээлийн эзлэх хувь 2026 онд 10 хувьд хүрэх төлөвтэй байгааг мэдээлэв. Тус компанийн эзлэх хувь 2022 онд 4 хувь байсан бөгөөд 10 хувийн босгыг календарийн нэг жилийн дүнгээр анх удаа давах гэж байна.

Анхан шатны борлуулалтын сувгийн мэдээллээр “iPhone 18 Pro” цувралын эрэлт өнгөрсөн жилийн “iPhone 17” цувралаас бараг 20 хувиар өндөр байгааг Патак нэмж дурджээ.

Энэтхэг нь борлуулалтын тоо ширхгээр дэлхийн хоёр дахь том ухаалаг утасны зах зээл бөгөөд “IDC”, “Counterpoint Research”-ийн хоёрдугаар улирлын мэдээллээр хамгийн том таван брэндийн дөрөв нь Хятадын үйлдвэрлэгчид байжээ. Тухайлбал, Хятадын “Vivo” ойролцоогоор 18 хувийн эзлэх хувьтайгаар зах зээлийг тэргүүлж байгаа бол араас нь БНСУ-ын “Samsung” бичигдсэн байна. Гэвч чипийн өртөг дэлхий даяар өссөнөөр хямд болон дунд ангиллын ухаалаг утас үйлдвэрлэгчид Энэтхэгт бүтээгдэхүүний үнээ нэмэх шаардлагатай болсон. “IDC India”-ийн хэрэглэгчийн төхөөрөмжийн судалгаа хариуцсан ахлах менежер Упасана Жошигийн хэлснээр “Apple” мөн үнийн дүнгээ өсгөсөн ч өндөр үнэ нь “iPhone”-ийн премиум, хүсэмжит бүтээгдэхүүн гэсэн байр суурийг улам тодотгож байна. “IDC”-ийн мэдээллээр зургаадугаар сарын улиралд Хятадын ихэнх брэндийн зах зээлийн эзлэх хувь буурсан бол “Apple”, “Samsung”-ийнх нэмэгджээ.