Д.Трамп Ж.Пауэллыг үргэлжлүүлэн шалгуулахаа мэдэгдлээ

АНУ-ын Холбооны нөөцийн банкны дотоод хяналтын байгууллага есдүгээр сарын 29-ний тайландаа төв банкны Вашингтон дахь хоёр барилгын засварын төслийн удирдлагад олон доголдол гарсныг тогтоосон ч эрүүгийн хэрэгт шилжүүлэх үндэслэл илрээгүй гэж дүгнэжээ. Мөн албан тушаалтнуудад захиргааны зөрчил тогтоогоогүй байна.

Төслийн барилгын ажлын зардал 2020 оны хоёрдугаар сард 921 сая ам.доллароор төсөвлөгдөж байсан бол 2024 оны шинэчилсэн төсвөөр 2.018 тэрбум ам.долларт хүрчээ. Уг төслийн зардлыг хянах боломжтой хэд хэдэн арга хэмжээг хэрэгжүүлээгүй, гэрээний зардлын удирдлагын шаардлагыг удаа дараа мөрдөөгүй, удирдлагын дотоод тогтолцоо хангалтгүй байсныг хяналтын байгууллага онцолсон байна.

Энэхүү мэдэгдлийн дараа АНУ-ын Ерөнхийлөгч Дональд Трамп есдүгээр сарын 30-нд Холбооны нөөцийн банкны Ерөнхийлөгч асан Жером Пауэллыг дахин шүүмжилж, хяналтын тайланг АНУ-ын Ерөнхий прокурор Тодд Бланшаар судлуулж, цаашид ямар арга хэмжээ авахыг тогтоолгохоор хүссэнээ мэдэгджээ. Колумбийн тойргийн прокурор Жанин Пирро мөн тайланг хянаж байгаа аж.

Пауэллын Холбооны нөөцийн банкны Ерөнхийлөгчийн бүрэн эрх өнгөрсөн тавдугаар сарын 15-нд дууссан бөгөөд Кевин Уорш тангараг өргөх хүртэл тэргүүний үүргийг түр гүйцэтгэж ирсэн. К.Уорш тавдугаар сарын 22-нд албан тушаалаа хүлээн авч, харин Пауэлл Удирдах зөвлөлийн гишүүнээр үлдсэн бөгөөд түүний энэ бүрэн эрх 2028 оны нэгдүгээр сарын 31 хүртэл үргэлжилнэ.

АНУ-ын Хууль зүйн яам өнгөрсөн нэгдүгээр сард Пауэллын зургаадугаар сард Конгресст өгсөн мэдүүлгийг барилгын засварын төсөлтэй холбон шалгаж, зарлан дуудах бичиг хүргүүлж байв. Пауэлл тухайн үед мөрдөн шалгалтын үндэслэлийг “шалтаг” хэмээн тодорхойлж, мөнгөний бодлогод улс төрийн нөлөө үзүүлэх оролдлого гэж мэдэгдсэн удаатай.

Өнгөрсөн гуравдугаар сард холбооны шүүх зарлан дуудах бичгүүдийг хүчингүй болгож, тэдгээрийн гол зорилго Пауэллыг Ерөнхийлөгчийн бодлогын хүсэлд нийцүүлэх эсвэл огцроход шахах явдал байсан гэж дүгнэжээ. Трампын засаг захиргаа уг шийдвэрийг давж заалдаагүй бөгөөд мөрдөн шалгалтыг хаасан байна.

Лиза Күүкийн хэрэг үргэлжилж байна

Тус банкны Удирдах зөвлөлийн гишүүн Лиза Күүкийг огцруулахтай холбоотой тусдаа маргаан мөн шүүхэд үргэлжилж байна. АНУ-ын Дээд шүүх өнгөрсөн зургаадугаар сард Күүкийг огцруулахаас өмнө түүнд ямар үндэслэлээр баривчилснаа мэдэгдэж, хариу тайлбар өгөх боломж олгох шаардлагатай гэж үзсэн. Шүүх тухайн шатанд моргейжийн зээлтэй холбоотой маргаан нь түүнийг огцруулах хангалттай үндэслэл мөн эсэхийг эцэслэн шийдээгүй юм.

Хэрэг одоо Колумбийн тойргийн АНУ-ын дүүргийн шүүхэд үргэлжилж байна. Холбооны нөөцийн банкны Мөнгөний бодлогын хурал аравдугаар сарын 27-ноос 28-нд болох бөгөөд бодлогын шийдвэрийг аравдугаар сарын 28-нд танилцуулна.