Еврогийн ханш ам.долларын эсрэг суларч, сүүлийн 17 сарын доод түвшинд хүрлээ

Лондоны хөрөнгийн биржийн группийн мэдээлснээр Еврогийн ханш даваа гарагийн арилжаагаар ам.долларын эсрэг 0.6 хувиар суларч, сүүлийн 17 сарын доод түвшинд хүрлээ. Евро бүсэд инфляц, хүү болон Засгийн газрын зээлийн өртөг зэрэг өсч буйтай зэрэгцэн Европын томоохон эдийн засгуудын улс төр, төсвийн төлөв хөрөнгө оруулагчдын анхаарлыг татаж байна. АНУ-д ч мөн адил инфляц, өндөр хүү болон Засгийн газырн өрийн асуудал тулгарч байгаа ч Европын хувьд эдийн засаг өсөлт сул, бондын зах зээл нэгдмэл бус байгаагийн зэрэгцээ Франц болон Испанид улс төрийн тодорхойгүй байдал нэмэгдэх зэрэг олон эрсдэл ажиглагдаж буй. Испанийн Ерөнхий сайд Педро Санчес даваа гарагт арваннэгдүгээр сард ээлжит бус сонгууль явуулахаар зарласан. Тэрбээр уг шийдвэрээ тус улсад орон сууцны хямралтай холбоотой эсэргүүцлийн хөдөлгөөн эрчимжиж буй үед гаргажээ.

Францын өрийн асуудал анхаарлын төвд Францын төсөв, өрийн нөхцөл байдал Европын Засгийн газрын бондын зах зээлийн гол эрсдэлийн нэг болоод байна. Улсын өр нэмэгдэхийн хэрээр түүнийг санхүүжүүлэх болон хүүгийн төлбөрийн зардал өсч байгаа юм. “Barclays”-ийн эдийн засагчдын мэдээлснээр Францын Засгийн газар 2027 оны төсвийн төслийн ерөнхий хүрээг танилцуулж, төсвийн алдагдлыг дотоодын нийт бүтээгдэхүүний 5.4 хувьтай тэнцэж байгааг ирэх онд 5 хувь хүртэл бууруулах зорьжээ. Гэсэн хэдий ч төсөв ойрын хугацаанд батлагдсан ч Парис төсвийн зорилтоо биелүүлэх боломжгүй гэж шинжээчид үзэж байна. “Barclays”-ийн эдийн засагчид энэ талаар “Францын төсөв болон улс төрийн нөхцөл байдал евро бүсийн эдийн засгийн төлөвийг тодорхойгүй болгож байна” гэдгийг онцолж, тус улсын төсвийн суурь үзүүлэлтүүд сул хэвээр байгаа бөгөөд ирэх жилийн Ерөнхийлөгчийн сонгуулиас өмнө мэдэгдэхүйц хэмжээний өөрчлөлт гарах магадлал бага байгааг хэллээ. Мөн “ING”-ийн стратегичид төсвийн төслийг баталсан ч Францын төсвийн бүтцийн асуудал тэр дор шийдвэрлэгдэхгүй гэж үзэж байгаа юм. Тэдний үзэж буйгаар төсвийн алдагдал өрийн ДНБ-д эзлэх харьцааг тогтворжуулахад хангалттай хэмжээнд буурах боломжгүй бөгөөд хүн амын насжилттай холбоотой төсвийн зардал, өрийн хүүгийн төлбөр үргэлжлэн өсөх төлөвтэй байна. Иймээс Францын дараагийн Засгийн газар төсвийн зардлыг хаанаас танах, ямар татварт өөрчлөлт оруулах, өрийн хэмжээг хэрхэн тогтворжуулах зэрэг хүндрэлтэй шийдвэрүүдтэй тулгархаар буй. “ING”-ийн мэдээлснээр Ерөнхийлөгчийн сонгуулийн гол нэр дэвшигчдийн хэн нь ч эдгээр асуудлыг хэрхэн шийдвэрлэх талаар хангалттай нарийвчилсан төлөвлөгөө одоогоор танилцуулаагүй байна.