Фунтын ханш хэрхэн тэсвэрлэхийг зээлийн өндөр өртөг, төсвийн эрсдэл сорьж эхэллээ

Британийн фунт стерлингийн ханш сүүлийн саруудад улс төрийн өөрчлөлт, геополитикийн савлагааг харьцангуй тогтвортой давсан ч урт хугацааны санхүүжилтийн өртөг нэмэгдэж эхэлсэн нь валютын цаашдын тэсвэрийг сорьж байна.

Ерөнхий сайд Кийр Стармер өнгөрсөн долоодугаар сарын 20-нд огцорч, Их Британи улс сүүлийн 10 жилийн хугацаанд долоо дахь удирдагчаа "тосон авсан" ч эрх мэдлийн шилжилт фунтын ханшийг огцом савлуулсангүй. Зүүний төв үзэлт “Labour" намын Энди Бёрнхэм богино хугацаанд Ерөнхий сайдаар томилогдсон үеэрээ ч валютын зах зээл харьцангуй тайван байв.

Харин дэлхийн бондын ханшийн уналтыг даган Их Британийн зээлийн өртөг нэмэгдсэнээр хөрөнгө оруулагчдын анхаарал улс төрийн өөрчлөлтөөс санхүүжилтийн нөхцөл рүү шилжиж байна.

Фунтын ханш тогтвортой ч зээлийн өртөг өсөв

Фунтын ханш он гарсаар еврогийн эсрэг 1.6 хувиар чангарсан хэвээр байна. Гэсэн ч валютын энэ үзүүлэлт урт хугацааны эрсдэл арилсныг илтгэхгүй.

Их Британийн урт хугацааны зээлийн өртөг 1998 оноос хойших хамгийн өндөр түвшинд хүрсэн нь Засгийн газар, компаниудын санхүүжилтийг үнэтэй болгож, ирэх саруудын эдийн засгийн орчныг чангаруулах эрсдэлтэй.

Үүний зэрэгцээ Английн төв банк бодлогын хүүгээ 3.75 хувьд хадгалж байна. Зах зээл есдүгээр сарын хурлаар бодлогын хүү өсөх магадлалыг одоогоор бага үнэлсээр...

Их Британийн эдийн засаг оны эхний хагаст харьцангуй өндөр өсөлт үзүүлж, Дотоодын нийт бүтээгдэхүүн эхний улиралд 0.6, хоёрдугаар улиралд 0.4 хувиар өссөн нь хөгжингүй эдийн засгуудын дунд хүчтэй үзүүлэлтэд тооцогдоно.

Цаг агаарын таатай нөхцөл болон хөлбөмбөгийн ДАШТ-тэй холбоотой хэрэглээ эдийн засгийн идэвхийг дэмжсэн бол геополитикийн савлагааны үед бизнесийн идэвх ч тогтвортой байжээ.

Эрчим хүчний ханш инфляцийн эрсдэлийг нэмэгдүүлэв

“Rabobank” банкны валютын ахлах стратегич Жэйн Фоли CNBC-д өгсөн тайлбартаа дөрөвдүгээр сард Ираны дайн эхлэх үед Английн төв банк инфляц өсвөл бодлогын хүүгээр хариу арга хэмжээ авна гэсэн хүлээлт фунтыг дэмжсэн гэжээ.

Гэвч газрын тос, байгалийн хийн ханшийн өсөлт Их Британийн инфляцыг дахин нэмэгдүүлэх эрсдэлийг бий болгож байна. Нийт инфляц 3 хувьд ойртсон нь Английн төв банкны бодлогын сонголтыг улам төвөгтэй болгож байгааг шинжээчид онцоллоо.

Фолигийн үзэж буйгаар инфляц өндөр хэвээр хадгалагдах тусам фунт “илүү эмзэг” болж магадгүй. Өмнө нь валютын ханшийг дэмжиж байсан хүү өсгөх хүлээлт эдийн засгийн өсөлт саарах тохиолдолд эсрэгээрээ эрсдэл дагуулах боломжтой.

Гадаад зах зээл дэх бодлогын хүүгийн зөрүү мөн фунтын төлөвт нөлөөлж байна. Европын төв банк лхагва гарагт бодлогын хүүгээ өсгөнө гэсэн хүлээлт өндөр байгаа бол АНУ-ын холбооны нөөцийн банк энэ сарын сүүлчээр бодлогын хүүг нэмэх магадлалыг зах зээл өмнөхөөс өндөр үнэлж эхэлжээ.

Дараагийн сорил нь төсвийн мэдэгдэл

Улс төрийн эрсдэлийн нэмэгдэл одоогоор харьцангуй бага хэвээр байна. Олон улсын төлбөр тооцоо, валютын үйлчилгээний “Ebury” компанийн зах зээлийн стратегийн албаны дарга Мэттью Райан эрх мэдлийн шилжилт “цэвэр, эмх цэгцтэй” явагдсан нь фунтэд шингэх улс төрийн эрсдэлийн нэмэгдлийг бууруулсан гэж CNBC-д тайлбарлав.

Гэхдээ хөрөнгө оруулагчдын дараагийн гол анхаарал аравдугаар сарын 28-нд танилцуулах төсвийн мэдэгдэлд төвлөрч байна.

Райаны үзэж буйгаар Засгийн газар зарим татварыг нэмэхийн зэрэгцээ өрийн хэмжээг өсгөх хувилбар сонговол бондын зах зээл болон фунтын ханшийн хэлбэлзэл нэмэгдэх эрсдэлтэй.

Шинэ Сангийн сайд Жон Хили төсвийн сахилга батыг хадгалахын зэрэгцээ эдийн засгийн өсөлтийг Лондоноос гадна бүс нутагт илүү жигд хуваарилах зорилт тавьснаа мэдэгдсэн.

“JP Morgan” банкны Их Британийн эдийн засагч Аллан Монксын үзэж буйгаар өндөр зээлийн өртөг Засгийн газрыг татвар болон төсвийн зарлагын өөрчлөлтөд болгоомжтой хандахад хүргэж байна. Төсвийн мэдэгдэл ойртох тусам хөрөнгө оруулагчид шинэ Засгийн газрын санхүүгийн бодлого өрийн зах зээл болон фунтын ханшид хэрхэн нөлөөлөхийг илүү анхааралтай ажиглах төлөвтэй байна.