"Google" дэвшилтэт "Gemini 4 Argon" загвараа танилцууллаа

“Alphabet”-ийн технологийн “Google” компани лхагва гарагт хамгийн дэвшилтэт хиймэл оюуны загвар болох “Gemini 4 Argon”-ийг танилцууллаа. Шинэ загвар нь кодчилол, кибер аюулгүй байдал болон мэргэжлийн нарийн ажилд гүйцэтгэлээ ахиулжээ.

"Argon" бодит нөхцөл дэх программ хангамжийн инженерчлэлийн үнэлгээнд шинэ дээд амжилт тогтоож, кибер аюулгүй байдлын үнэлгээнд тэргүүн байрт тэнцсэн нь компаниуд кодчилол болон кибер аюулгүй байдлын чадавхаа нэмэгдүүлэхээр өрсөлдөж буй энэ үед илүү хүчирхэг загваруудыг буруугаар ашиглах эрсдэлийн талаарх анхаарал мөн нэмэгдэж байна.

“Google” компани шинэ загварыг үйл ажиллагаандаа аль хэдийн ашиглаж эхэлжээ. "Argon"-ийг өгөгдлийн төвүүдийн санах ойн хэрэглээг оновчлоход ашигласнаар нэмэлт техник хангамж худалдаж авахгүйгээр хэдэн зуун терабайт санах ой чөлөөлсөн байна.

Уг жишээ нь хиймэл оюуны загварыг программ бичихээс гадна технологийн дэд бүтцийн ашиглалтыг оновчлоход ашиглах боломжийг харуулж байна. Мөн “Google”-ийн квант тооцооллын судлаачид "Argon"-ийг судалгаанд ч ашиглажээ.

Нэвтрүүлэлтийг үе шаттай хийнэ

“Google” Argon-ийг олон нийтэд нэг дор нээлттэй болгохын оронд үе шаттайгаар нэвтрүүлэхээр төлөвлөжээ. Эхний ээлжид итгэмжлэгдсэн кибер аюулгүй байдлын түншүүдэд ашиглуулж, цаашлаад АНУ-ын Засгийн газартай хамтран загварыг нийтэд гаргахаас өмнөх аюулгүй байдлын үнэлгээнд хамруулах аж.

Олон нийтэд нэвтрүүлэхээс өмнө загварыг буруугаар ашиглах эрсдэл болон “prompt injection” буюу гаднын заавраар хиймэл оюуны үйлдлийг өөрчлөх оролдлого зэрэг дөрвөн үндсэн чиглэлд хамгаалалтыг өргөжүүлэхээр ажиллаж байгаагаа “Google” мэдээлсэн байна.

Танилцуулга хийхээс нэг өдрийн өмнө “Alphabet”-ийн гүйцэтгэх захирал Сундар Пичай Цагаан ордонд АНУ-ын Ерөнхийлөгч Дональд Трамптай уулзаж, хиймэл оюуны аюулгүй ажиллагаатай холбоотой сайн дурын тохиролцоонд гарын үсэг зурсан байна.

“Google”-ийн тайлбарласнаар, үе шаттай нэвтрүүлэлт нь загварт итгэх итгэлийг нэмэгдүүлэхийн зэрэгцээ кибер хамгаалалтын өндөр чадавхтай загварыг хамгаалалтын байгууллагуудад аль болох хурдан хүргэх зорилготой.

"Argon"-ийг олон нийтэд хэзээ нээлттэй болгох хугацааг “Google” одоогоор зарлаагүй байна. Иймээс шинэ загварын хувьд зөвхөн гүйцэтгэлийн үзүүлэлт бус, хүчирхэг хиймэл оюуныг хэрхэн аюулгүй нэвтрүүлэх нь дараагийн гол асуудал болж байна.