Хиймэл оюуны ертөнц: “Уран зөгнөлөөс” шинжлэх ухааныг ялгах сорилт тулгарч байна

Америкийн хиймэл оюуны хурдасгуур “Y Combinator”-ийн гүйцэтгэх захирал Гарри Тан технологийн эрсдэлийн талаар хэлэлцэхдээ “шинжлэх ухааны баримтыг уран зөгнөлөөс ялгах” шаардлагатай хэмээн мэдэгдэж, зохицуулагчид загвараас илүү кибер аюулд анхаарах ёстой гэж үзэж буйгаа илэрхийллээ.

Тан CNBC-ийн Кейт Рүүнид өгсөн ярилцлагадаа хиймэл оюуны загваруудтай холбоотой маргааны талаар би юу ч хийхгүй гэж хэлсэн ч энэ нь эрсдэлийг үгүйсгэсэн байр суурь биш гэдгийг тодотгожээ. Түүний үзэж буйгаар бодлого тодорхойлогчдын эхний зорилт нь бодитоор хэрэгжиж болох хамгаалалтын стандарт тогтоож, кибер халдлага болон системийн сул талд хариу өгөх чадварыг сайжруулах явдал юм.

“Бид шинжлэх ухааны баримтад төвлөрөх хэрэгтэй, уран зөгнөлд биш” гэж Тан хэлсэн байна. Тэрбээр АНУ-д хиймэл оюуны загваруудад зориулсан "тусгай дэглэм" бий болгох асуудлыг хэлэлцэж болох ч зохицуулалтын нөөцийг хамгийн бодит эрсдэл рүү эхэлж чиглүүлэх нь чухал гэж үзжээ.

Түүний байр суурь АНУ-ын Үндэсний аюулгүй байдлын агентлаг, Кибер аюулгүй байдал, дэд бүтцийн аюулгүй байдлын агентлаг болон Холбооны мөрдөх товчоо зэрэг байгууллагууд хиймэл оюуны загваруудтай холбоотой эрсдэлийн талаар сэрэмжлүүлсний дараахан гарсан байна.

Тан зохицуулалтыг нэг төрлийн эрсдэлд бүхэлд нь төвлөрүүлэх нь бодит кибер аюулын эсрэг чадавхыг сулруулж болзошгүйг анхааруулжээ. Мөн хэт өргөн хүрээтэй хориг, шаардлага нь хиймэл оюуны салбарын инновац, өрсөлдөөний орчныг хязгаарлах эрсдэлтэй гэж үзсэн байна.

Нээлттэй ба тэргүүний загварын тэнцвэр

Таны үзэж буйгаар зохицуулагчдын өмнө тулгарах гол сорилтын нэг нь нээлттэй хиймэл оюуны загварууд болон өндөр хүчин чадалтай тэргүүний загваруудын хооронд зөв тэнцвэр тогтоох асуудал юм.

Нээлттэй загварууд нь олон хөгжүүлэгчид технологид нэвтрэх боломж олгож, инновацын хурдыг нэмэгдүүлдэг. Харин илүү хүчирхэг тэргүүний загваруудын хувьд аюулгүй байдал, ашиглалтын хяналт, хамгаалалтын стандарт чухал болж байна.

Компаниуд хамгаалалтын арга хэмжээг чангатгаж байна

Хиймэл оюун хөгжүүлэгч компаниуд ч хамгаалалтын бодлогоо өөрсдийн түвшинд хэрэгжүүлж эхэлжээ. “Anthropic” компани пүрэв гарагт тодорхойгүй гадаад улс орнуудтай холбоотой таван тохиолдолд “Claude” загварынхаа хандалтыг хаасан гэж мэдээлсэн.

Уг шийдвэр нь хиймэл оюуны загварын ашиглалтад хяналт тавих, эрсдэлтэй хэрэглээг хязгаарлах арга хэмжээ зөвхөн төрийн зохицуулалтаар бус компаниудын дотоод бодлогоор ч хэрэгжиж байгааг харуулав.

Үүний зэрэгцээ хиймэл оюунд төвлөрсөн шинэ бизнесүүдийн өсөлт үргэлжилсээр байна. “Y Combinator”-ийн "Demo Day" арга хэмжээнд танилцуулсан 196 стартапын 149 нь машин сургалт болон хиймэл оюуны ангилалд багтжээ.

Хиймэл оюун хөгжүүлэгч стартапуудын эзлэх өндөр хувь нь технологийн салбар дахь хөрөнгө оруулалт, бизнесийн шинэ санааны томоохон хэсэг хиймэл оюун руу төвлөрснийг харуулж байна. Ийм нөхцөлд зохицуулагчид аюулгүй байдлын бодит эрсдэлийг бууруулахын зэрэгцээ инновац, өрсөлдөөнийг хэт хязгаарлахгүй байх тэнцвэрийг олох шаардлагатай гэж Тан үзэж байна.