Хонконг анхны таван жилийн төлөвлөгөөгөө танилцуулж, эх газрын Хятадтай түншлэлээ гүнзгийрүүлэхээ мэдэгдлээ

Хонконгийн засаг захиргааны тэргүүн Жон Ли лхагва гарагт тус хотын анхны таван жилийн төлөвлөгөөг танилцуулж, иргэдийн амьжиргааг сайжруулахын зэрэгцээ дэлхийн санхүүгийн төвийн байр сууриа бэхжүүлж, эх газрын Хятадтай технологийн хамтын ажиллагааг гүнзгийрүүлэх зорилт дэвшүүллээ.

Хууль тогтоогчид болон иргэдтэй хоёр сарын турш зөвлөлдсөний дараа боловсруулсан төлөвлөгөө нь эдийн засаг, хөдөлмөр эрхлэлт, боловсрол, эрүүл мэнд, орон сууц зэрэг өргөн хүрээг хамарч байна. Жон Лигийн мэдээлснээр ирэх таван жилд 196 мянган нийтийн орон сууцыг ашиглалтад оруулахаар төлөвлөжээ.

Газрын нийлүүлэлт хязгаарлагдмал, орон сууц худалдан авах өртөг өндөр Хонконгт залуусыг өөрийн орон сууцтай болох боломжийг нэмэгдүүлэх нь бодлогын гол чиглэлүүдийн нэг байх юм. Ирэх 10 жилийн орон сууцны нийлүүлэлтийн 40 хувийг нийтийн түрээсийн байр, 30 хувийг төрөөс дэмжлэгтэй орон сууц, үлдсэн 30 хувийг хувийн хэвшлийн орон сууц эзлэхээр төлөвлөсөн байна.

“Northern Metropolis”-ийг шинэ өсөлтийн төв болгоно

Эх газрын Хятадтай хил залгаа 30,000 га талбай бүхий “Northern Metropolis” төслийн бүтээн байгуулалтыг хурдасгаж, Хонконгийн шинэ эдийн засгийн төв болгон хөгжүүлэхээр төлөвлөжээ.

Төслийг анх 2021 онд танилцуулсан бөгөөд бүрэн хэрэгжсэнээр 2.5 сая орчим хүнийг орон сууцаар хангах, 650 мянга орчим ажлын байр бий болгох боломжтой гэж эрх баригчид тооцоолж байна. Мөн тус бүсэд гурван их сургуулийн кампус байгуулахаар төлөвлөжээ.

Жон Лигийн хэлснээр “Northern Metropolis” нь амьдрах, ажиллах, зорчих боломжийг нэг дор бүрдүүлсэн бүс болж, Хонконгийн өрсөлдөх чадвар болон урт хугацааны хөгжлийн боломжийг нэмэгдүүлэх зорилготой.

Төлөвлөгөө нь БНХАУ-ын төв засгийн газраас 2030 он хүртэл хэрэгжүүлэх үндэсний таван жилийн төлөвлөгөөг гуравдугаар сард баталсны дараа танилцуулагдаж байна. Хонконг эх газрын Хятадтай холбогч “супер холбогч” үүргээ өргөжүүлж, “Greater Bay Area”-тай эдийн засгийн интеграцыг гүнзгийрүүлэхээр зорьжээ.

Технологийн салбарт хиймэл оюун, роботик, микроэлектроник, шинэ эрчим хүч, дэвшилтэт үйлдвэрлэл, шинэ материал болон эрүүл мэндийн технологид түлхүү анхаарна гэж Жон Ли мэдэгдэв.

Санхүүгийн төвийн байр сууриа бэхжүүлнэ

Таван жилийн төлөвлөгөөний өөр нэг гол чиглэл нь Хонконгийн санхүү, далайн тээвэр, худалдааны төвийн байр суурийг хадгалж, дэлхийн оффшор юанийн зах зээл дэх үүргийг өргөжүүлэх явдал юм.

Засаг захиргаа алт болон түүхий эдийн арилжаа, ногоон ба тогтвортой санхүүжилт, дижитал активын зах зээлийг эдийн засгийг төрөлжүүлэх чиглэл болгон тодорхойлжээ.

Хонконг алтны төвлөрсөн клиринг, төлбөр тооцооны системээ 2027 оны эхний улиралд албан ёсоор нэвтрүүлэхээр төлөвлөж байна. Уг системийн туршилтын ажиллагаа 2026 оны долоодугаар сард эхэлсэн бөгөөд алтны арилжаа, хадгалалт, биет нийлүүлэлт болон Шанхайн алтны биржтэй холбогдох дэд бүтцийг нэгтгэх зорилготой.

Хонконгийн Мөнгөний удирдах газар мөн төв банкны дижитал валют ашигласан төлбөр тооцоог энэ оны эцэс гэхэд хэрэгжүүлэхээр төлөвлөж буйг Жон Ли дурджээ.

Үүний зэрэгцээ үнэт цаасны зохицуулагч болон Хонконгийн хөрөнгийн биржийн оператор “HKEX” Зүүн Өмнөд Ази болон БНХАУ-ын “Бүс ба Зам” санаачилгад оролцогч орнуудын компаниудыг Хонконгт давхар болон хоёрдогч бүртгэл хийхийг дэмжихээр ажиллана.

Төрөлтийг дэмжих бодлогоо үргэлжлүүлнэ

Дэлхийд төрөлтийн түвшин хамгийн багад тооцогддог Хонконг хүн ам зүйн асуудлыг мөн таван жилийн бодлогын хүрээнд тусгажээ. Энэ хүрээнд анхны хүүхэд төрүүлсэн гэр бүлд олгодог 20,000 хонконг долларын урамшууллыг дахин гурван жилийн хугацаанд олгохоор болжээ. Харин хоёр болон гурав дахь хүүхдийн урамшууллыг 30,000 хонконг доллар болгон нэмэгдүүлэхээр төлөвлөсөн байна.

Хүүхдийн мөнгөн тэтгэмж, татварын хөнгөлөлт болон хүүхэд асрах төвийн хүртээмжийг нэмэгдүүлэх арга хэмжээг давхар хэрэгжүүлэхээр төлөвлөжээ.