Хүүхдүүдийг эрүүл мэндийн эрт илрүүлэгт ирэх сарын 1-нээс хамруулна

Улс даяар сургуулийн өмнөх нас болон ерөнхий боловсролын сургуулийн 3, 6, 11, 15 настай хүүхдүүдийг аравдугаар сарын 1-нээс арванхоёрдугаар сарын 1 хүртэл эрүүл мэндийн эрт илрүүлэх үзлэгт хамруулахаар болжээ.

Эх хүүхдийн эрүүл мэндийн үндэсний төвийн Мэдрэлийн эмгэг судлалын тасгийн эмч Б.Цолмонгийн мэдээлснээр 36 сартай буюу гурван настай хүүхдүүдийн хэл яриа, танин мэдэхүй, хөдөлгөөн болон сэтгэхүйн хөгжлийг үнэлэх аж.

Хөгжлийн үнэлгээгээр ямар нэг эмгэг илэрсэн тохиолдолд шаардлагатай эмчилгээ, тусламжийг хугацаа алдалгүй эхлүүлэх боломж бүрдэхийг тэрбээр онцлов.

Харин 11 болон 15 настай хүүхдүүдэд бэлгийн бойжилтын үед илрэх магадлалтай багана нурууны муруйлт, хазайлтыг оношлох юм. Дээрх насанд нурууны муруйлт оношлогдох тохиолдол байдаг тул эрт илрүүлэх үзлэгт уг үнэлгээг багтаажээ.

Мөн зургаадугаар ангийн сурагчдын биеийн ерөнхий үзлэгийн үеэр хөлийн тавхайн эрсдэлийг үнэлэхээр төлөвлөсөн байна.

Тиймээс эцэг эх, асран хамгаалагчид хүүхдээ сургууль, цэцэрлэгийн орчинд зохион байгуулах эрт илрүүлэгт идэвхтэй хамруулах нь өвчлөлөөс урьдчилан сэргийлж, оношлогдсон үед нь эрт эмчлэх ач холбогдолтой.