Хятадын залуус "царай муутай" бүтээгдэхүүнийг өөрийгөө илэрхийлэх хэрэгсэл болгон ашиглаж байна

Хятадын цахим худалдааны зах зээлд урьд нь борлуулахад бэрх гэж тооцогдож болохоор этгээд хэлбэр, өвөрмөц дизайнтай бүтээгдэхүүнүүд өдгөө шинэ хэрэглээний тренд болж байна. Ялангуяа залуу худалдан авагчид нийтлэг гоо зүйн стандартыг дагахаас илүү хошигнол, содон дүр төрх, хувь хүний онцлогийг илэрхийлсэн барааг сонгох болжээ.

Цахим худалдааны “Alibaba Group Holding” компанийн “Taobao” платформ 2020 онд бүтээлч, ер бусын бүтээгдэхүүнийг онцлох “Uglies Award” буюу “Царай муутай бүтээгдэхүүний шагнал”-ыг санаачилсан. Тус платформын мэдээлснээр уг ангилалд багтах бүтээгдэхүүний нийт борлуулалт түүнээс хойш 230 сая юань буюу 34.3 сая ам.долларыг давжээ. Гэхдээ “Taobao” ямар шалгуураар бүтээгдэхүүнийг “царай муутай” гэж ангилдгаа нарийвчлан тайлбарлаагүй байна.

Тус компани мөн Жэжян мужийн Ханжоу хотод “Ugly, But Mine” буюу “Царай муутай ч гэсэн минийх” сэдэвтэй хоёр дахь үзэсгэлэнгээ зохион байгуулж байна. Үзэсгэлэнгийн талбай өнгөрсөн жилийн анхны арга хэмжээнээс бараг хоёр дахин том болжээ.

“Taobao”-гийн “Uglies Award” төслийн удирдагч Ху Юйгийн тайлбарласнаар хэрэглэгчид зөвхөн хачин хэлбэртэй эд зүйл худалдаж аваад байгаа хэрэг биш аж. Харин тэд тухайн бүтээгдэхүүнээр дамжуулан сэтгэл хөдлөл, түүх, өөрийн онцлогийг илэрхийлэхийг хүсч байгаа юм.

Зарим худалдан авагч этгээд бүтээгдэхүүнийг ажлын ширээн дээрээ байрлуулдаг бол нөгөө хэсэг нь хувийн хэв маягаа харуулахын тулд хувцас, аксессуар болгон ашигладаг байна. Өвөрмөц дизайн нь ижил сонирхолтой хүмүүсийг хооронд нь холбох хэрэгсэл болж байгааг Ху Юй онцолжээ.

“Taobao”-д худалдаалагдаж буй нийт бүтээгдэхүүний 85 хувийг жижиг, дунд болон бичил бизнесүүд нийлүүлдэг. Олон төрлийн стандарт бус бүтээгдэхүүн санал болгодог бүтэц нь залуу хэрэглэгчдийн томоохон суурьтай хосолж, өмнө нь хэт ниш гэж тооцогдож байсан загварт ч худалдан авагч олох боломж бүрдүүлж байна. Этгээд загварын тренд зөвхөн орчин үеийн бүтээгдэхүүнээр хязгаарлагдахгүй байна. Ганьсү мужийн Дүньхуаны эртний агуйн ханын зураг дахь домгийн дүрүүдийг гурван хэмжээст цуглуулгын тоглоом болгон хувиргажээ.

ЮНЕСКО-гийн Дэлхийн өвд бүртгэлтэй Дүньхуаны дурсгалт газрыг хариуцдаг “Dunhuang Academy” байгууллагын бүтээсэн, эртний ханын зургаас санаа авсан далавчтай дүр өнгөрсөн онд худалдаанд гарснаас хойш онлайн болон биет дэлгүүрээр 70 мянга гаруй ширхэг борлогдсон байна.

Төслийн үйл ажиллагаа хариуцсан Хуан Сыжя залуу хэрэглэгчдийг уламжлалт соёлтой холбохдоо түүхийн хичээлээр эхлэх нь үргэлж хамгийн үр дүнтэй арга биш гэж тайлбарлав. Харин тэдэнд ойр, нөхөрсөг, сонирхол төрүүлэхүйц дүр бүтээх нь соёлын бүтээгдэхүүнийг илүү хүртээмжтэй болгож болохыг тэрбээр онцолжээ.

Этгээд загварын худалдан авагчид зөвхөн субкультурын залуус биш

“Taobao”-гийн эмэгтэй хувцасны “Hot Nipples Club” дэлгүүр бараг 100 мянган дагагчтай бөгөөд хошигнол, ёжлол, хэвшмэл ойлголтыг эвдсэн загвар бүхий хувцас голчлон худалдаалдаг. Шао эгч нэрээр танигдсан үүсгэн байгуулагч нь 2021 онд ажлаасаа гарч уг бизнесийг эхлүүлжээ.

Тэрбээр анх худалдан авагчдаа голдуу субкультур сонирхдог залуус байна гэж төсөөлж байсан ч дэлгүүрийн мэдээллээс харахад оффисын ажилтнууд, төрийн албан хаагчид ч үйлчлүүлэгчдийн дунд багтсан байна.

Шаогийн хэлснээр өдөр тутамдаа уламжлалт хэв маягтай харагддаг хүмүүс ч тодорхой үед нийтлэг стандартаас гарч, өөр дүр төрхөө илэрхийлэх хүсэлтэй байдаг.

2001 онд төрсөн Шя Вэйигийн ажиллуулдаг “Out Side Window” дэлгүүр мөн жижиг, этгээд бүтээгдэхүүнээр хэрэглэгч татаж байна. Тэрбээр Хаврын баярын үеэр гэрээ цэвэрлэж байхдаа шүүрийг гитар мэт төсөөлснөөс санаа авч, гитарын зурагтай хормогч бүтээжээ. 12 юанийн үнэтэй уг бүтээгдэхүүн 2,000 гаруй ширхэг борлогдсон бөгөөд зарим хэрэглэгч хөгжмийн наадам, концерт, K-pop уран бүтээлчдийн фэн уулзалтад хүртэл өмссөн байна.

Хятадын Урлагийн академийн профессор, үзэсгэлэнгийн куратор Лю Тяний тайлбарласнаар “царай муутай” гэх ойлголтыг үзэсгэлэнтэй зүйлийн эсрэг тал гэж үзэх шаардлагагүй. Харин уг тренд нь гоо зүйн нэг стандартад захирагдахаас татгалзаж, масс үйлдвэрлэл, хэрэглээний дунд хувь хүний ялгаатай байдал, санамсаргүй шийдэл, хошигнолд орон зай гаргаж буй өөрчлөлт гэж тэрбээр үзжээ.