Иений ханш чангарч, сүүлийн долоон сарын дээд түвшинд хүрлээ: "Carry trade"-ийн дараагийн валют юу байх вэ?

Японы иений ханш огцом чангарснаар валютын зах зээлийн хөрөнгө оруулагчдын олон жил ашигласан "carry trade" хэмээх стратеги өөрчлөгдөж байна. "Carry trade" гэдэг нь бага хүүтэй валютаар санхүүжилт босгож, өндөр өгөөжтэй валют болон активт хөрөнгө оруулах стратегийг хэлдэг ба хөрөнгө оруулагчид иений ханш суларч буйг ашиглан ийм төрлийн арилжааг олон жилийн турш хийжээ. Гэвч иений ханш огцом чангарч, сүүлийн долоон сарын дээд хүрснээр олон жил үргэлжилсэн энэхүү стратегийг орлох өөр нэг аргачлал хөрөнгө оруулагчдын эрэлхийлэл болж буй.

Японы Төв банк бодлогын хүүг хүлээлтээс хурдан өсгөж магадгүй хэмээх зах зээлийн таамаг болон Японы хөрөнгө оруулагчид гадаадад байршуулсан хөрөнгөө эх орондоо эргүүлэн татах магадлал нэмэгдсэнээр иений ханш энэ долоо хоногийн арилжаагаар сүүлийн долоон сарын дээд түвшинд хүртлээ чангарсан. Үүнээс өмнө долдугаар сарын сүүлээр эрх баригчид валютын зах зээлд дахин нэг удаа интервенц хийсэн байна.

Ийм нөхцөлд иений ханш үргэлжлэн сулрах төлөвт найдаж, валютыг богино позицоор буюу цаашид сулрана гэж тооцон арилжаалах харан арилжаалах нь хөрөнгө оруулагчдын хувьд эрсдэлтэй алхам болж байгаа юм.

Хөрөнгө оруулагчдын анхаарал швейцар франкт төвлөрч байна

Иенийг орлох хамгийн боломжит валютын нэг нь Швейцар франкт гэж зах зээлийн оролцогчид үзэж байна. Учир нь Швейцарын Үндэсний банк бодлогын хүүг нэг жил гаруйн хугацаанд тэг түвшинд хадгалжээ. Хүүгийн зах зээлийн үнэлгээгээр 2027 оны эцэс хүртэл бодлогын хүү нийтдээ 50 хүрэхгүй суурь нэгж буюу 0.5 хувиас ихгүй байдлаар өсөх хүлээлттэй байна.

Мөн инфляцын нөлөөг хасч тооцсон бодит бодлогын хүү нь ойролцоогоор хасах нэг хувь буюу сөрөг түвшинд хадгалагдаж байгаа бол Швейцарын Засгийн газрын 10 жилийн хугацаатай бондын бодит өгөөж мөн хасах түвшинд байна. “Их 10” бүлгийн гишүүн орнуудаас 10 жилийн хугацаатай бондын бодит өгөөж нь сөрөг түвшинд хадгалагдаж байгаа цорын ганц зах зээл нь Швейцар юм.

АНУ-ын санхүүгийн “JPMorgan” группийн валютын стратегичдын үзэж буйгаар швейцар франкийг богино позицоор арилжаалах нь дэлхийн эдийн засгийн өсөлт эрчимжсэн тохиолдолд ашиг олох “хамгийн цэвэр” боломжуудын нэг болж байна. Учир нь франк иентэй харьцуулахад Төв банкны бодлого болон валютын интервенцтэй холбоотой тодорхойгүй байдал багатай.

Гэсэн хэдий ч уг стратегийг сонгох хөрөнгө оруулагчдын тоо аль хэдийн олширчээ. Тодруулбал, "JPMorgan”-ийн тооцоогоор ам.доллар болон еврогийн эсрэг Швейцар франкийн ханш сулрахад тавьсан фьючерс, опционы позицууд 2024 оны "carry trade" идэвхжилийн оргил үеийн түвшинд ойртож байна.

Канад долларын ханш сулрах уу?

Үүний зэрэгцээ "Carry trade"-ийн санхүүжилтийн өөр нэг боломжит валют нь канад доллар болж байна.

АНУ-ын Түүхий эдийн фьючерсийн арилжааны комиссын мэдээлснээр спекулятив хөрөнгө оруулагчид канад долларын ханш буурахад 8 орчим тэрбум ам.долларын бооцоо тавьжээ. Уг үзүүлэлт зуны эхээр бараг 13 тэрбум ам.долларт хүрч байсан юм.

Канадын Төв банк бодлогын хүүг нэг орчим жилийн хугацаанд 2.25 хувьд хадгалсан. Үүний зэрэгцээ канад долларын хүлээгдэж буй ханшийн хэлбэлзэл харьцангуй бага байгаа нь "carry trade" хийхэд хөрөнгө оруулагчдад харьцангуй давуу тал болдог аж.

Гэхдээ АНУ-тай өрнөж буй худалдааны маргаан Канадын эдийн засаг болон мөнгөний бодлогын төлөвийг тодорхойгүй болгожээ.

Ялангуяа АНУ руу чиглэсэн экспорт буурч, эдийн засгийн өсөлт саарвал Канадын Төв банк бодлогын хүүг одоогийн түвшинд хэвээр хадгалж магадгүй юм. Энэ тохиолдолд канад долларын ханш суларч, үүнийг "carry trade" хэрэгсэл болоход илүү тохиромжтой нөхцөл бүрдэнэ гэж үзэж буй.

Харин канад долларын сул ханш болон АНУ-ын бараанд ногдуулсан хариу тариф хэрэглээний үнийн өсөлтийг өдөөвөл Төв банк инфляцын эсрэг илүү хатуу байр суурь баримтлах шаардлагатай болно. Ингэснээр хөрөнгө оруулагчид канад долларыг хямд санхүүжилтийн эх үүсвэр болгон ашиглах давуу талаа алдах юм.