Иений ханш огцом чангарч, Токио зах зээлд интервенц хийх хүлээлт нэмэгдлээ

Японы иений ханш лхагва гарагийн арилжаагаар ам.долларын эсрэг 0.9 хувиар огцом чангарсны дараа пүрэв гарагийн Азийн арилжаагаар өсөлтөө хадгаллаа. Огцом хөдөлгөөн богино хугацаанд үргэлжилсэн нь Токиогийн эрх баригчид валютын зах зээлд интервенц хийхээр бэлтгэж байж болзошгүй гэсэн таамгийг арилжаачдын дунд нэмэгдүүлжээ. Ам.долларын ханш пүрэв гарагийн арилжаагаар 158.88 иентэй тэнцэж байлаа. Үүний зэрэгцээ еврогийн ханш иений эсрэг лхагва гарагийн арилжаагаар нэг орчим хувиар суларсан бол фунт стерлингийн ханш 1.15 хувиар буурчээ. Австралийн “Commonwealth Bank of Australia” банкны валютын стратегич Кэрол Конг иений ханш 0.9 хувиар чангарсан нь Засгийн газрын шууд интервенц гэж үзэхэд хангалттай том хөдөлгөөн биш гэж тайлбарлав. Харин зах зээлийн зарим оролцогч Японы эрх баригчид “rate check” хийсэн байж магадгүй гэж таамаглаж буйг тэрбээр онцолжээ. “Rate check” гэдэг нь Төв банк эсвэл эрх бүхий байгууллага арилжааны банкуудаас тухайн мөчийн валютын ханшийг лавлах ажиллагаа юм. Шууд интервенц биш боловч зах зээлд оролцохын өмнөх дохио гэж арилжаачид тайлбарлах тохиолдол бий.

Иений ханшийг сулруулж буй хүчин зүйлс хэвээр байна АНУ-ын болон Японы эрх баригчид долдугаар сарын 31-нд иений ханшийг тогтворжуулах зорилгоор ховор тохиолддог хамтарсан интервенц хийсэн ч Японы валютын ханш одоог хүртэл тогтвортой сэргэж чадаагүй байна. АНУ, Японы бодлогын хүүгийн зөрүү өндөр хэвээр байгаа нь иенээр хөрөнгө байршуулах өгөөжийг харьцангуй бага болгож буй. Үүн дээр Японы төсвийн төлөвтэй холбоотой болгоомжлол болон эрчим хүчний үнэ дахин өссөн нь импортын зардал өндөртэй тус улсын валют сулрах хүчин зүйл болжээ. Иен чангарснаар ам.долларын ханш бусад гол валютын эсрэг мөн ялимгүй суларлаа. Ам.долларын индекс пүрэв гарагийн арилжаагаар 0.04 хувиар буурч, 99.56 нэгжид хүрсэн бол еврогийн ханш 1.1589 ам.доллар орчимд хэлбэлзэв.

АНУ-ын ажлын байрны тайлан дараагийн гол дохио Валютын зах зээлийн анхаарал баасан гарагт нийтлэгдэх АНУ-ын хөдөө аж ахуйн бус салбарын ажил эрхлэлтийн тайланд төвлөрөөд байна. Шинжээчид наймдугаар сард АНУ-ын хөдөлмөрийн зах зээлд 56,000 шинэ ажлын байр нэмэгдсэн гэж таамаглаж буй. Харин ажилгүйдлийн түвшин наймдугаар сард 4.1 хувьд хадгалагдах төлөвтэй байгаа юм. Хэрэв хөдөлмөрийн зах зээлийн үзүүлэлт хүлээлттэй дүйвэл Холбооны Нөөцийн банк есдүгээр сард бодлогын хүүг нэмэгдүүлнэ гэж зах зээл үнэлж байна. Одоогоор бодлогын хүү өсөх магадлалыг фьючерсийн зах зээл 61 хувиар тооцож буй. “Commonwealth Bank of Australia”-ийн Кэрол Конгийн тайлбарласнаар Холбооны Нөөцийн банкны ерөнхийлөгч Кевин Уорш Жэксон Хоулын уулзалтын үеэр инфляцыг зорилтот түвшинд хурдан ойртуулахын тулд ойрын хугацаанд бодлогын арга хэмжээ авахад бэлэн гэдгээ илэрхийлсэн нь зах зээлийн хүлээлтийг өөрчилжээ. Баасан гарагийн хөдөлмөрийн зах зээлийн тайлан иений ханшийн богино хугацааны чиглэлийг тодорхойлох гол хүчин зүйлсийн нэг болохын зэрэгцээ Токио валютын зах зээлд дахин интервенц хийх эсэх талаарх хүлээлт анхаарал татсан сэдэв хэвээр байна.