“Jaguar Land Rover” 4,000 хүртэлх ажлын байр цомхотгохоор төлөвлөж байна

Энэтхэгийн автомашин үйлдвэрлэгч “Tata Motors”-ийн эзэмшдэг Их Британийн тансаг зэрэглэлийн автомашин үйлдвэрлэгч “Jaguar Land Rover” буюу “JLR” зардлаа бууруулах төлөвлөгөөний хүрээнд ажилтнуудаа сайн дурын үндсэн дээр цомхотгох хөтөлбөр эхлүүлэхээр болжээ.

“The Times”-ийн мэдээлснээр “JLR” ирэх хоёр жилийн хугацаанд 4,000 хүртэлх ажлын байр цомхотгохоор төлөвлөж байна. Харин компанийн төлөөлөгч “CNBC”-д ажлын байрны цомхотголын тоог баталгаажуулаагүй ч цалинтай болон удирдах түвшний ажилтнуудад сайн дураар ажлаас гарах боломж санал болгож буйгаа мэдэгдэв.

“JLR” ирэх хоёр жилд ойролцоогоор 1.7 тэрбум фунт стерлинг буюу 2.3 тэрбум ам.долларын зардал хэмнэхийн зэрэгцээ алдагдалгүй ажиллахад шаардлагатай үйлдвэрлэлийн хэмжээг 300,000 автомашин болгон бууруулахаар зорьж байна.

Компанийн төлөөлөгчийн мэдээлснээр уг зорилтод хүрэхийн тулд байгууллагын бүтцийг хялбарчилж, үйл ажиллагааны үр ашгийг нэмэгдүүлэх шаардлагатай болжээ.

“JLR”-ийн зардал бууруулах шийдвэрт дэлхийн автомашины зах зээлийн өрсөлдөөн ширүүссэн нь нөлөөлж байна. Тус компани Хятадын харьцангуй хямд автомашин үйлдвэрлэгчидтэй өрсөлдөхийн зэрэгцээ кибер халдлагын үр дагавар болон АНУ-ын Ерөнхийлөгч Дональд Трампын тарифын бодлоготой тулгарч буй юм.

“Tata Motors”-ийн хувьцааны ханш даваа гарагийн арилжаагаар 0.7 хувиар буурсан ч он гарснаас хойш 9.5 орчим хувиар өссөн үзүүлэлттэй байна.

Их Британийн тансаг зэрэглэлийн автомашины салбарт зардал танах алхам “JLR”-ээр хязгаарлагдахгүй байна. Сүүлийн саруудад тансаг зэрэглэлийн автомашин үйлдвэрлэгч “Aston Martin”, “Bentley” мөн зардал бууруулах арга хэмжээ зарлажээ.

Үүний зэрэгцээ Германы автомашин үйлдвэрлэгч “Volkswagen” тарифын нөлөө болон Хятадын брэндүүдийн ширүүсэж буй өрсөлдөөнтэй холбоотойгоор бүтцийн өөрчлөлтийн хүрээнд дахин 50 мянган ажлын байр цомхотгохоор төлөвлөж байгаагаа өнгөрсөн долоо хоногт мэдэгдсэн байна.

Их Британийн Засгийн газар “JLR”-д санхүүгийн шууд тусламж үзүүлэхгүй гэдгээ илэрхийлсэн бөгөөд холбогдох албаныхан компанийн удирдлагуудтай ажлын байрны цомхотголын талаар хэлэлцэх төлөвтэй байна. Засгийн газар автомашины үйлдвэрлэлийг дэмжих хүрээнд үйлдвэрлэгчдийн цахилгааны зардлыг бууруулах, утаагүй автомашины үйлдвэрлэл болон судалгаа, хөгжүүлэлтэд дөрвөн тэрбум фунт стерлингийн санхүүжилт олгох, цахилгаан автомашины худалдан авалтыг дэмжих хоёр тэрбум фунт стерлингийн хөтөлбөр хэрэгжүүлж байгаагаа онцолжээ.