“Meta” жижиг бизнесүүдэд зориулсан “Muse” хиймэл оюуны агентаа “Zoom”, “Slack”, “Canva” зэрэг платформтой холболоо

“Meta” компани жижиг бизнесүүдэд зориулсан “Muse for Small Business” хиймэл оюуны үйлчилгээг мягмар гарагт танилцууллаа. Шинэ үйлчилгээ нь компанийн “Muse” хиймэл оюуны агентыг бизнес эрхлэгчдийн өдөр тутам ашигладаг программуудтай холбож, ажлын тодорхой даалгаврыг гүйцэтгэхэд ашиглах боломж олгоно.

“Muse for Small Business” нь төслийн удирдлагын “Asana”, видео харилцааны “Zoom”, санхүүгийн программ хөгжүүлэгч “Intuit”, үүлэн хадгалалтын “Box”, дизайны “Canva”, мөн “Salesforce”-ийн ажлын харилцааны “Slack” зэрэг платформтой холбогдоно. Хэрэглэгчид “Meta”-ийн зар сурталчилгааны данс болон бизнесийн “Instagram”, “Facebook” профайлаа хиймэл оюуны агенттай холбох боломж олгоно.

“Meta” шинэ үйлчилгээний үнийг одоогоор зарлаагүй байна. Харин компанийн одоо ашиглагдаж буй “Muse” аппликейшн тодорхой хэрэглээний хязгаартайгаар үнэгүй бөгөөд түүнээс дээш хэрэглээнд төлбөртэй захиалгын хувилбар санал болгоно.

Ийнхүү хэрэглэгч “Muse”-д бизнесээ удирдах, шинэ хэрэглэгч олох зэрэг агуулга өгч, холбогдсон программуудаар дамжуулан шаардлагатай ажлуудыг хийлгэх боломжтой.

Жижиг бизнесийн зах зээл “Meta”-ийн хувьд хэдийн томоохон хэрэглэгчийн суурьтай болжээ. Тухайлбал, “Facebook”-т 200 сая жижиг бизнес бүртгэлтэй байна.

“Жижиг бизнесүүд бараг 20 жилийн турш манай аппликейшнүүдээр дамжуулан өсч ирсэн. Тэдэнд баяжуулах санаа дутаагүй, харин цаг хүрэлцдэггүй гэж бидэнд хэлсэн” хэмээн “Meta” шинэ үйлчилгээнийхээ талаар мэдээлжээ.

Хиймэл оюун бизнес рүү тэлэх стратеги

“Meta”-ийн шинэ үйлчилгээ тус компанийн хиймэл оюуны бүтээгдэхүүнүүдийг бизнесийн зах зээлд нэвтрүүлэх өргөн хүрээний стратегийн нэг хэсэг болж байна.

Тус компани даваа гарагт аж ахуйн нэгжүүдэд зориулсан шинэ платформ гаргахаа зарлаж, мэдээллийн сангийн технологийн “MongoDB” компанийн гүйцэтгэх захирал Си Жэй Десайгаар уг бизнесийг удирдуулахаар болжээ. Шинэ платформд “Muse” агент, бизнесийн зориулалттай хиймэл оюуны агент болон программчлалын хэрэгсэл багтахаар байна.

“Meta”-ийн гүйцэтгэх захирал Марк Зукерберг өнгөрсөн долоо хоногийн “Meta Connect” арга хэмжээний үеэр “Muse”-г компанийн хиймэл оюуны стратегийн “гол бүтээгдэхүүн” хэмээн тодорхойлсон.

“Meta” орлогынхоо дийлэнхийг дижитал зар сурталчилгаанаас бүрдүүлж ирсэн ч Зукерберг хиймэл оюунаас орлогын шинэ эх үүсвэр бий болгоход анхаарч байна. Тус компани өнгөрсөн онд хиймэл оюуны салбарын мэргэжилтнүүдийг татахад олон тэрбум ам.доллар зарцуулсан бөгөөд “Scale AI”-ийг үүсгэн байгуулагч Александер Ван компанийн хиймэл оюуны хөгжүүлэлтийг удирдах болжээ. Түүний баг дөрөвдүгээр сараас “Muse Spark” нэртэй шинэ хиймэл оюуны загваруудаа танилцуулж эхэлсэн юм.

“Muse”-ийн өсөлт хөрөнгө оруулагчдын анхаарлыг татав

“Meta” есдүгээр сарын 8-нд “Muse”-г олон нийтэд нэвтрүүлснээс хойш уг аппликейшн “Apple”-ийн “App Store”-ийн жагсаалтыг тэргүүлж, “ChatGPT”-ийг давсан байна.

“Evercore”-ийн шинжээч Марк Махани “Muse”-ийн хэрэглэгчдийн тоо ирэх 6-аас 12 сарын хугацаанд 100 саяд хүрнэ гэжээ.

Хиймэл оюуны бүтээгдэхүүнүүдийн эрэлт нэмэгдсэнтэй зэрэгцэн “Meta”-ийн хувьцааны ханш есдүгээр сард 25 хувиар өссөн ч сүүлийн хоёр арилжааны өдөр өсөлтийнхөө тодорхой хэсгийг алдсан байна.

“Muse for Small Business”-ийн танилцуулга “OpenAI”-ийн хөгжүүлэгчдийн арга хэмжээтэй нэг өдөр болсон нь бизнесийн зориулалттай хиймэл оюуны зах зээл дэх өрсөлдөөн эрчимжиж буй энэ үед тохиож байна. “Meta” шинэ бүтээгдэхүүнүүдээрээ “OpenAI” болон хиймэл оюун хөгжүүлэгч “Anthropic”-тай аж ахуйн нэгж, жижиг бизнесийн хэрэглэгчдийн сегментэд өрсөлдөхөөр хүрээгээ тэлж байна.