‘Нээлттэй парламент’ хакатоны 24 цагийн хөгжүүлэлтийн тэмцээн өндөрлөж, шилдэг шийдлүүд тодров

2026.09.26-нд “Нээлттэй парламент” хакатоны 24 цагийн хөгжүүлэлтийн тэмцээн хаалтаа хийж, шилдгүүдээ тодрууллаа. Хаалтын үйл ажиллагаанд Монгол Улсын Их Хурлын дарга С.Бямбацогт оролцож, танилцуулагдсан технологийн шийдлүүдийг хүлээн авч, цааш хамтран ажиллана гэдгээ илэрхийлэв. Энэ удаагийн тэмцээн нь парламентын үйл ажиллагаанд технологи, хиймэл оюуныг бодитоор шингээх боломж, гарц шийдлүүдийг нэг дороос харуулах талбар болсноороо онцлог болов.

Уг хакатоныг Монгол Улсын Их Хурлын Тамгын газар, Азийн сан, Unread Media хамтран зохион байгуулсан байна. Нийт 32 багаас шалгарсан 10 баг 24 цагийн хугацаанд боловсруулсан хиймэл оюун болон технологийн шийдлээ танилцуулан өрсөлдөв. Шалгарсан багуудын шийдлүүдийг парламент нээлттэйгээр хүлээн авч, цаашдын хамтын ажиллагаанд түшиглэнэ гэж зохион байгуулагч талууд онцоллоо.

Багууд Улсын Их Хурлын Тамгын газраас олон нийтэд ил болгосон, хуулийн хүрээнд ашиглах боломжтой дата, мэдээллийг хүртээмжтэй хүргэхэд төвлөрч ажилласан байна. Өөрөөр хэлбэл, иргэдийн мэдээлэл авах боломж, парламентын өгөгдөлд суурилсан үйлчилгээний чанарыг сайжруулах чиглэлд прототип, шийдлүүдийг боловсруулжээ. Энэ нь “Нээлттэй парламент” санаачилгын хүрээнд өгөгдөл, мэдээллийн нээлттэй байдлыг практикт буулгах оролдлого болж байгааг зохион байгуулагчид дурдсан байна.

Шүүлтийн бүрэлдэхүүнд Улсын Их Хурлын Тамгын газрын дэд дарга Ц.Одхүү, Азийн сангийн Засаглалийн хөтөлбөрийн захирал Г.Золжаргал, “Альфа Брэйн” ХХК-ийн захирал Т.Билгүүн нар ажиллав. Тэд багуудын танилцуулсан шийдлүүдийг үнэлж, байр эзлүүлжээ. Оролцогчдын хувьд зөвхөн бүтээгдэхүүн танилцуулахаас гадна төрийн байгууллагын бодит өгөгдөл дээр ажиллаж, хэрэглээний хувилбар гаргах нь шалгуурын чухал хэсэг болсон байна.

Тэргүүн байрт “Хуралдай” баг “Дагалдах актын хяналтын AI туслах” хөгжүүлэлтээр шалгарсан бол II байрт “Сод тод гялалзана” баг “Хөгжлийн бэрхшээл оролцоонд саад болохгүй” хөгжүүлэлтээр байр эзэллээ. Харин III байрт “Zero one” баг “Нээлттэй парламент-нээлттэй өгөгдөлд суурилсан AI туслах” хөгжүүлэлтээр шалгарсан байна. Шагналт байрт орсон багууд өргөмжлөл, мөнгөн шагналаар шагнуулсныг Улсын Их Хурлын Нээлттэй парламентын газраас мэдээлэв.

Зохион байгуулагчдын өгсөн мэдээллээр, шалгарсан шийдлүүдийг парламент нээлттэйгээр хүлээн авч, цаашдын хамтын ажиллагаанд түшиглэн ажиллах чиг баримжаатай байна. Ингэснээр төрийн өгөгдлийн хүртээмжийг сайжруулах, парламентын мэдээлэл, үйлчилгээний хэрэглээнд технологийн шийдлүүдийг шат дараатай нэвтрүүлэх суурь боломж бүрдэх хүлээлттэй байна. Хакатоны хаалтын арга хэмжээ ийнхүү шилдгүүдээ зарласнаар өндөрлөжээ.