Өглөөний ганцхан асуулт хосуудын үл ойлголцлыг бууруулна

Өглөөг богино хэлбэрийн яриагаар эхлүүлдэг хосын хэдхэн минутын харилцаа тухайн өдрийг хэрхэн үргэлжлэхийг тодорхойлдог тул сэтгэлзүйч Марк Траверс яриандаа нэг ч атугай асуулт нэмэхийг зөвлөж байна. Өглөөний 10 минутын яриа ихэвчлэн хэн, хэзээ, хаашаа явах болон юу амжуулах зэрэг өдөр тутмын яриагаар өрнөдөг. Харин энэ ярианы дундуур өөр сэдвээр яриа өрнүүлэх буюу “нөөц чадавхын шалгалт” нь үл ойлголцлыг эрт тасалж, маргалдах орон зайг хумидаг аж.

Өөрөөр хэлбэл, “нөөц чадавхын шалгалт” гэдэг нь тухайн өдөр хэр их эрч хүчтэй, ямар хэмжээний нөөц боломжтой байгаагаа тоогоор илэрхийлэх, эсвэл өдрийг “хөнгөн”, “хүнд” гэх мэт ерөнхий үнэлгээгээр тодорхойлохыг хэлж байгаа юм.

Энэхүү богино “шалгалт”-ын гол зорилго нь хосууд өдрийн эрч хүч, боломжит нөөцөө урьдчилан ил тод болгоход оршино.

Траверсийн тайлбарласнаар “Яаж байна?” гэсэн энгийн асуултад хариултаа цэгцлэн хэлэх цаг өглөө бүр хүмүүст байдаггүй. Тиймээс хүмүүс өөрсдийн байдлыг ихэвчлэн “зүгээр” гэсэн товч хариултаар илэрхийлдэг байна.

Харин өдрийн эрч хүчээ тоогоор үнэлэхэд хүмүүс “40” эсвэл “80” гэх мэтээр хурдан, тодорхой хариулж чаддаг гэж Траверс онцоллоо. Гэсэн ч өглөөний 7:40 цагт “Яаж байна?” гэж асуухад “Зүгээр” гэж хариулах нь түгээмэл. Гаднаас нь хэвийн мэт сонсогдох энэ хариултын цаана бодит ачаалал нуугдсанаар өдрийн явцад буруу таамагт суурилсан хүлээлт үүсэх эрсдэл нэмэгддэг.

Хамтрагч нь өөрийн чадавхыг “40” гэж үнэлсэн тохиолдолд тухайн өдрийн жижиг шийдвэрүүд илүү тодорхой болно. Тухайлбал, маргаан өдөөж болзошгүй сэдвийг хойшлуулах эсвэл оройн хоолыг хосуудын хэн нэг нь хариуцах зэргээр зохицуулалт хийх боломжтой гэж Траверс тайлбарлав.

Өөрөөр хэлбэл, “Өнөөдрийг чадлынхаа хэрээр өнгөрүүлнэ” гэсэн мэдээллийг урьдчилан солилцох тусам үүргийн хуваарилалт бодит нөхцөлд нийцэж, бухимдал хуримтлагдах магадлал буурна. Харин дотоод байдал нь тодорхойгүй үед хамтрагчийнхаа ядаргааг хөндийрч байна хэмээн ойлгож, товч хариултыг шүүмжлэл гэж буруу тайлбарласнаар маргаан үүсэх эрсдэл нэмэгддэг.

Траверсийн үзэж буйгаар гол асуудал нь хамтрагчдын аль нэг нь сэтгэл дундуур байгаа эсэхэд бус, харин тэд “хаанаас эхэлж ойлголцохоо” мэдэхгүй байгаад асуудал оршдог. Иймээс “чадавхын шалгалт”-ыг бодитоор хэрэгжүүлэхэд гурван дүрэм баримтлахыг тэрбээр санал болгож байна.

Нэгдүгээрт, асуулт тавьж буй хүн эхлээд өөрийн үнэлгээг хэлэх хэрэгтэй. Өөрийн чадавхыг түрүүлж илэрхийлснээр ярианы өнгийг тогтоож, хамтрагчдаа “үнэнийг хэлэхэд аюулгүй” гэсэн дохио өгнө.

Хоёрдугаарт, “бага үнэлгээ”-г маргалдалгүй хүлээн авах шаардлагатай. “Яагаад тэгж байгаа юм?” гэж шахаж, хариултыг өөрчлөхийг оролдохын оронд тухайн өдрийн бодит байдлыг байгаа чигээр нь зөвшөөрөх хэрэгтэй гэж Траверс зөвлөжээ.

Гуравдугаарт, сонссон мэдээлэлдээ тулгуурлан жижиг боловч бодит өөрчлөлт хийх шаардлагатай. Хамтрагчийнхаа байдлыг ойлгож байгаа мэтээр хязгаарлахгүй, тухайн өдрийн ачааллыг бодитоор багасгах алхам хийх нь “чадавхын шалгалт”-ын үндсэн зорилго юм.

Хэрэв өгсөн хариултыг “засах асуудал” болгон хувиргавал хүмүүс бодит байдлаа үнэнээр хэлэхээ больдог гэж Траверс анхаарууллаа. Тиймээс хамтрагчийнхаа үнэлгээг хэлсэн утгаар нь хүлээн авч, түүнд нийцүүлэн хүлээлтээ тохируулах нь илүү үр дүнтэй. Зөвхөн асуугаад орхихыг “шалгалт” гэж үзэхгүй, сонссон мэдээлэлдээ үндэслэн өдөр тутмын ачааллыг багасгах бодит үйлдэл хийх ёстойг Траверс онцолжээ. Өглөөнөөс эхлэн хосууд ямар “чадамжаар” өдрөө эхлүүлж байгаагаа мэддэг байх нь жижиг зүйл дээр бие биеэ буруу ойлгох давтамжийг бууруулна.