Өмнөд Солонгос болон Төв Азийн таван улс ирэх 30 жилийн хамтын ажиллагааны замын зураглалаа тунхаглалаа

Өмнөд Солонгос болон Казахстан, Узбекистан, Кыргызстан, Туркменистан, Тажикистаны төрийн тэргүүнүүд Сөүл хотноо болсон анхны олон талт дээд хэмжээний уулзалтаар “Сөүлийн тунхаглал”-ыг баталж, талуудын дараагийн 30 жилийн хамтын ажиллагааны чиглэлийг тодорхойллоо. Есдүгээр сарын 16-нд болсон уулзалт нь 2007 онд эхэлсэн Солонгос-Төв Азийн хамтын ажиллагааг анх удаа төрийн тэргүүний түвшинд хүргэсэн үйл явдал болов.

“Сөүлийн тунхаглал”-д түншлэлийг институцчлэх, энх тайван ба тогтвортой байдлын төлөө хамтран ажиллах, инновац ба хөгжил цэцэглэлтийг дэмжих, иргэд болон харилцан итгэлцэлд тулгуурласан холбоог бэхжүүлэх гэсэн дөрвөн үндсэн чиглэлийг тусгажээ. Үүний хүрээнд нийлүүлэлтийн сүлжээ, стратегийн ач холбогдолтой ашигт малтмал, эрчим хүч, худалдаа, хөрөнгө оруулалт, шинэ технологи болон аюулгүй байдлын хамтын ажиллагааг өргөжүүлэхээр тохиролцсон байна.

Мөн талууд дээд хэмжээний уулзалтыг хоёр жил тутам зохион байгуулахаар болж, Казахстан 2028 онд Астана хотод дараагийн уулзалтыг хүлээн авахаар болов. Ингэснээр өмнө нь форум болон сайд нарын түвшинд голлон хэрэгжиж байсан хамтын ажиллагааг тогтмол төрийн тэргүүний түвшний механизм болгон өргөжүүлж байна.

Түүхий эдээс нэмүү өртгийн сүлжээ рүү

Эдийн засгийн хамтын ажиллагааны гол чиглэлийн нэг нь Төв Азийн байгалийн нөөцийг Өмнөд Солонгосын үйлдвэрлэл, технологийн чадавхтай хослуулах төлөвлөгөө юм.

Өмнөд Солонгосын Ерөнхийлөгч И Жэ Мён Төв Азийн орнуудтай хамтын ажиллагааг тус тусын төсөл, дэд бүтцийн бүтээн байгуулалтаар хязгаарлах бус, үйлдвэрлэлийн чадавх болон нэмүү өртгийн сүлжээг хамтран хөгжүүлэх түвшинд хүргэх шаардлагатайг онцолжээ. Ялангуяа цахилгаан автомашин, батарей, хагас дамжуулагчийн үйлдвэрлэлд шаардлагатай стратегийн ашигт малтмалын нийлүүлэлтийн сүлжээ чухал байр суурь эзэлж байна.

Талууд аж үйлдвэр, нийлүүлэлтийн сүлжээний хамтын ажиллагааны санамж бичиг байгуулж, Солонгос-Төв Азийн аж үйлдвэрийн сайд нарын зөвлөлдөх механизм шинээр байгуулахаар болов. Үүний зэрэгцээ газрын тос, байгалийн хий, нефть-химийн үйлдвэрлэл, эрчим хүчний дэд бүтэц, хиймэл оюун, цахим шилжилт, шинжлэх ухаан, технологи, уур амьсгал болон усны нөөцийн чиглэлээр хамтын ажиллагаагаа өргөжүүлэхээр тохиролцжээ.

И Жэ Мён “Шинэ Торгоны зам” санал болгов

Дээд хэмжээний уулзалтын дараа болсон Солонгос-Төв Азийн бизнесийн уулзалтаар И Жэ Мён хоёр бүс нутгийн эдийн засгийн харилцааг өргөжүүлэх “Шинэ Торгоны зам” үзэл баримтлалыг танилцууллаа.

Өнөөгийн худалдаа Өмнөд Солонгосоос автомашин, сэлбэг нийлүүлэх, харин Төв Азиас эрчим хүч болон түүхий эд импортлох чиглэлд төвлөрч буйг тэрээр онцолсон байна. Цаашид хэрэглээний бүтээгдэхүүн, биотехнологи, дижитал салбар зэрэг шинэ чиглэлд худалдааг төрөлжүүлэх зорилт тавьжээ.

Худалдаанд тулгардаг татварын бус саадыг бууруулахын тулд Өмнөд Солонгос дижитал гаалийн систем нэвтрүүлэхэд дэмжлэг үзүүлэхээс гадна Төв Азийн таван улсад Солонгосын компаниудад зориулсан “Korea Desk” нэгж байгуулахаар төлөвлөж байна. Мөн тус улсын бизнесийн төлөөлөгчдийг бүс нутаг руу илгээж, компаниудын зах зээлд нэвтрэх боломжийг нэмэгдүүлэхээр болжээ.

Ингэснээр “Сөүлийн тунхаглал”-ын эдийн засгийн гол зорилго нь Төв Азийг зөвхөн түүхий эд нийлүүлэгч, Өмнөд Солонгосыг эцсийн бүтээгдэхүүн экспортлогч гэсэн уламжлалт бүтэцтэй үлдээх бус, хайгуул, олборлолтоос эхлээд боловсруулалт, материал үйлдвэрлэл, эцсийн бүтээгдэхүүн хүртэлх хамтарсан нэмүү өртгийн сүлжээг хөгжүүлэхэд чиглэж байна.

Дараагийн дээд хэмжээний уулзалт 2028 онд Астана хотод болохоор товлогдсон тул ойрын хоёр жилд “Сөүлийн тунхаглал”-д тусгасан зорилтууд бодит төсөл, худалдаа, хөрөнгө оруулалтад хэр хэмжээнд шилжих нь хамтын ажиллагааны дараагийн үе шатыг тодорхойлох гол үзүүлэлт болохоор байна.