“Shein”-ийн хямд үнийн давуу тал хумигдсанаар хөрөнгө оруулагчид өсөлтийн шинэ хөдөлгүүр нэхэж байна

Сингапурт төвтэй түргэн загварын “Shein” компанийн хувьцааны ханш Хонконгийн биржид дебют хийснээс хойш дөрөв дэх өдрөө дараалан буурлаа. АНУ болон Европт бага дүнтэй импортод олгодог татвар, гаалийн хөнгөлөлт хумигдаж эхэлсэн нь компанийн олон жилийн турш өсөлтөө тэтгэж ирсэн хямд өртгийн бизнесийн загварыг сорьж байна.

“Shein” 2025 онд 41.8 тэрбум ам.долларын орлого олсон ч энэ оны нэгдүгээр улиралд 99 сая ам.долларын алдагдал хүлээжээ. АНУ, Европ компанийн гол зах зээл хэвээр байгаа үед импортын зардал нэмэгдэх нь барааны хямд үнийг хадгалах боломжийг хязгаарлаж, хөрөнгө оруулагчдын анхаарлыг өсөлтийн дараагийн хөдөлгүүр рүү шилжүүлж байна.

Хямд импортын үе хумигдаж байна

АНУ 2025 оны тавдугаар сард БНХАУ болон Хонконгоос ирэх бага дүнтэй илгээмжийг гаалийн татваргүй нэвтрүүлдэг “de minimis” журмыг цуцалсан. “Shein” бараагаа хэрэглэгчдэд олон жижиг илгээмжээр шууд хүргэдэг тул уг өөрчлөлт компанийн хямд өртгийн загварт шууд нөлөөлж байна.

Онлайн хөрөнгө оруулалтын “eToro” платформын зах зээлийн шинжээч Жош Гилбертийн үзэж буйгаар “Shein” өсөлтөө үргэлжлүүлэх боломжтой гэдгээ хөрөнгө оруулагчдад дахин батлах шаардлагатай болжээ.

Тэрээр АНУ болон Европ компанийн гол зах зээл хэвээр байгаа ч өсөлтийн хамгийн хялбар үе ард үлдсэнийг онцолсон байна. Өмнө нь таван ам.долларын даашинзыг дэлхийн нөгөө талаас маш бага зардлаар хэрэглэгчид хүргэх боломж “Shein”-ийн томоохон давуу тал байсан бол татвар, гаалийн шинэ нөхцөл уг загварын өртгийг нэмэгдүүлж эхэлжээ.

Европын Холбоо ч долдугаар сараас 150 евро хүртэлх бага дүнтэй импортод үйлчилдэг гаалийн татварын чөлөөлөлтийг зогсоож, бараа тус бүрд түр хугацаанд гурван еврогийн татвар ногдуулсан. Европын Комиссийн мэдээллээр 2025 онд Европын Холбоонд 5.9 тэрбум бага дүнтэй бараа импортолсон байна.

Шинэ татвар болон тээвэрлэлтийн зардал нийлснээр импортын барааны эцсийн үнэ өсөх боломжтой бөгөөд “Shein”-ийн өрсөлдөөний гол давуу тал болсон хямд үнийг хадгалах өртөг нэмэгдэж байна.

“Хямд” гэдгээс өөр давуу тал хэрэгтэй

“Shein”-ийн сорилт зөвхөн татвар, гаалийн өөрчлөлтөөр хязгаарлагдахгүй. Жижиг хэмжээгээр үйлдвэрлэж, хэрэглэгчийн эрэлтэд тулгуурлан бараагаа богино хугацаанд шинэчилдэг нийлүүлэлтийн сүлжээг технологитой холбосон загвар нь компанийн давуу тал хэвээр байгаа ч өрсөлдөгчид ижил арга барилыг улам хурдан нэвтрүүлж байна.

Жижиглэн худалдааны зөвлөх “Retail Cities”-ийн гүйцэтгэх захирал Брайан Гилденбергийн хэлснээр “Shein”-ийн бодит цагийн эрэлтэд тулгуурласан үйлдвэрлэлийн тогтолцоо өрсөлдөх чадварыг нь хадгалж байгаа ч дижитал түргэн загварын бусад компани технологийн хувьд ойртсоор байна.

Зах зээлийн судалгааны “Euromonitor International”-ийн дэлхийн хэрэглэгчийн чиг хандлага хариуцсан ахлах менежер Маргерит ЛеРолланд ч “Shein” үнэ болон бараагаа тасралтгүй шинэчлэх стратегиас цааш хэрэглэгчдэд ямар үнэ цэн санал болгохоо тодорхойлох шаардлагатай гэж үзжээ.

Ингэснээр компанийн дараагийн өсөлтийн үе зөвхөн хамгийн хямд бараа санал болгохоос илүү үйлчилгээ, барааны сонголт, нийлүүлэлтийн сүлжээний үр ашиг болон хэрэглэгчдийг тогтоон барих чадвараас хамаарах төлөвтэй байна. Хямд импортын давуу тал хумигдаж буй үед хөрөнгө оруулагчдын хувьд гол асуулт нь “Shein” нэмэгдэж буй зардлаа хэрхэн зохицуулж, өсөлтийн шинэ хөдөлгүүр бий болгох вэ гэдэгт төвлөрч байна.