“Starbucks”-ийн сэргэн мандалтад бооцоо тавих арай эрт байна

АНУ-ын кофе шопын сүлжээ “Starbucks” компанийн гүйцэтгэх захирал Брайан Никколын удирдлага дор дэлгүүр доторх үйлчилгээ, хэрэглэгчийн туршлагыг сэргээхэд төвлөрч, шинэчлэлийн хөтөлбөрөөс эхний эерэг үр дүнгүүд гарч эхэлжээ. Гэхдээ үйл ажиллагааны сэргэлт хувьцааны ханшийг тогтвортой өсгөхөд хангалттай эсэх нь хөрөнгө оруулагчдын гол асуулт хэвээр байна.

“Starbucks”-ийн хувьцааны ханш энэ онд 12 орчим хувиар өссөн ч сүүлийн таван жилийн өгөөж сул, өмнөх оргил түвшнөөсөө доогуур хэвээр байна.

Өндөр үнэлгээ өсөлтийн босгыг нэмэгдүүлэв

Зах зээлийн дундаж таамгаар “Starbucks”-ийн тохируулсан нэгж хувьцаанд ногдох ашиг буюу EPS 3.12 ам.доллар орчим байх төлөвтэй. Үүнд үндэслэвэл хувьцаа ирээдүйн ашгийнхаа ойролцоогоор 30 орчим хувийн өндөр үнэлгээгээр арилжаалагдаж байна.

Мөн компанийн өр төлбөрийг тооцсон бизнесийн үнэлгээ нь ирэх 12 сарын хүлээгдэж буй EBITDA буюу хүү, татвар, элэгдэл, хорогдлын өмнөх ашгийн 17.6 дахин өндөр түвшинд байгаа аж. Салбарын дундаж үзүүлэлт ойролцоогоор 12 дахин байгаа нь “Starbucks”-ийн хувьд зах зээлийн хүлээлт харьцангуй өндөр байгааг харуулжээ.

Ийм үнэлгээтэй үед шинэчлэлийн хөтөлбөрөөс гарах сайн мэдээ ханшид эерэг нөлөөлөх боломжтой ч хөрөнгө оруулагчид өсөлтийн хурд, ашигт ажиллагааны бодит сайжралтад илүү өндөр шаардлага тавих нөхцөл бүрджээ.

Компанийн санхүүгийн уян хатан байдлыг нэмэгдүүлсэн өөр нэг алхам нь Хятад дахь жижиглэнгийн үйл ажиллагааныхаа 60 хувийг салгах хэлцлийг дөрөвдүгээр сард дуусгасан явдал байв. Тус хэлцэл “Starbucks”-т үндсэн зах зээл болон үйл ажиллагааны шинэчлэлдээ илүү төвлөрөх, капиталаа өөр чиглэлд хуваарилах боломж нэмжээ.

Гэсэн хэдий ч хөрөнгө оруулагчдын хувьд “Starbucks”-ийн үйл ажиллагаа сайжирч байгаа эсэхээс гадна уг сэргэлт өнөөгийн өндөр үнэлгээг зөвтгөхүйц хурдтай үргэлжлэх үү гэдэг нь илүү чухал болж байна.

Опционы өндөр шимтгэлээс орлого олох хувилбар

“Starbucks”-ийн хувьцааны опционы үнэ харьцангуй өндөр тогтож, түүнийг зарж шимтгэл авах боломж нэмэгджээ.

Тус компанийн арваннэгдүгээр сард дуусах 85 ам.долларын үнэ бүхий put болон 105 ам.долларын хэрэгжүүлэх үнэтэй call опционыг зэрэг зарж, нэгж хувьцаанд 2.25 ам.долларын цэвэр шимтгэл авах боломжтой гэж тооцсон байна.

Хувьцааны ханш опционы хугацаа дуусах хүртэл 85-аас 105 ам.долларын хооронд хадгалагдвал хоёр опцион хоёулаа хэрэгжихгүй дуусч, авсан шимтгэл хөрөнгө оруулагчийн орлого болж үлдэнэ. Тооцооллоор уг стратегийн өгөөжийг жилийн дүнд шилжүүлбэл ойролцоогоор 16 хувьтай тэнцэнэ.

“Starbucks”-ийн хувьцааны ханш хүчтэй савлавал алдагдал хурдтай нэмэгдэнэ.

Санал болгосон хувилбарын дээд талын алдагдалгүй цэг 107.25 ам.доллар, доод талынх нь 82.75 ам.доллар байна. Ханш 107.25 ам.доллароос дээш гарвал call опционы эрсдэл нэмэгдэх бол 82.75 ам.доллароос доошилбол put опцион хэрэгжиж, хөрөнгө оруулагч хувьцааг худалдан авах үүрэг хүлээх юм.