Сурагчдын “Үдийн хоол”-ны өртөг 7000-8000 төгрөг болж нэмэгджээ

Ерөнхий боловсролын сургуулийн сурагчдын “Үдийн хоол” хөтөлбөрийн нэг хүүхдэд ногдох өртөг энэ хичээлийн жилд 7000-аас 8000 төгрөг болж нэмэгджээ.Хоолны санхүүжилтийг нэмэгдүүлэхтэй зэрэгцэн 1-ээс 5 дугаар ангийн сурагчдын дунд “Сүү хөтөлбөр”-ийг хэрэгжүүлж байна.

Өртөг нэмэгдсэнтэй уялдан сурагчдын хоолны чанар, шим тэжээлээс гадна хооллох орчин, хугацааг цогцоор нь өөрчлөхөөр төлөвлөж буйгаа Боловсролын сайд Л.Энх-Амгалан онцолжээ. Тухайлбал, “Үдийн хоол”-ны хугацааг уртасгаж, сурагчид хоолны өмнө гараа угаах, хооллосны дараа шүдээ угаах, цэвэр агаарт гарах, хөдөлгөөн хийх цагийг хичээлийн хуваарьтай уялдуулах шийдлийг хэлэлцэж байгаа аж.

Одоогоор улсын хэмжээнд нэг ээлжээр хичээллэдэг 238 сургуульд үдийн хоолтой холбоотой хугацааг сунгаж, хоёр ээлжээр хичээллэдэг сургуулиудад тохирох зохицуулалт хийхээр төлөвлөж байна.

2026 онд 102.4 тэрбум төгрөг төсөвлөжээ

Төрийн өмчийн ерөнхий боловсролын сургуулийн 1-5 дугаар ангийн 222.5 мянган сурагчийг “Үдийн хоол” хөтөлбөрт хамруулахад 2026 оны улсын төсвийн төсөлд 102.4 тэрбум төгрөг төсөвлөсөн талаар албаныхан өмнө нь мэдээлсэн.

Мэргэжилтнүүдийн тооцоогоор бага ангийн сурагч сургуулийн үдийн хоолноос хоногт шаардлагатай илчлэгийнхээ 35 хувь буюу 610 килокалорийг авах ёстой. Иймд нэг хүүхдэд ногдох хоолны өртгийг нэмэгдүүлэхийн зэрэгцээ төсөв бодит хоол, шим тэжээлд хэр хэмжээгээр хүрч байгааг анхаарах шаардлага ч тулгарч байна. Эцэг эхчүүдийн зүгээс зарим сургуулийн хоолны чанар, орц найрлага болон сургуулийн удирдлагын хяналтыг сайжруулах шаардлагатайг шүүмжилсээр иржээ.

Ясгүй мах ашиглаж, хорогдлыг бууруулна

Нэмэгдсэн санхүүжилтийг хоол үйлдвэрлэлд илүү үр ашигтай зарцуулах хүрээнд сургууль, цэцэрлэгүүд ясгүй болон анхан шатаар боловсруулагдсан мах, махан бүтээгдэхүүн худалдан авахаар ажиллаж байна.

Боловсролын ерөнхий газрын хоол үйлдвэрлэл, үйлчилгээний хэлтсийн дарга Б.Энхтайваны мэдээлснээр, ястай үхрийн мах боловсруулахад 25-аас 30 хувь, хонины маханд 25-аас 35 хувийн хорогдол гардаг байна. Тухайлбал, 100 кг ястай үхрийн мах худалдан авахад ойролцоогоор 70-аас 75 кг цул мах гардаг аж.

Харин цахим дэлгүүрт нийлүүлэх хагас боловсруулсан махан бүтээгдэхүүнийг анхан шатны боловсруулалт хийсэн байдлаар нийлүүлэх тул сургуулийн гал тогоонд ийм хэмжээний хорогдол гарахгүй гэж албаныхан тооцжээ.

Нийслэлийн сургууль, цэцэрлэгүүдэд хүнсний түүхий эд нийлүүлэх 160 гаруй багцад 29 аж ахуйн нэгж шалгарсан байна. Цаашид дунд, ахлах ангийн сурагчдыг “Үдийн хоол” хөтөлбөрт хамруулахаар төлөвлөж байгаа тул бууз, банш, тефтель, бөөрөнхий мах зэрэг хагас боловсруулсан бүтээгдэхүүнийг цахим худалдан авалтын системд үе шаттайгаар нэмэхээр ажиллаж байгаа аж.

Сургуулиуд хүнсээ цахимаар худалдан авна

Боловсролын сайд Л.Энх-Амгалан өмнө нь нийслэлийн 280 сургуулийн 170 орчим нь түрээсийн гал тогоотой байсныг мэдээлж байсан. Тухайн үед нэг хүүхдийн хоолонд төсөвлөж байсан 2,500 төгрөгийн тодорхой хэсэг гал тогооны түрээс болон бусад зардалд шингэдэг байжээ.

Сургуулиуд өөрийн гал тогоотой болсноор чанах, жигнэх, хуурах зэрэг эцсийн боловсруулалтыг дотооддоо хийж, хэрчсэн гурил, цэвэрлэж бэлтгэсэн хүнсний ногоо, махан бэлдэц зэрэг хагас боловсруулсан бүтээгдэхүүнийг нийлүүлэгчдээс авах тогтолцоонд шилжиж байна.

Цаашид сургууль, цэцэрлэгүүд хүнсний худалдан авалтаа цахим дэлгүүрээр өөрсдөө хийнэ. Мөн сумын сургууль, цэцэрлэгүүд хүнсний ногоо, талх зэрэг бүтээгдэхүүнээ орон нутгийн нийлүүлэгчдээс худалдан авах боломжийг бүрдүүлэх чиглэлд худалдан авалтын зохицуулалтыг өөрчлөх юм байна.