Т.Стаут: Хятадын "Huawei" Америкийн технологийг 20 жил хулгайлсан
АНУ-ын прокурорууд Хятадын харилцаа холбоо, технологийн “Huawei” компанийг Америкийн компаниудын худалдааны нууцыг хулгайлж, дэлхийн зах зээлд давуу байдал олохыг оролдсон гэж шүүхэд мэдэгдлээ. Яллагч талын үзэж буйгаар “Huawei” 20 орчим жил АНУ-ын таван компанийн технологийг хууль бусаар олж авахын зэрэгцээ Иран дахь үйл ажиллагаагаа нуун дарагдуулж, АНУ-ын санхүүгийн системийг ашигласан байна. “Huawei”-ийн өмгөөлөгчдийг эдгээр гүтгэлгийг няцааж, компанийн өсөлт нь технологийн шинэчлэл, өрсөлдөөний үр дүн бөгөөд прокурорууд тусдаа тохиолдлуудыг нэг томоохон хуйвалдаан мэтээр тайлбарлаж байна гэж мэдэгдэв.
Хятадын харилцаа холбоо, технологийн “Huawei” компанийн эсрэг АНУ-д үүсгэсэн эрүүгийн хэргийн шүүх хурал Нью-Йоркийн Бруклин дахь холбооны шүүхэд лхагва гарагт эхэллээ. Яллагч тал тус компанийг Америкийн компаниудын технологи, худалдааны нууцыг хууль бусаар олж авч, бизнесээ тэлсэн хэмээн буруутгаж буй.
АНУ-ын Хууль зүйн яамны шүүхийн өмгөөлөгч Тейлор Стаут нээлтийн мэдэгдэлдээ “хулгай, худал мэдээлэл, нуун дарагдуулалт” хэмээн хэргийг тодорхойлжээ. Түүний хэлснээр “Huawei” 20 жилийн турш Америкийн компаниудыг хохироож, АНУ-ын санхүүгийн системийг зүй бусаар ашиглан дэлхийн харилцаа холбооны салбарт давамгай байр суурь эзлэхийг зорьсон байна.
Прокуроруудын мэдээлснээр “Huawei” АНУ-ын таван компанийн худалдааны нууцыг хулгайлахаар хуйвалдсан гэж үзэж байгаа юм. Тухайлбал, сүлжээний тоног төхөөрөмж үйлдвэрлэгч “Cisco Systems”-ийн интернет чиглүүлэгчийн үйлдлийн системийн эх код, харилцаа холбооны “T-Mobile”-ийн гар утас турших зориулалттай робот гарыг хууль бусаар олж авахыг оролдсон гэж яллагч тал мэдэгдэв.
Стаутын хэлснээр шүүх хурлын үеэр “Huawei”-ийн ажилтан технологи хулгайлахыг оролдож байхдаа баригдсан талаар гэрчүүд мэдүүлэг өгөх бөгөөд робот гар авсан үйлдлийг харуулсан дүрс бичлэгийг ч нотлох баримтаар танилцуулах аж.
“Huawei”: Хуйвалдаан бус, өрсөлдөөн байсан
“Huawei”-ийн өмгөөлөгчид яллах талын тайлбарыг няцааж, компанийн дэлхийн зах зээл дэх өсөлтийг гэмт хэргийн үр дүн мэтээр дүрслэх нь үндэслэлгүй гэж мэдэгдлээ.
Компанийн өмгөөлөгчдийн нэг Брайан Хеберлиг “Энэ хэрэг хуйвалдаан бус өрсөлдөөн, хулгай бус инновацын тухай” хэмээн шүүхэд мэдэгдэж, “Huawei” бизнесийн амжилтаа өөрийн хүчээр бий болгосон гэж тайлбарлав.
Өмгөөлөгчийн үзэж буйгаар прокурорууд олон улсын технологийн компаниудад түгээмэл тохиолддог бизнесийн үйл ажиллагаа болон тусдаа зөрчлүүдийг сонгон авч, нэг томоохон гэмт хэргийн хуйвалдааны нотолгоо мэтээр харуулахыг оролдож байна.
Тухайлбал, “Cisco Systems” болон “T-Mobile”-тэй холбоотой үйлдлүүд нь компанийн бодлого бус, тодорхой ажилтнуудын гаргасан зөрчил байсан бөгөөд удирдлага мэдээлэл авсныхаа дараа асуудлыг залруулах арга хэмжээ авсан гэж өмгөөлөгч тайлбарлав. Мөн нэг ажилтан үзэсгэлэнгийн үеэр Японы технологийн “Fujitsu” компанийн сүлжээний төхөөрөмжийн зургийг зөвшөөрөлгүй авсан тохиолдлыг хувь хүний “бодлогогүй үйлдэл” байсан хэмээн тодорхойлж, тухайн ажилтныг удалгүй халсан гэжээ.
Иран дахь бизнес шүүх хурлын гол хэсэг болно
Хэрэг зөвхөн технологийн нууцаас илүү өргөн цар хүрээг хамарч буй. Тодруулбал, прокурорууд “Huawei”-ийг Иран дахь бизнесийнхээ бодит шинж чанарыг нуун дарагдуулж, АНУ-ын хориг арга хэмжээг тойрон долларын гүйлгээ хийсэн хэмээн буруутгаж байна.
Анх 2018 онд үүсгэсэн хэрэгт “Huawei” болон тухайн үеийн санхүү хариуцсан захирал Мэн Ваньжоуг банкны залилан болон Ираны эсрэг хориг арга хэмжээг зөрчсөн хэрэгт буруутгасан. Дараагийн жилүүдэд мөрдөн шалгах ажиллагааны хүрээ тэлж, зохион байгуулалттайгаар хууль бус үйл ажиллагаа явуулж ашиг олсон гэх “racketeering” буюу гэмт үйл ажиллагааны тогтолцоотой холбоотой зүйл ангиуд нэмэгджээ.
Яллагч талын үзэж буйгаар “Huawei” Иран дахь үйл ажиллагаагаа нуун дарагдуулснаар АНУ-ын санхүүгийн системээр дамжуулан долларын гүйлгээ хийх боломж бүрдүүлсэн ба Ираны эрх баригчдад иргэдээ тагнахад тусалсан байж болзошгүй гэж прокурор мэдэгдсэн байна.
Харин өмгөөлөгчид “Huawei” долларын төлбөр тооцоо АНУ-ын хоригийн хууль зөрчинө гэдгийг мэдэж байсан гэх нотолгоо байхгүй гэж маргав. Мөн компанитай хамтран ажилласан банкууд “Huawei”-ийн Иран дахь бизнесийг мэдэж байсан атлаа тус компанийн үйл ажиллагааг өөртөө татахын төлөө өрсөлдөж байсан гэж хамгаалалтын тал тайлбарлажээ.
Гурван сар үргэлжлэх шүүх хурал
“Huawei”-ийн санхүү хариуцсан захирал Мэн Ваньжоу 2018 онд АНУ-ын баривчлах хүсэлтийн дагуу Канадын Ванкувер хотноо саатуулагдсан. Тэрбээр АНУ-д шилжүүлэн өгөх ажиллагааг гурван жил орчим эсэргүүцсэний дараа АНУ, Хятад болон Канадын хооронд байгуулсан тохиролцооны хүрээнд 2021 онд Хятад руу буцсан юм.
Мэн Ваньжоуд холбогдох хэргийг яллах ажиллагааг хойшлуулах тохиролцооны хүрээнд 2022 онд хэрэгсэхгүй болгосон. Гэхдээ тухайн тохиролцооны үеэр түүний хүлээн зөвшөөрсөн зарим баримтыг одоогийн шүүх хуралд нотлох баримтаар ашиглахаар төлөвлөжээ.
Эрүүгийн хэргийн зарим хэсэг нь “Reuters” агентлагийн 2012, 2013 оны мөрдөн сурвалжилгад тулгуурласан. Тус агентлаг “Huawei” болон Иранд үйл ажиллагаа явуулж байсан “Skycom” компанийн хооронд ойр холбоо байсныг мэдээлж байв. “Reuters”-ийн мэдээлснээр “Skycom” 2010 онд Ираны хамгийн том үүрэн холбооны операторт хоригт багтсан “Hewlett-Packard”-ийн компьютерын тоног төхөөрөмжөөс дор хаяж 1.3 сая еврогийн бараа нийлүүлэх санал тавьж байжээ.
Мэн Ваньжоу мөн 2008 оны хоёрдугаар сараас 2009 оны дөрөвдүгээр сар хүртэл “Skycom”-ийн ТУЗ-д ажиллаж байсан талаар “Reuters” өмнө нь мэдээлсэн.
“Huawei” өнөөдөр харилцаа холбооны тоног төхөөрөмж, ухаалаг гар утас болон хиймэл оюуны чипийн бизнес эрхэлж, дэлхийн олон зах зээлд үйл ажиллагаа явуулдаг. Харин АНУ-д тус компанийн сүлжээний тоног төхөөрөмжийн хэрэглээг хязгаарласан бөгөөд Америкийн бараа, технологийг “Huawei”-д нийлүүлэхэд АНУ-ын Худалдааны яамны зөвшөөрөл шаарддаг.
Олон жил үргэлжилсэн мөрдөн шалгах ажиллагааны дараа эхэлж буй шүүх хурал гурван сар орчим үргэлжлэх төлөвтэй байна.
Холбоотой мэдээ
БНСУ-ын нийт компаниудын 58 хувь нь хиймэл оюун ашиглаж байна
БНСУ-ын компаниудын хиймэл оюуны хэрэглээ нэг жилийн дотор 48 хувиас 58 хувь болж өсөж, сүүлийн 12 сард 624 мянга орчим компани шинээр нэвтрүүлжээ. Хиймэл оюун ашигладаг компаниудын 81 хувь нь бүтээмж нэмэгдсэн гэж хариулсан бол долоо хоногт дунджаар 14 цаг хэмнэж, 58 хувь нь борлуулалтаа өсгөсөн байна. Хэрэглээ эрчимтэй тэлж байгаа ч компаниудын ердөө 27 хувь нь байгууллагын хэмжээнд хэрэгжүүлэх албан ёсны хиймэл оюуны стратегитай байгаа нь дараагийн шатны гол сорилт болж байна.
Дональд Трамп хиймэл оюуны эрсдэлийг багасган тайлбарлаж, хөгжлийн хурдыг сааруулах уриалгатай зөрөв
Дональд Трамп ирландад хиймэл оюуны эрсдэлийн анхааруулгыг намжааж, өрсөлдөөнд байр сууриа хамгаалахыг чухалчлав Anthropic-ийн өмнөх судлаач ойрын ирээдүйд хүн төрөлхтөн мөхөх өндөр магадлалтай гэж BBC-д ярьжээ Салбарын дотоод маргаан гүнзгийрэхийн хэрээр зохицуулалт, хөрөнгө оруулалтын чиглэл өрсөлдөөний логикоор тогтох төлөвтэй байна
Хиймэл оюун нөхөрлөлийн орон зайг нөхөх үү, эсвэл ганцаардлыг даамжруулах уу?
Хиймэл оюунт чатботыг нөхөрлөлийн зорилгоор ашиглах нь зарим хэрэглэгчийн хувьд бодит харилцааг орлох түвшинд хүрч болзошгүй. Стэнфордын их сургуулийн "Character.AI" хэрэглэгчдийг хамарсан судалгаагаар нийгмийн хүрээлэл багатай хүмүүс чатботод түшиглэх хандлагатай байна. Чатботууд өдөр тутмын харилцаа, анхаарал халамжийн мэдрэмж өгч болох ч хүний бодит дотно харилцаа, санал зөрөлдөөн, итгэлцлийг бүрэн орлодоггүй.
Хятад улс 2030 он гэхэд өөрөө жолооддог автомашины хэрэглээг өргөн хүрээнд нэвтрүүлэх зорилт тавилаа
Хятад 2030 он гэхэд өөрөө жолоодох технологитой автомашиныг өргөн хүрээнд нэвтрүүлж, хурдны зам болон хотын зарим замд автомат жолоодлогыг ашиглахаар зорьж байна. Бээжин борлуулалтаараа дэлхийн эхний 10-т багтах хэд хэдэн Хятадын автомашин үйлдвэрлэгчийг бий болгож, дотоодын брэндүүдийн олон улсын өрсөлдөх чадварыг нэмэгдүүлэхээр төлөвлөжээ. Мөн үйлдвэрлэлийн илүүдэл хүчин чадал, хэт их хөрөнгө оруулалтыг хязгаарлаж, салбарын нэгдэл болон шударга өрсөлдөөнийг дэмжих бодлого баримтална.
Техасын шүүх “TikTok” хүүхдийн контент шүүлтийн талаар хэрэглэгчдийг төөрөгдүүлсэн гэж үзлээ
Техасын шүүх “TikTok” насанд хүрээгүй хэрэглэгчдэд зориулсан контентын шүүлтийн талаар төөрөгдүүлсэн нь хэрэглэгчийн эрхийг хамгаалах хууль зөрчсөн гэж үзлээ. Шүүхийн шийдвэрт “TikTok” дүрэм зөрчсөн зарим контентыг устгахын оронд олоход хүндрэлтэй ангилалд оруулж, платформ дээр үлдээж байсан гэж дурджээ. Хэргийг шүүх хурлаар үргэлжлүүлэн хэлэлцэж, компанид ногдуулах торгууль болон бусад арга хэмжээг тогтоохоор байна.
Шанхайн хөрөнгийн зах зээлд IPO гаргасны дараа “Enflame” компанийн хувьцааны ханш 206 хувиар өсчээ
Жижиглэнгийн хөрөнгө оруулагчдын захиалга санал болгосон хэмжээнээс 6,000 дахин давжээ. Энэ нь Хятадын дотоодын хиймэл оюуны чип үйлдвэрлэгчдэд чиглэсэн эрэлт өндөр байгааг харууллаа. Дотоодын компаниуд бүтээгдэхүүн, үйлдвэрлэл, экосистемийн түвшинд өрсөлдөх шаардлага тулгарч байна.