Уул уурхайн компаниуд хөрөнгө оруулалтаа шүүж эхэллээ: Ирээдүйн өсөлтөөс өнөөдрийн санхүүжилт илүү чухал байна

АНУ-ын Колорадо мужийн Бивер Крик хотод болсон “Precious Metals Summit”-ийн үеэр уул уурхайн компаниудын анхаарал өсөлтөөс илүүтэй санхүүжилтийн сахилга бат, төслийн өгөөж болон зах зээлийн мөчлөгийг давах чадварт төвлөрчээ. Одоогийн байдлаар алтны ханш нэгдүгээр сарын арилжааны дээд түвшний хаалтаас ойролцоогоор 18 хувиар доошилсон нь уул уурхайн компаниудын хөрөнгө оруулалт, худалдан авалт болон шинэ уурхай барих шийдвэрт өгөөжийн тооцоог улам чухал болгож байна. Чуулганд оролцсон “Elemental Royalty”, “First Majestic Silver”, “Heliostar Metals” компаниуд өөр өөр өсөлтийн төлөвлөгөө танилцуулсан ч санхүүжилтийн бүтэц, эрсдэлийн удирдлага, төслийн бодит хэрэгжилтийг хөрөнгө оруулагчдад харуулах шаардлага нийтлэг байв.

“Elemental Royalty” 290 сая ам.долларын хэлцэл хийнэ Уул уурхайн роялти болон стримингийн чиглэлээр ажилладаг “Elemental Royalty” хөрөнгө оруулалтын “Orion Mine Finance”-ийн багцыг нийт 290 сая ам.доллароор худалдан авахаар тохиролцжээ. Хэлцлийн 200 сая ам.долларыг бэлнээр, үлдсэн 90 сая ам.долларыг хувьцаагаар төлөх бөгөөд компани эргэлтийн зээлийн шугамаа 250 сая ам.доллар хүртэл нэмэгдүүлэх амлалт авсан байна. Худалдан авалтыг дөрөвдүгээр улиралд эцэслэх аж. “Elemental Royalty”-ийн гүйцэтгэх захирал Фредерик Белл шинэ багцын тусламжтайгаар компанийн жилийн олборлолттой дүйцэх хэмжээ 2031 он гэхэд одоогийн 20 мянга орчим унц алттай тэнцэх түвшнээс 50 мянган унцад хүрнэ гэж тооцоолжээ. Тэрбээр компани 10 сая ам.долларын хэмжээтэй хэлцлүүдээ үргэлжлүүлэхийн зэрэгцээ 290 сая ам.долларын томоохон худалдан авалт хийх санхүүгийн чадавхтай болсныг онцолсон байна.

“First Majestic Silver”: Өсөлтөөс илүү санхүүгийн сахилга бат чухал Мөнгө олборлогч “First Majestic Silver”-ийн хувьд удирдлагын залгамж халаа болон санхүүжилтийн сахилга бат гол сэдэв болов. Компанийн Ерөнхийлөгч Мани Алхафажи өөрийн дэвшил нь удирдлагын залгамж халааг төлөвлөх үйл явцын нэг хэсэг гэдгийг хэлсэн ч гүйцэтгэх захирал Кит Ноймайерын залгамжлагч гэж өөрийгөө тодорхойлохоос татгалзжээ. “Бид зүгээр л томрохыг хүсэхгүй. Энэ бол манай алсын хараа биш” гэж Алхафажи хэлсэн байна. “First Majestic Silver” компани арванхоёрдугаар сард 2031 онд хугацаа нь дуусах, жилийн 0.125 хувийн хүүтэй хөрвөх бондоор 350 сая ам.доллар татан төвлөрүүлжээ. Бондын анхны хөрвүүлэх үнэ нэгж хувьцаанд ойролцоогоор 22.36 ам.доллар байсан бөгөөд татсан хөрөнгийн нэг хэсгийг өмнөх өрөө бууруулахад зарцуулж, үлдсэнийг нь боломжит хэлцэл болон компанийн бусад зорилгод хадгалсан байна.

“Heliostar Metals” 2028 оноос өмнө алт олборлох зорилт тавив Алтны төсөл хөгжүүлэгч “Heliostar Metals” шинэ уурхай барих төлөвлөгөөндөө тодорхой хугацаа тогтоожээ. Тус компани 2027 оны хоёрдугаар улиралд техник, эдийн засгийн үндэслэлээ дуусгаж, тухайн оны дундуур уурхайн барилгын хөрөнгө оруулалтын эцсийн шийдвэр гаргахаар төлөвлөсөн байна. Улмаар 2028 он дуусахаас өмнө алт олборлох зорилт тавьжээ. Төлөвлөгөөг хэрэгжүүлэхийн тулд шинэчилсэн далд уурхайн үйл ажиллагааны зөвшөөрөл авч, барилгын санхүүжилтийн багцаа бүрдүүлэх шаардлагатай аж. Санхүүжилтээ “La Colorada”, “San Agustin” төслүүдийн мөнгөн урсгал болон шинээр татах өрийн эх үүсвэрт тулгуурлан бүрдүүлж, нэмэлт хувьцаа гаргах хэрэгцээг багасгахаар төлөвлөжээ.