ЖДҮХС-ийн ₮195.5 тэрбумын авлагын талаас илүү хувь нь хэвийн бус ангилалд оржээ

Хүнс, хөдөө аж ахуй, хөнгөн үйлдвэрийн салбарт 2008 оноос хойш олгосон төрийн дэмжлэг, урамшуулал болон Засгийн газрын хариуцан төлсөн зээлийн хүүгийн татаасын хэрэгжилтийг Төрийн ордонд болж буй ерөнхий хяналтын сонсголоор хэлэлцэж байна.

Сонсголын үеэр “Жижиг, дунд үйлдвэрийг хөгжүүлэх сан” (ЖДҮХС)-гаас олгосон зээлийн хоёр төгрөг тутмын нэг төгрөгийг хэвийн бус төлж байгааг шинжээч танилцууллаа. Зээлийн эргэн төлөлт саатсанаар сангийн эх үүсвэр авлага хэлбэрээр түгжигдэж, иргэн, аж ахуйн нэгжүүдэд дахин санхүүжилт олгох боломж хязгаарлагдаж буйг мэдээлэв.

ЖДҮХС 2009 оноос хойш иргэн, аж ахуйн нэгжүүдэд нийт 267.2 тэрбум төгрөгийн зээлийг хүүгийн хөнгөлөлттэй нөхцөлөөр олгожээ. Эргэн төлөгдсөн хөрөнгийг дахин зээл болгон олгох зарчимтай ч авлагын чанар муудсан нь санхүүжилтийн эргэлтийг сааруулж байгаа аж.

Тус сангийн өнгөрсөн оны арванхоёрдугаар сарын 31-ний өдрийн санхүүгийн тайланд 195.5 тэрбум төгрөгийн авлага бүртгэгдсэний 51.4 хувь нь хугацаа хэтэрсэн, хэвийн бус, эргэлзээтэй болон муу зээлийн ангилалд шилжжээ.

Үндэсний аудитын газрын шалгалтаар ЖДҮХС-ийн зээлийн эргэн төлөлт болон авлагын данстай холбоотой нийт 484.4 тэрбум төгрөгийн зөрчил сүүлийн 10 жилийн хугацаанд илэрсэн гэж шинжээч мэдээллээ.

Тус сангийн санхүүгийн тайланд 2019 онд зөрчилгүй дүгнэлт өгсөн бол 2017 онд сөрөг дүгнэлт гаргаж, 2018 онд Аудитын байгууллага дүгнэлт өгөхөөс татгалзсан байна. Бусад жилд хязгаарлалттай дүгнэлт өгч байжээ.

Сонсголоор танилцуулсан мэдээллээс үзэхэд ЖДҮХС-ийн зээлийн эргэн төлөлтийг сайжруулах, хугацаа хэтэрсэн авлагыг барагдуулах нь сангийн хөрөнгийг дахин эргэлтэд оруулахад гол ач холбогдолтой байна.