Хятадын аж үйлдвэрийн ашиг наймдугаар сард өмнөх оны мөн үеэс 4.2 хувиар өсчээ

Хятадын томоохон аж үйлдвэрийн компаниудын ашиг наймдугаар сард өмнөх оны мөн үеэс 4.2 хувиар өссөн талаар тус улсын Үндэсний статистикийн товчоо даваа гарагт мэдээллээ. Гэсэн хэдий ч ашиг нэмэгдсэн ч дотоодын хэрэглээ сул, эрчим хүчний зардал өссөн нөхцөлд аж үйлдвэрийн салбарын сэргэлт жигд бус байна.

Оны эхний найман сарын байдлаар аж үйлдвэрийн компаниудын ашиг жилийн өмнөхөөс 15.7 хувиар өсчээ. Харин эхний долоон сарын өсөлт 17.6 хувь байсан бөгөөд дөрөвдүгээр сард 24.7 хувьд хүрснээс хойш өсөлтийн хурд дөрөв дэх сардаа дараалан саарсан үзүүлэлт болов. Үндэсний статистикийн товчооны өмнөх мэдээллээр эхний долоон сарын нийт ашиг 4.58 их наяд юаньд хүрсэн байв.

Гэхдээ аж үйлдвэрийн компаниудын ашиг 2025 онтой харьцуулахад мэдэгдэхүйц сэргэжээ. Тодруулбал, өнгөрсөн онд ашиг ердөө 0.6 хувиар нэмэгдэж, гурван жил дараалан буурсны дараах анхны өсөлтөө үзүүлсэн бол 2026 онд хоёр оронтой хувиар тэлсэн байна.

Хиймэл оюуны эрэлт электроникийн салбарын өсөлт голлон нөлөөлжээ Ашгийн өсөлтөд хиймэл оюунтай холбоотой чип, компьютер болон бусад тооцоолох төхөөрөмжийн эрэлт нэмэгдсэн голлон нөлөөлж байна. Компьютер, харилцаа холбоо болон электрон төхөөрөмжийн үйлдвэрлэлийн ашиг эхний найман сард өмнөх оны мөн үеэс 110 хувиар өсчээ.

Уг салбарын үйлдвэрлэл ч эрчимтэй тэлж байгаа нь статистик тоон үзүүлэлтээс харагдаж байна. Тодруулбал, компьютер, харилцаа холбоо болон электрон төхөөрөмжийн үйлдвэрлэлийн нэмүү өртөг наймдугаар сард өмнөх оны мөн үеэс 17.2 хувиар өссөн бол өндөр технологийн үйлдвэрлэл нийтдээ 16.7 хувиар нэмэгдсэн байна.

Харин автомашины үйлдвэрлэлийн ашиг эхний найман сард 16 хувиар буурчээ. Үйлдвэрлэгчид зах зээлд эзлэх байр сууриа хадгалахын тулд үнийн өрсөлдөөнөө эрчимжүүлсэн нь борлуулалт нэмэгдсэн ч ашигт ажиллагааг хумих хүчин зүйл болж байна.

Дотоодын эрэлт сул хэвээр Хятадын эдийн засгийн өсөлт хоёрдугаар улиралд сүүлийн гурав гаруй жилийн доод түвшинд хүрсэн бөгөөд хэрэглээний эрэлт сэргэлтэд сөргөөр нөлөөлж буй. Хэдийгээр наймдугаар сард жижиглэн худалдааны өсөлт саарч, хот суурин газрын хөрөнгө оруулалт буурсан ч экспорт аж үйлдвэрийн үйлдвэрлэлд эерэг нөлөө үзүүлжээ.

Үүний зэрэгцээ үйлдвэрлэлийн худалдан авалтын менежерийн индекс буюу PMI наймдугаар сард 49.8 нэгжид хүрсэн нь салбарын идэвхжил агшилтын бүсэд хэвээр байгааг харуулж байна. Харин томоохон аж үйлдвэрийн компаниудын үйлдвэрлэлийн нэмүү өртөг тухайн сард 5.2 хувиар өсч, өмнөх сараас 0.7 нэгж хувиар хурдасчээ.

Эдийн засагчид эрэлт сул, үнийн өрсөлдөөн ширүүссэн салбаруудад компаниуд нэгдэх, зах зээлээс гарах үйл явц хурдасч байгаа тул Бээжин компаниудын ашигт ажиллагааг тогтворжуулахад чиглэсэн эдийн засгийн дэмжлэгээ нэмэгдүүлж магадгүй гэж үзэж байна.