Арваннэгдүгээр сараас хагас коксон түлшийг шуудай тутамд ₮5,000-өөр борлуулж эхэлнэ

Нийслэлийн гэр хорооллын айл өрхүүдэд зориулсан шахмал түлшний борлуулалт есдүгээр сарын 15-наас эхэлж, хотын хэмжээнд 446 цэгээр худалдаалж байна. Иргэд “Хотула” аппликэйшн ашиглан нэг шуудай түлшийг 3,750 төгрөгөөр худалдан авах боломжтой.

Энэ жилийн шахмал түлшийг уул уурхайн “Эрдэнэс Тавантолгой” ХК-ийн угааж баяжуулсан эрчим хүчний нүүрсээр үйлдвэрлэжээ.

Харин иргэдийн зүгээс хэрэглэгч олноор хандах үед “Хотула” аппликэйшний ажиллагаа удаашрах, мөн өвлийн хэрэгцээгээ урьдчилан базаахын тулд тогтоосон хэмжээнээс олон шуудай түлш авах хүсэлт гаргаж байгааг уламжилсан байна.

Шахмал түлш үйлдвэрлэгч “Тавантолгой түлш” ХХК-ийн удирдлага хангамжийн нөхцөлөөс шалтгаалан нэг өрхөд олгох түлшний хэмжээг одоогоор долоон шуудайгаар хязгаарлаж буйг тайлбарлав.

Тус удирдлагын зүгээс түлшний жин дутуу байх эрсдэлийг бууруулахын тулд үйлдвэр дээр нэг шуудай түлшний жинг 25.5 килограммаар тохируулсныг мөн мэдээлжээ.

Нийслэлд түр оршин суудаг иргэд шахмал түлш худалдан авахын тулд оршин суугаа хороондоо бүртгүүлэх шаардлагатай. Бүртгэл баталгаажсаны дараа “Хотула” аппликэйшнээр түлш авах эрх нээгдэнэ.

Үүний зэрэгцээ нийслэл хагас коксон түлшийг арваннэгдүгээр сарын 1-нээс худалдаанд гаргахаар төлөвлөж байна. Урьдчилсан төлөвлөгөөгөөр нэг шуудай хагас коксон түлш 5,000 төгрөгийн үнэтэй байх юм.