Бразил чухал ашигт малтмалын салбар дахь гадаад хэлцлийн хяналтаа чангатгана

Бразилийн Сенат чухал болон стратегийн ашигт малтмалын үндэсний бодлого байгуулах хуулийн төслийг баталж, газрын ховор элемент зэрэг стратегийн түүхий эдийн салбарт гадаадын хөрөнгө оруулалт татахын зэрэгцээ өмчлөл, нийлүүлэлтийн сүлжээнд тавих хяналтаа чангатгах алхам хийлээ. Хуулийн төсөл хэрэгжиж эхлэхийн өмнө Ерөнхийлөгч Луис Инасиу Лула да Силва батламжлах шаардлагатай юм. Шинэ зохицуулалтаар Бразилийн Ерөнхийлөгчийн Тамгын газартай холбоотой зөвлөл байгуулж, чухал болон стратегийн ангилалд багтсан ашигт малтмалын эрх эзэмшигч компанийн хяналт өөрчлөгдөх хэлцлийг шалгах эрх олгохоор тусгажээ. Мөн экспортод техникийн шаардлага тавих, дотоодод нэмүү өртөг шингээхтэй холбоотой үүрэг ногдуулах боломжийг нээлттэй үлдээсэн байна. Компаниудаас экспортын чиглэл, эцсийн хүлээн авагч болон бүтээгдэхүүний боловсруулалтын түвшний мэдээллийг ил болгох шаардлага ч тавьж болохоор байгаа юм. Харин ямар хэлцэл шалгалтад хамрагдах, хяналтын механизм хэрхэн ажиллах зэрэг гол асуудлыг хуулийн дараах нарийвчилсан зохицуулалтаар шийдвэрлэнэ. Иймээс дүрэм тодорхой болох хүртэл зарим хөрөнгө оруулалтын хэлцэл, санхүүжилтийн шийдвэр хүлээгдэж болзошгүй байна.

$2.8 тэрбумын хэлцэл Бодлого тодорхойлогчдын зүгээс ийм шийдвэр гаргахад АНУ-ын газрын ховор элементийн “USA Rare Earth” компани Бразилын томоохон үйлдвэрлэгч “Serra Verde”-ийг 2.8 орчим тэрбум ам.доллароор худалдаж авахаар дөрөвдүгээр сард тохиролцсон нь голлон нөлөөлжээ. “Serra Verde”-ийн Гояс муж дахь “Pela Ema” уурхай нь неодим, празеодим, диспрози болон терби гэсэн байнгын соронз үйлдвэрлэхэд ашигладаг дөрвөн төрлийн газрын ховор элемент олборлодог. Тус компанийн 15 жилийн хугацаатай оффтейк буюу урьдчилан худалдан авах гэрээгээр холимог газрын ховор элементийн карбонатыг анхан шатны бүтээгдэхүүн хэлбэрээр гадагш нийлүүлэхээр тохиролцсон нь Бразилд дотооддоо илүү өндөр нэмүү өртөг шингээх асуудлыг хөндөхөд хүргэсэн байна.

Хяналтаа нэмэгдүүлэхийн зэрэгцээ хөрөнгө оруулалт татна Хуулийн төсөл зөвхөн хяналтын шинэ зохицуулалтаар хязгаарлагдахгүй юм. Салбарын хөрөнгө оруулалтыг дэмжих зорилгоор 2 тэрбум реалын ашигт малтмалын баталгааны сан байгуулж, боловсруулалт болон хувиргалтын төслүүдэд таван жилийн хугацаанд нийт 5 тэрбум реал хүртэлх татварын хөнгөлөлт үзүүлэхээр тусгажээ. Мөн татварын хөнгөлөлттэй бонд гаргах, Бразилийн хөгжлийн “Banco Nacional de Desenvolvimento Econômico e Social” банк болон инновацын санхүүжилтийн “Financiadora de Estudos e Projetos” агентлагаар дамжуулан санхүүжилт олгох боломж бүрдүүлэхээр байна. Бразилийн уул уурхайн салбарын “IBRAM” хүрээлэнгийн мэдээлснээр АНУ, Европын Холбоо, Их Британи, Хятад зэрэг түншүүд зөвхөн түүхий эд худалдан авах бус хөрөнгө оруулалт хийх, технологи нэвтрүүлэх, мөн үйлдвэрлэлийн сүлжээ хөгжүүлэх сонирхол илэрхийлж байна.