Bugatti Rimac-ийн Мате Римац суперкарын зах зээл 'Швейцарийн цагны үе шат'-д орж буйг тайлбарлав

Bugatti Rimac-ийн гүйцэтгэх захирал Мате Римацын хэлснээр суперкарын худалдан авагчдын сонирхол технологийн “showcase” маягийн шийдлээс илүү гар ажиллагаа, нарийн механик хийц рүү эргэж, зах зээл нь “Швейцарийн цагны үе шат”-д шилжиж байна. Түүний тайлбарласнаар хамгийн чинээлэг хэрэглэгчид хурд, хүчнээс гадна эд зүйлтэйгээ “холбогдох” мэдрэмжийг илүү эрж хайдаг болсон. “Эдгээр үйлчлүүлэгчид өөрт нь үнэхээр хамаатай, өөртэй нь холбогдсон зүйлийг хүсдэг,” гэж Римац CNBC-д ярив.

Энэ өөрчлөлтийг Римац дэлхийн автомашины зах зээлийн өргөн хүрээний хоёр туйлшралтай зэрэгцүүлэн тайлбарласан. Нэг талд нь олонхийн сегментэд Хятадаас нийлүүлэлт нэмэгдсэн хямд цахилгаан автомашинууд давамгайлах төлөвтэй, нөгөө талд нь дээд сегмент удаан хугацаанд дотоод шаталтат хөдөлгүүрээ хадгална гэж үзэж байна. “Энгийн машин, энгийн хүмүүсийн хувьд дийлэнх нь цахилгаан болно,” гэж тэр хэлээд, “Дээд сегмент, спорт машин болон түүнээс дээш нь маш удаан хугацаанд шаталтат хэвээр байна, яг л цаг шиг,” хэмээн нэмж тодотгов.

Энэхүү чиг хандлагын хамгийн тод жишээ нь Bugatti-ийн шинэ гибрид Tourbillon. Римацын мэдээлснээр энэ загвар 8.3 литрийн V16 хөдөлгүүр болон цахилгаан моторын хослолоор нийт 1,800 морины хүч гаргана. Үйлдвэрлэлийг 250 ширхэгээр хязгаарлаж, эхлэх үнэ нь ойролцоогоор 4.5 сая ам.доллар бөгөөд бүгд зарагдсан гэж тэр хэлсэн. “Одоо би дэлхийн хамгийн том шаталтат хөдөлгүүрийг хийж байгаа нь нэг ёсны ёжтой,” гэж Римац ярив.

Bugatti Rimac-ийн хувьд хязгаарлагдмал тоо, хувь хүний захиалга зөвхөн брэндийн дүр төрх бус, ашиг орлогын гол хөдөлгүүр болж байна. Дундаж худалдан авагч Tourbillon дээр хувь хүнчилсэн нэмэлтээр 600,000–700,000 ам.доллар нэмж төлдөг бөгөөд энэ нь ашигт ажиллагаанд чухал нөлөөтэй гэж Римац тайлбарлав. Өөрөөр хэлбэл, хамгийн үнэтэй ангилалд “стандарт” гэдэг ойлголт улам багасаж, захиалагчийн хүсэл, механик ур чадварын өртөг бодитоор үнэ дээр шингэж байна.

Компанийн бүтэц, өмчлөлийн хувьд сүүлийн жилүүдэд мөн өөрчлөлтүүд өрнөсөн. Rimac Group 2021 онд Porsche болон Volkswagen-оос Bugatti-ийн хяналтыг авч, шинээр бүрэлдсэн Bugatti Rimac нь шууд цахилгаан Bugatti гаргана гэсэн хүлээлтийг өөрчилсөн гэж мэдээлэгддэг. Porsche AG энэ оны дөрөвдүгээр сард Bugatti Rimac дахь 45 хувийн эзэмшлээ HOF Capital тэргүүтэй олон улсын консорциумд худалдахаар зөвшөөрсөн. Үүнтэй зэрэгцэн Bugatti-ийн үнэлгээний талаар зарим мэдээлэл 1.1 тэрбум ам.доллароос давна гэж бичсэн ч Римац үүнийг 2 тэрбум ам.доллароос “үлэмж өндөр” гэж тодотгов.

Санхүүгийн үзүүлэлтээр өнгөрсөн онд компанийн EBITDA 200 сая евро буюу 233 сая ам.доллар болж, ашиг цааш нэмэгдэх төлөвтэй гэж Римац хэлсэн нь түүний ярьж буй “цагны үе шат”-ны бизнес логик зөвхөн гоо зүй биш гэдгийг давхар харуулна. Хиймэл оюун, өөрөө жолооддог систем, цахилгаан автомашины эрин үед ч Bugatti-ийн гол зарчим нь “хүний хүчин зүйл” байна гэж тэр онцолжээ. Дээд сегментэд хамгийн сүүлийн үеийн программ хангамж бус, харин хүний ур чадвар, материал, механикийн нарийн шийдэл нь ялгарал, үнэ цэнийг тодорхойлох чиглэл улам хүчтэй болж байна.