CNBC-ийн Жим Крамер Dick’s Sporting Goods-ийн түүхэн уналтыг тэвчээртэй хөрөнгө оруулагчдад боломж гэж үнэлэв

АНУ-ын спортын барааны жижиглэн худалдааны “Dick’s Sporting Goods” компанийн хувьцааны ханш мягмар гарагийн арилжаагаар түүхэндээ байгаагүй огцом уналт үзүүллээ. Компанийн улирлын санхүүгийн үзүүлэлт зах зээлийн хүлээлтэд хүрээгүйгээс гадна бүтэн жилийн ашгийн төлөвөө мэдэгдэхүйц бууруулсан нь хөрөнгө оруулагчдын болгоомжлолыг нэмэгдүүлжээ.

Гэхдээ CNBC-ийн “Mad Money” нэвтрүүлгийн хөтлөгч, зах зээлийн шинжээч Жим Крамерын үзэж буйгаар энэ удаагийн огцом уналт нь богино хугацааны эрсдэлийг даах чадвартай, урт хугацааны хөрөнгө оруулагчдын хувьд боломж болж магадгүй байна. Тэрбээр зах зээл компанийн өмнө тулгарч буй хүндрэлд хүчтэй хариу үзүүлснээр хүлээлт болон хувьцааны үнэлгээ аль аль нь мэдэгдэхүйц буурсныг онцолсон юм.

Гол асуудал нь “Dick’s Sporting Goods”-ийн үндсэн үйл ажиллагаанаас илүүтэй саяхан нэгтгэсэн спорт гутал, хувцасны жижиглэн худалдааны “Foot Locker” сүлжээтэй холбоотой байна.

Улирлын тайлангаар “Dick’s Sporting Goods”-ийн ижил дэлгүүрийн борлуулалт өмнөх оны мөн үеэс 4.9 хувиар өссөн бол “Foot Locker”-ийнх 3.6 хувиар буурч, зах зээлийн хүлээлтээс доогуур гарчээ. Компани “Foot Locker”-ийн бүтэн жилийн борлуулалтын төлөвөө бууруулсан хэдий ч “Dick’s Sporting Goods”-ийн үндсэн бизнесийн ижил дэлгүүрийн борлуулалтын төсөөллөө хэвээр үлдээсэн байна.

Крамерын хувьд энэ зөрүү нь “Dick’s Sporting Goods”-ийн үндсэн бизнесийн эрэлт харьцангуй тогтвортой байгааг харуулж байна. Гэхдээ “Foot Locker”-ийг нэгтгэснээр хоёр бизнесийн санхүүгийн үр дүн хоорондоо улам нягт холбогдож, хөрөнгө оруулагчид “Dick’s Sporting Goods”-ийг дангаар нь үнэлэхэд хүндрэлтэй болжээ.

“Foot Locker”-ийн санхүүгийн сул гүйцэтгэл нь спорт гутал, хувцасны зах зээл дэх эрэлт саарч буйтай зэрэгцэн хуучирсан загварын бараа материал хуримтлагдаж, түүнийг борлуулахын тулд хямдрал нэмэгдэж байгаатай холбоотой гэж Крамер тайлбарлав. Илүүдэл бараа материалаа цэвэрлэх үйл явц үргэлжлэх тул ойрын нэгээс хоёр улиралд компанийн ашигт ажиллагаанд дарамт хэвээр байх эрсдэлтэй байна.

Тэрбээр “Foot Locker”-ийн хүндрэл гэнэтийн зүйл биш байсныг мөн онцолжээ. Худалдан авах санал гарахаас өмнөх “Foot Locker”-ийн хувьцааны ханшийн гүйцэтгэлээс тус компанийн бизнес аль хэдийн хүндрэлтэй байсныг харах боломжтой байсан гэж Крамер үзсэн байна.

“Dick’s Sporting Goods” 2025 оны есдүгээр сард “Foot Locker”-ийг худалдан авах хэлцлээ эцэслэсэн бөгөөд Крамер уг худалдан авалтыг алдаа байсан байж болзошгүй гэж дүгнэжээ. Одоо компанийн өмнө “Foot Locker”-ийн борлуулалтыг сэргээхээс гадна илүүдэл бараа материалыг бууруулж, ашигт ажиллагааг тогтворжуулах сорилт тулгарч байна.

Гэсэн хэдий ч хувьцааны ханшийн огцом уналт нэг талаас компанийн үнэлгээг илүү хямд түвшинд хүргэжээ. Крамерын тооцоолсноор мягмар гарагийн арилжааны уналтын дараа “Dick’s Sporting Goods”-ийн хувьцаа 2027 оны хүлээгдэж буй ашгаас ойролцоогоор ес дахин өндөр үнэлгээтэй арилжаалагдаж байна.

Крамер үүнийг компанийн ойрын улирлын хүндрэлүүд хувьцааны ханшид тодорхой хэмжээгээр аль хэдийн шингэсэн байж болохыг илтгэнэ гэж үзэж байна. Өөрөөр хэлбэл, хөрөнгө оруулагчдын анхаарал одоо “Foot Locker”-ийн богино хугацааны сул үзүүлэлтээс илүүтэй “Dick’s Sporting Goods” худалдан авсан бизнесээ хэр хурдан сэргээж чадах вэ гэдэгт шилжихээр байна.

Энэ талаар Крамер “Хэрэв та ‘Dick’s’-ийн хувьцааг эзэмшээгүй бол өнөөдрийн нэг том эрсдэлээс зайлсхийлсэн гэсэн үг" гэдгийг онцолж, "Гэхдээ өмнөх уналтуудын түүхийг нь харвал ойрын саруудад худалдан авагч болох талаар бодож үзэхэд илүүдэхгүй ба энэ компани эргэн сэргэж чаддаг түүхтэй” гэдгийг тэмдэглэжээ.

Мөн тэрбээр одоогийн үнэлгээний түвшинд “Dick’s Sporting Goods”-ээс бүрэн бууж өгөхөд эрт гэж үзэж буйгаа илэрхийлсэн байна. Крамерын дүгнэлтээр “Dick’s Sporting Goods” нь АНУ-ын спортын барааны жижиглэн худалдааны зах зээлд хэмжээ, салбарын сүлжээ болон үйл ажиллагааны цар хүрээгээрээ давуу байр суурьтай хэвээр байна.

Харин урьд өмнө давуу тал болж байсан хэмжээний өсөлт одоо асуудалтай “Foot Locker”-ийн бизнесийг өөртөө нэгтгэснээр шинэ эрсдэл дагуулж эхэлжээ. Иймээс Уолл-стритийн хувьд гол асуулт нь “Dick’s Sporting Goods”-ийн үндсэн бизнес тогтвортой хэвээр эсэхээс илүүтэй “Foot Locker”-ийг хэдий хугацаанд сэргээж, худалдан авалтынхаа үр өгөөжийг бодитоор харуулж чадах вэ гэдэгт төвлөрч байна.