Д.Айвс: Хиймэл оюуны хувийн компаниудад хөрөнгө оруулах $200 саяын сан байгуулна

Технологийн салбарын шинжээч Дэн Айвс жижиг хөрөнгө оруулагчдад хиймэл оюуны салбарын биржид бүртгэгдээгүй компаниудад хөрөнгө оруулах боломж олгох зорилгоор хаалттай сан байгуулахаа мэдэгдлээ.

"Ives Ultra AI Opportunities" нэртэй тус сан 20 сая ширхэг хувьцааг нэгжийг нь 10 ам.доллароор санал болгож, нийт 200 сая ам.доллар татахаар төлөвлөжээ. Сангийн хувьцааг Нью-Йоркийн Хөрөнгийн биржид IVAI тикертэй арилжаалахаар мэдүүлэгт тусгасан байна.

Сан цэвэр хөрөнгийнхөө 80 хүртэлх хувийг хиймэл оюун болон түүний дэд бүтцийн чиглэлээр ажилладаг компаниудад байршуулахаар төлөвлөжээ. Хөрөнгө оруулалтын гол хэсгийг АНУ-д төвтэй, хөгжлийн сүүлийн шатандаа яваа хувийн компаниуд бүрдүүлэх юм.

Үүнээс гадна багцын 15 хүртэлх хувийг хувийн хөрөнгө оруулалтын сангуудаар дамжуулан хиймэл оюуны компаниудад байршуулах боломжтой аж. Ингэснээр сан зөвхөн компаниудын хувьцааг шууд эзэмших бус, бусад сангаар дамжуулан хувийн зах зээлд хөрөнгө оруулах бүтэцтэй байх юм.

Гэхдээ ийм боломж харьцангуй өндөр зардал дагуулна. Мэдүүлэгт "Ives Ultra AI Opportunities" сангийн нийт жилийн зардлыг хөрөнгийн 3.1 хувьтай тэнцэхээр тооцжээ.

"Yorkville Ives & Co."-ийн түнш, шинжээч Дэн Айвс ирэх жилүүдэд хиймэл оюуны салбарын хөрөнгө оруулалтын томоохон хэсгийг хувийн компаниуд тэргүүлнэ гэж үзэж байна.

“Хиймэл оюуны хувьсгалыг манлайлах олон компани хувийн хэвшлийнх хэвээр үлдэнэ” гэж Айвс онцлоод, шинэ сангийн зорилгыг эдгээр компанийн өсөлтөд олон нийтэд арилжаалагддаг хэрэгслээр дамжуулан оролцох боломж бүрдүүлнэ хэмээн тайлбарлажээ.

Тэрбээр мөн хиймэл оюуны ирээдүйтэй хувийн компаниудын эзэмшил зөвхөн Цахиурын хөндийн цөөн тооны хөрөнгө оруулагчаар хязгаарлагдах ёсгүй гэж үзэж байгаагаа илэрхийлэв.

Хиймэл оюуны салбарын томоохон компаниуд биржид гарахаас өмнөх шатандаа өндөр үнэлгээ авч, хувийн зах зээлд их хэмжээний хөрөнгө татах болсон нь жижиг хөрөнгө оруулагчдын шууд оролцох боломжийг хязгаарладаг. Айвсын санал болгож буй сан ийм компаниудад олон нийтэд арилжаалагдах хувьцаагаар дамжуулан хөрөнгө оруулах гарц бий болгох зорилготой.

Харин хөрөнгө оруулагчдын хувьд сангийн 3.1 хувийн жилийн зардлаас гадна багцад сонгогдох хувийн компаниудын үнэлгээ, хөрвөх чадвар болон цаашдын өсөлт нь өгөөжид нөлөөлөх гол хүчин зүйлс байх юм.