Д.Трампын хиймэл оюуны салбарын удирдлагуудтай хийсэн уулзалтад “Apple” оролцсонгүй

АНУ-ын Ерөнхийлөгч Дональд Трамп мягмар гарагт технологийн томоохон компаниудын удирдлагуудтай Цагаан ордонд хиймэл оюуны ирээдүйн талаар хэлэлцсэн ч “Apple”-ийн төлөөлөл оролцсонгүй.

Тодруулбал, “Apple”-ийн ТУЗ-ийн дарга Тим Күүк болон есдүгээр сард гүйцэтгэх захирлын албан тушаалыг хүлээн авсан Жон Тернус нар уулзалтад байсангүй. CNBC-ийн зүгээс нөхцөл байдлын талаар “Apple” болон Цагаан ордноос тодруулах хүсэлт илгээсэн ч одоогоор хариу өгөөгүй байна.

“Altimeter Capital”-ийн гүйцэтгэх захирал Брэд Герстнер CNBC-д өгсөн ярилцлагадаа үүнийг ач холбогдолтой асуудал гэж үзэхгүй байгаагаа илэрхийлэв. Түүний хэлснээр уулзалтад голчлон хамгийн том, өндөр хүчин чадалтай хиймэл оюуны загвар хөгжүүлж буй компаниуд оролцжээ.

“Apple” харин өөр стратеги баримталдаг аж. Тус компанийн хиймэл оюуны загварууд “iPhone”, “Mac” зэрэг төхөөрөмжийн өөрийн чип дээр ажиллахад зориулагдсан бөгөөд “Siri”-ийн зарим үйлдлийг гүйцэтгэдэг юм. Мөн “Apple” технологийн “Google” компанитай хамтран ажилладаг ба дата төв, тооцоолох хүчин чадалд зарцуулж буй хөрөнгө нь “Google”, “Microsoft”, “Meta”, “Amazon”-оос хавьгүй бага байдаг.

Хэдийгээр хиймэл оюуны өрсөлдөөнөөс хоцорч болзошгүй гэсэн болгоомжлол байгаа ч хөрөнгө оруулагчид “Apple”-ийн хөрөнгө бага шаарддаг стратегийг өөр өнцгөөс үнэлэх болжээ. Тус компанийн хувьцааны ханш он гарсаар нийт 22.5 хувиар өссөн байна.

Трампын уулзалтын дараа “Nvidia”, “OpenAI”, “Meta”, “Google”, “Anthropic” зэрэг компани хиймэл оюуны аюулгүй ажиллагааны зарчмуудыг тусгасан тохиролцоонд гарын үсэг зуржээ.