Дэлхийн банкны санхүүжилтээр 33 сургууль байгуулна

Нийслэлийн утаа, автозамын түгжрэл, замын хүртээмж, орчны бохирдол болон төрийн үйлчилгээний хүнд суртал иргэдийн өдөр тутмын амьдралд тулгамдсан асуудал хэвээр байгааг Нийслэлийн Засаг дарга Б.Пүрэвдагва есдүгээр сарын 8-нд ахмадуудтай уулзах үеэр онцолжээ.

Түүний мэдээлснээр нийслэлийн нийтийн тээврийн парк шинэчлэлийн хүрээнд их багтаамжийн 60 цахилгаан автобус, сургуулийн 50 автобус, дунд багтаамжийн 46 автобус буюу нийт 156 тээврийн хэрэгсэл шинээр үйлчилгээнд нэвтрүүлэхээр төлөвлөсөн байна.

Нийслэлийн удирдлага түгжрэлийн нэг шалтгааныг сургууль, нийтийн тээвэр, автозам болон дугуйн замын хүртээмж хангалтгүй байгаатай холбон тайлбарлав. Сургууль, цэцэрлэгийн хичээл үргэлжилж буй үед замын хөдөлгөөний ачаалал нэмэгддэг тул хотын хэмжээнд 84 сургууль шинээр барихаар төлөвлөжээ.

Шинээр барих сургуулиудын 33-ыг Дэлхийн банк, 11-ийг Азийн хөгжлийн банкны санхүүжилтээр байгуулах боломж бүрджээ. Мөн хүүхдүүдийг гэртэй нь ойр сургуульд хамруулах зорилготой “Гэрт ойрхон сургууль” хөтөлбөрийн хүрээнд хотхонуудын дунд 21 бага сургууль барьж, нийт 8,700 гаруй хүүхэд хүлээн авах хүчин чадал бүрдүүлэхээр төлөвлөжээ.

Засгийн газар “Гэрт ойрхон сургууль” хөтөлбөрт 50 тэрбум төгрөг тусгахаар 2026 оны төсвийн тодотголд санал оруулсан бөгөөд уг асуудлыг УИХ-ын ээлжит бус чуулганаар хэлэлцэж байгаа аж.

Нийслэл автозамын түгжрэлийг бууруулах бусад арга хэмжээний хүрээнд хувийн хэвшилтэй хамтран дугуйн зам, явган хүний гүүрэн гарц шинээр барих, ухаалаг гэрлэн дохионы системийг өргөжүүлэхээр ажиллаж буй талаар мөн мэдээлэв.