Ерөнхий сайд Н.Учрал Багахангай-Хөшигийн хөндий-Эмээлтийн төмөр замын явцыг шалгаж, хугацаатай үүрэг өглөө

Ерөнхий сайд Н.Учрал Багахангай-Хөшигийн хөндий-Эмээлт чиглэлийн стратегийн төмөр замын бүтээн байгуулалтын явцтай газар дээр нь танилцаж, хугацааг шахаж ажиллахыг үүрэг болголоо. Тэрээр 127.1 км шугамын эхний 87.2 км-ийн үндсэн ажил дууссаныг онцлоод далан, гүүр, хоолой, дээд бүтцийн ажлыг зэрэг уялдуулан эрчимжүүлэх шаардлагатайг сануулсан байна. Мөн 2026 оны есдүгээр сард туршилтыг эхлүүлэх чиглэл өгч, төлөвлөсөн графикаас гажихгүй байхыг анхааруулжээ.

Төслийн хүрээнд Туул гол дээгүүр 476 метр урт төмөр замын гүүр барьж байгаа бөгөөд Монголын хамгийн урт гүүр гэж мэдээлэв. Одоогоор үндсэн шугамын эхний хэсгийн суурь ажил дууссан ч үлдсэн дэд бүтэц, дээд бүтцийн ажлууд үргэлжилж байна. Бүтээн байгуулалтад үндэсний 95 аж ахуйн нэгж, 4,000 гаруй монгол инженер, ажилчин оролцож байгаа нь дотоодын оролцоог өндөр түвшинд авч явж буйг талууд тэмдэглэлээ. Төмөр зам ашиглалтад орсноор 1,000 орчим байнгын ажлын байр бий болгохоор тооцсон байна.

Энэ төмөр зам ашиглалтад орсноор шатахуун болон 34 нэр төрлийн тэсэрч дэлбэрэх, химийн аюултай ачааг Улаанбаатарын төвөөр нэвтрүүлэхгүй, хотын гадуур тээвэрлэхээр төлөвлөжээ. Цагираг хэлбэрээр баригдаж буй шинэ шугамаар эрсдэлтэй ангиллын ачааг хотын бүсээс гаргаж, тээврийн урсгалыг төвөөс задлах зорилготой гэж танилцуулсан байна. Засгийн газар өмнө нь мухардал үүсгэдэг байсан төмөр замыг Эмээлт зөрлөгтэй холбож, мухардлын асуудлыг шийдвэрлэснээ мөн онцлов.

Ачаа тээврийн хүчин чадлын хувьд эхний үед жилд 3.5 сая тонн, цаашдаа 20 сая тонн хүртэл тээвэрлэх боломж бүрдэнэ гэж танилцууллаа. Үүнтэй зэрэгцээд өдөрт 316-1,800 том оврын автомашиныг нийслэлийн замын хөдөлгөөнөөс гаргах боломжтой гэсэн тооцоог дурдсан байна. Мөн гармын авто зам хаагдах хугацаа 90 хувь буурахаар тооцжээ. Энэ нь хотын түгжрэлийг бууруулах, тээврийн урсгалын тасалдал багасгах, аюултай ачаатай автотээврээс үүдэх эрсдэлийг хязгаарлахад чиглэж байна.

Санхүүжилтийн хүрээнд төслийн цаашдын хөрөнгө оруулалтыг шийдвэрлэх зорилгоор Олон улсын санхүүгийн корпорац (IFC) болон Монгол Улсын Хөгжлийн банктай санхүүжилтийн дэмжлэгийн асуудлыг ярихаа Ерөнхий сайд мэдэгдэв. Төсөл 1.2 их наяд төгрөгийн хөрөнгө оруулалттай бөгөөд урт хугацаандаа 294.8 тэрбум төгрөгийн татвар төвлөрүүлж, 1.3 их наяд төгрөгийн цэвэр ашигтай ажиллана гэж үзжээ. Засгийн газар шинэ төмөр замын бүтээн байгуулалтыг бүх талаар дэмжиж ажиллахаа илэрхийлсэн бөгөөд хэрэгжилтийг хугацаанд нь барихыг төслийн баг, гүйцэтгэгч талуудаас шаардаж байна.