Европт залуусын үймээн: Ромд жагсагчид Колизей рүү нэвтэрч, Барселонд 100 орчим хүн баривчлагдав

Амьжиргааны өртгийн өсөлт, бага цалин, зэвсэглэлийн зардлыг эсэргүүцсэн залуусын жагсаал Европын хэд хэдэн хотод 10 дугаар сарын 24-нд үргэлжилж, Ромд жагсагчид Колизей рүү хүчээр нэвтэрч, Барселонд дэлгүүр дээрэмдсэн хэргээр 100 орчим хүн баривчлагдлаа.

Ром: Колизей рүү нэвтэрч, 96 хүнийг цагдаагийн газарт авчирав

Италийн La Stampa сонины мэдээлснээр Ромд "Италийг дайнаас гарга" уриатай зөвшөөрөлтэй жагсаал дууссаны дараа зуу орчим залуу жагсаалаас салан гарч Колизей рүү очжээ. Тэд хаалгыг хүчээр нээж, дурсгалт газрын дотор хэдэн минут байсан бөгөөд хамгаалалтын ажилтнуудтай маргалдаж, шил лонх шидсэн аж. Il Messaggero сонин хорь орчим хүн дотогш нэвтэрч, Археологийн цогцолборт паркийн нэг ажилтныг гэмтээсэн гэж мэдээлжээ. Тэднийг баривчлан, хэн болохыг тогтоож, цагдаагийн газарт хүргэсэн байна.

Орой нь Бүгд найрамдахын талбайн ойролцоо жагсагчид цагдаагийн шугамыг давахыг оролдож, лонх, пиротехник шидсэн тул цагдаа усан буу ашигласан. Il Messaggero-гийн мэдээлснээр тэр өдөр Ромд 200 хүний бичиг баримтыг шалгаж, 96 хүнийг цагдаагийн газарт авчирсан бөгөөд 28 хүнийг урьдчилан сэргийлэх зорилгоор саатуулсны зургаа нь насанд хүрээгүй хүүхэд байжээ. Италийн хэвлэлүүд Турин, Милан хотод ч жагсаал үргэлжилсэн гэж мэдээлсэн бөгөөд AP агентлагийн мэдээлснээр Миланы төвийг цэргийнхэн хамгаалжээ.

Барселона: 14 дэлгүүр дээрэмдэгдэж, 100 орчим хүн баривчлагдав

Испанийн El País сонины мэдээлснээр Барселонд олон нийтийн сүлжээгээр уриалан цугласан 500-600 орчим залуу 10 дугаар сарын 24-ний 18 цагаас Каталонийн талбай, Рамбла гудамжны орчимд хотын тохижилтын байгууламжийг эвдэж, 14 дэлгүүр дээрэмдэв. Каталонийн Дотоод хэргийн сайд Нурия Парлоны хэлснээр гудамжинд 33 жижиг түймэр гарчээ. 220 гаруй цагдаа ажиллаж, 100 орчим хүнийг баривчилсны дөрөвний нэг нь насанд хүрээгүй хүүхэд байна.

Барселона хотын дарга Жауме Коллбони "Болсон явдлыг шийтгэлгүй үлдээхгүй. Насанд хүрэгчид төдийгүй насанд хүрээгүй хүүхдийн асран хамгаалагчид ч хариуцлага хүлээнэ" гэж мэдэгдсэн бөгөөд энэ үйлдэл ямар нэг шаардлага бус "зүгээр л хүчирхийлэл, эвдэн сүйтгэл" байсан гэжээ. Каталонийн Засгийн газрын тэргүүн Сальвадор Илья "Каталонид хүчирхийлэлд орон зай байхгүй. Жагсах бол ардчилсан эрх, харин халдах, айлган сүрдүүлэх, эвдэн сүйтгэх нь эрх биш" гэж бичжээ. Парлон Парисын жагсаалыг дуурайсан нөлөө байж болохыг үгүйсгээгүй байна.

X сүлжээнд

Ромын Колизейд болсон явдлын бичлэгийг монгол хэрэглэгч X сүлжээнд хуваалцаж, үймээн Итали, Бельги, Испани руу тархаж байна гэж бичсэн нь энэ өглөө хамгийн өргөн тархсан нийтлэлийн нэг боллоо. Итали, Испанид болсон үйл явдлыг дээрх мэдээллийн байгууллагууд баталсан бол Бельгитэй холбоотой хэсгийг бид бие даан нягталж чадаагүй.