Монголын шигшээ багийн экс хөлбөмбөгчин О.Одбаяр, Д.Мандухай нар Истанбулд баривчлагджээ

Туркийн цагдаа нар 10 дугаар сарын 24-ний өглөө Истанбул хотын Сарыер дүүрэгт байрлах тансаг зэрэглэлийн орон сууцны хотхонд ажиллагаа явуулж, Монголын шигшээ багийн экс хөлбөмбөгчин О.Одбаяр болон түүний найз бүсгүй Д.Мандухай нарыг баривчилжээ. Энэ тухай Туркийн Odatv, Korkusuz сайтууд мэдээлсэн бөгөөд iSee.mn сайт тэднийг иш татан монгол уншигчдад хүргэлээ.

Туркийн хэвлэлүүдийн мэдээлснээр О.Одбаярыг Интерполын улаан булангаар, Д.Мандухайг цэнхэр булангаар эрэн сурвалжилж байжээ. Тэднийг олон улс дамнасан хар тамхины тээвэрлэлттэй холбоотой гэж сэжиглэж байна. Korkusuz сайтын бичсэнээр О.Одбаярт хар тамхины наймаа, хулгайн хэргээр Монголд улаан булан зарлагдсан байжээ.

Туркийн сэтгүүлч Ихсан Ялчыныг иш татан хэвлэлүүдийн бичсэнээр хоёр сэжигтэн эх орондоо явагдаж буй мөрдөн шалгах ажиллагааны улмаас баривчлагдах эрсдэлтэй болсон тул Туркт ирж, Сарыер дүүргийн тансаг хотхонд амьдарч байжээ. Цагдаа нар тэдний байршлыг тогтоож, өглөө эрт ажиллагаа явуулан хоёуланг нь саатуулсан байна.

Туркийн хэвлэлүүд О.Одбаярыг Монголын Премьер лигт тоглож, шигшээ багт ч дуудагдаж байсан хагас хамгаалагч хэмээн танилцуулжээ. Тэд түүнийг хөлбөмбөгийн карьераа дуусгасны дараа хууль бус үйл ажиллагаанд холбогдсон байж болзошгүй, улмаар өөрт нь холбогдох шалгалтын улмаас гадаад руу гарсан гэж бичсэн байна. Korkusuz сайтын мэдээлснээр цагдаагийн байгууллага тэднээс мэдүүлэг авсны дараа шүүхэд шилжүүлнэ.

Туркийн эрх бүхий байгууллагаас уг ажиллагааны талаар албан ёсны дэлгэрэнгүй мэдээлэл хараахан гаргаагүй байна. Монголын хууль сахиулах байгууллагаас ч энэ талаар албан ёсны тайлбар одоогоор гараагүй. Сэжигтнүүдийн гэм буруу шүүхээр тогтоогдоогүй бөгөөд хэргийн талаарх мэдээлэл одоогоор зөвхөн хэвлэлийн мэдээлэлд тулгуурлаж байна.

Энэ мэдээг Монгол хэрэглэгчид X сүлжээнд өргөн хуваалцлаа.