“Hilton”: Энэтхэг дэлхийн гурав дахь том зочид буудлын зах зээл болно

АНУ-ын зочлох үйлчилгээний “Hilton” компани Энэтхэг дэх үйл ажиллагаагаа эрчимтэй тэлж, тус улс ирэх арван жилд дэлхийн томоохон зочид буудлын зах зээлүүдийн нэг болно гэж тооцоолж байна. “Hilton”-ийн Ази, Номхон далайн бүсийн ерөнхийлөгч Алан Уоттс CNBC-ийн “Inside India” нэвтрүүлэгт өгсөн ярилцлагадаа “Энэтхэг бол дэлхийн аялал жуулчлалын хамгийн сонирхол татахуйц зах зээл бөгөөд ирэх арван жилд ч байр сууриа хадгална” хэмээжээ. Түүний тооцоолсноор Энэтхэг зочид буудлын зах зээлийн хэмжээгээр дэлхийд гуравдугаарт орох боломжтой. Компанийн Энэтхэгт төвлөрөх бодлого нь Ази дахь хоёр том зах зээлийн өсөлтийн зөрүү улам тодорч буй үед хэрэгжиж байна. “Hilton”-ийн Ази, Номхон далайн бүсийн нэг өрөөнд ногдох орлого буюу RevPAR хоёрдугаар улиралд ердөө нэг гаруй хувиар өсчээ. RevPAR нь зочид буудлын өрөөний дүүргэлт болон үнийн түвшнийг хамтад нь илэрхийлдэг салбарын гол үзүүлэлт юм. Алан Уоттсын тайлбарласнаар бүсийн сул өсөлт голчлон БНХАУ-ын зах зээлтэй холбоотой. Баяр, амралтын үеэс бусад хугацаанд Хятадын хэрэглэгчдийн итгэл сул байгаа нь зочид буудлын эрэлтэд нөлөөлж буй аж. Харин “Hilton”-ийн Энэтхэг болон Хойд Азийн зах зээлд RevPAR хоёр оронтой хувиар өсжээ. Зүүн Өмнөд Ази болон Японд ч эрэлт тогтвортой байгааг Уоттс онцолсон байна.

Ази аялагчид Азийн аялал жуулчлалыг тэлсээр байна “Hilton”-ийн хувьд бүс нутгийн өсөлтийг дэмжиж буй гол хүчин зүйлсийн нэг нь Азийн орнууд хоорондын аялал болжээ. Ази, Номхон далайн бүсийн зочид буудлуудын захиалсан 10 өрөө тутмын найм орчим нь Азиас гаралтай аялагчдад ногдож байгааг Алан Уоттс дурдав. Дундаж давхаргын хүрээ тэлж, тээврийн дэд бүтэц болон хот хоорондын холболт сайжирч байгаа нь аяллын эрэлтийг нэмэгдүүлж буйг компанийн удирдлага онцолжээ. Энэтхэгт шашны аялал жуулчлал ч зочид буудлын компаниудын хувьд шинэ боломж болж байна. Аёдхья, Тирупати зэрэг мөргөлийн томоохон төвүүд жил бүр олон тооны аялагч хүлээн авдаг ч олон улсын болон үндэсний сүлжээ зочид буудлын нийлүүлэлт харьцангуй бага хэвээр байна.

Том хотуудаас жижиг хотууд руу “Hilton” одоогоор Энэтхэгт барилгын янз бүрийн шатанд байгаа 60 зочид буудалтай. Үүнээс гадна томоохон түншүүдтэй хамтран 400 орчим зочид буудал нэмж хөгжүүлэхээр тохиролцжээ. Компанийн тэлэлт зөвхөн Мумбай, Дели зэрэг том хотуудын өндөр зэрэглэлийн зочид буудлаар хязгаарлагдахгүй. Энэтхэгийн дотоодын аялагчдыг татах зорилгоор дунд болон жижиг хотуудад дундаж үнийн ангиллын “Hampton”, “Spark by Hilton” брэндүүдээр хүрээгээ нэмэгдүүлэхээр зорьж байна. Тэлэлтийн санхүүжилтийн хувьд Энэтхэгийн үл хөдлөх хөрөнгийн эзэмшигчид зочид буудлын барилгын хөрөнгийг өөрсдөө гаргаж, “Hilton”-д менежментийг нь хариуцуулах загвар давамгайлж буйг Уоттс хэлжээ. Ингэснээр “Hilton” өөрийн хөрөнгийг их хэмжээгээр зарцуулахгүйгээр Энэтхэг дэх сүлжээгээ нэмэгдүүлэх боломж бүрдэж байна. Харин хэрэглэгчдийн хувьд олон улсын сүлжээ зочид буудлууд Энэтхэгийн жижиг хот, шашны аялал жуулчлалын төвүүд рүү нэвтэрч байгаа нь байрлах үйлчилгээний сонголтыг нэмэгдүүлэх төлөвтэй. “Hilton” бүс нутагт аяллын эрэлт нэмэгдэж, дундаж давхаргын хүрээ тэлж байгаа энэ үед зөвхөн өндөр зэрэглэлийн бус, үнийн олон түвшний зочид буудлын сегментэд өсөх боломж бий гэж үзэж байна.