Нийслэл 2027 онд газар зохион байгуулалтын төслүүдээ өмнөх оноос 30.7 хувиар багасгана
Нийслэлийн 2027 оны газар зохион байгуулалтын төлөвлөгөөнд 825 төсөл, арга хэмжээ тусгасан нь 2026 оноос 366-аар буюу 30.7 хувиар цөөн байна.

Нийслэл 2027 онд газар зохион байгуулалтын чиглэлээр 825 төсөл, арга хэмжээ хэрэгжүүлэхээр төлөвлөж, төлөвлөгөөний төслөө Нийслэлийн ИТХ-д өргөн барихаар болжээ.
Нийслэлийн Газар зохион байгуулалтын албаны мэдээлснээр, ирэх оны төлөвлөгөөнд тусгасан төсөл, арга хэмжээний тоо 2026 оноос 30.7 хувиар буурсан байна.
Гэхдээ төлөвлөсөн ажлын тоо буурсан нь төсөв, хөрөнгө оруулалт мөн хэмжээгээр багассан гэсэн үг биш юм. Төсөл бүрийн өртөг, хамрах хүрээ болон хэрэгжүүлэх хугацаа харилцан адилгүй байдаг. Ирэх оны 825 төслийн нийт санхүүжилт, салбарын задаргааг одоогоор танилцуулаагүй байна.
Энэ оны төлөвлөгөөний хэрэгжилт 85.3 хувьтай байна
Нийслэлийн 2026 оны газар зохион байгуулалтын төлөвлөгөөнд нийт 1,191 төсөл, арга хэмжээ тусгасан бөгөөд арваннэгдүгээр сарын 18-ны байдлаар хэрэгжилтийг 85.3 хувьтай гэж үнэлжээ.
Тодруулбал, газрын менежментийн чиглэлийн 80 ажлын хэрэгжилт 91.1 хувь, газар зохион байгуулалтын чиглэлийн 578 ажлын явц 80.5 хувьтай байна.
Харин газар чөлөөлөлтийн нөхөн олговор олгохтой холбоотой 532 төсөл, арга хэмжээний хэрэгжилт 84 гаруй хувьд хүрснийг танилцуулжээ.
Нийслэлийн 2026 оны төсөвт газар чөлөөлөлтийн нөхөн олговорт 200 тэрбум төгрөг зарцуулахаар баталжээ.
Иргэдэд 0.7 га газар өмчлүүлэх ажил ерөнхий төлөвлөгөө батлагдахыг хүлээж байна
Нийслэлийн иргэдэд 0.7 га газар өмчлүүлэх ажлыг Улаанбаатар хотын хөгжлийн ерөнхий төлөвлөгөө батлагдсаны дараа албан ёсоор эхлүүлэхээр төлөвлөснийг албаныхан мэдээллээ. Нийслэлийн газар зохион байгуулалтын төлөвлөгөө нь авто зам, инженерийн дэд бүтэц, орон сууцны бүтээн байгуулалт зэрэг хотын хөгжлийн төслүүдийг хэрэгжүүлэхэд шаардлагатай газрын ашиглалт, зохион байгуулалттай нарийн холбоотой байдаг аж.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





