Нийслэлийн соёл, урлагийн өвийг мөнхлөх “Улаанбаатар” пянзыг бүтээжээ

Нийслэл Улаанбаатар хотын 387 жилийн ой болон “Улаанбаатар театр” ОНӨТҮГ үүсэн байгуулагдсаны 20 жилийн ойд зориулан бүтээсэн “Улаанбаатар” пянзны нээлт 2026 оны аравдугаар сарын 30-ны 11:40 цагт Улаанбаатар театрын Үзэсгэлэнгийн танхимд болно.

“Авьяасаар бүтээсэн 20 жил” уриан дор гаргаж буй уг пянзанд нийслэлийн түүх, үндэсний өв соёл, хотын өнгө төрхийг илэрхийлсэн “Миний Улаанбаатар”, “Дөрвөн уул”, “Хангарьдын дуулал”, “Үйлсийн сайхан Улаанбаатар”, “Улаанбаатарын тухай дуу”, “Улаанбаатарын үдэш” зэрэг дуу, хөгжмийн бүтээлүүд багтжээ.

Түүнчлэн Үндэсний хөгжмийн “Хангарди” найрал хөгжмийн Соёлын тэргүүний ажилтан Б.Эрхэмбаярын удирдлага дор хөгжимдсөн хөгжмийн зохиолч Цэн.Эрдэнэбатын “Хангарьд”, С.Мөнхбатын “Модун”, О.Чинбатын “1963”, Х.Алтангэрэлийн “Тусгаар Монгол Улс” удиртгал, Р.Бат-Эрдэнийн “Айсуй хүлгийн төвөргөөн” зэрэг бүтээлийг багтаасан байна.

“Улаанбаатар театр” ОНӨТҮГ-ын мэдээлснээр, энэхүү пянз нь нийслэлийн соёл, урлагийн өвийг дуу хөгжмөөр дамжуулан хадгалж, хойч үедээ өвлүүлэн үлдээх зорилготой аж.

Пянзыг бүтээснээр нийслэлийн түүх, соёлын онцлогийг олон нийтэд таниулах, цаашлаад олон улсын түвшинд сурталчлах, “Улаанбаатар” соёлын брэндийг хөгжүүлэхийг зорьж байгаа юм.