Төлбөрөө төлсний дараа ил болох нууцлаг аяллын багц жуулчдыг татаж байна

АНУ-д нислэг, шатахуун болон аяллын бусад зардал нэмэгдэж байгаа ч хэрэглэгчид амралт, аяллын төлөвлөгөөгөө танахгүй байна. Харин хямд багц, уян хатан чиглэл болон гаргаж буй шийдвэрт л аяллын төсвөө багасгах хандлага хүчтэй ажиглагдаж эхэллээ.

Санхүүгийн үйлчилгээний “PNC” компанийн CNBC-д зориулан шинжилсэн картын төлбөрийн мэдээллээр жилийн 36,675 ам.доллараас бага орлоготой хэрэглэгчид энэ оны эхээр аялалд сар бүр 2019 оноос хойших хамгийн өндөр дүнг зарцуулжээ. Долоодугаар сарын аяллын зардал нь өмнөх оны мөн үеэс 7 хувиар нэмэгдсэн байна.

Үүний зэрэгцээ АНУ дахь шатахууны үнэ жилийн өмнөхөөс ойролцоогоор 30 хувиар өсч, Хөдөлмөрийн статистикийн товчооны мэдээллээр онгоцны тийзний үнэ долоодугаар сарын байдлаар 25 гаруй хувиар нэмэгджээ.

Хямд аяллын бүтээгдэхүүний эрэлт нэмэгдэв

Онлайн хямдралын “Groupon” компанийн мэдээллээр, аялагчид очих газраа урьдчилан мэдэхгүйгээр нислэг, байр багтаасан “mystery vacation” буюу гэнэтийн чиглэлтэй аяллын багцаа өргөжүүлж байна.

Тус багцын захиалга энэ оны хоёрдугаар улиралд 5,500 орчимд хүрсэн нь өнгөрсөн оны нэгдүгээр улирлаас тав дахин өссөн үзүүлэлт юм. Нэг хүний багц нисэх буудлаас хамааран 199-өөс 299 ам.долларын үнэтэй бөгөөд “Groupon” үүнийг ердийн үнээс 50 хувийн хямдралтай гэж сурталчилж байна.

Захиалагчдын цөөн хэсэг нь Парис, Сингапур зэрэг олон улсын чиглэлд аялдаг бол ихэнхийг Лас Вегас, Атланта, Орландо зэрэг АНУ-ын хот руу илгээдэг байна. Аялагчид бичиг баримтаа бүрдүүлснээс хэдхэн хоногийн дараа очих газраа мэддэг аж. Оклахома-Сити хотын үсчин Жами Хагерман нөхөртэйгөө нийт 400 орчим ам.доллар төлөн ийм багц авч, Нью-Орлеанс руу аялжээ. Тэрбээр аяллын үнэлгээ төлсөн мөнгөтэй нь харьцуулахад сайн байсан гэж ярьсан байна.

Хямд байр захиалгын “Hostelworld” платформын мэдээллээр АНУ, Канадын хэрэглэгчдийн хийсэн захиалгын тоо 2026 оны эхний хагаст өмнөх оны мөн үеэс 10 хувиар нэмэгджээ.

Хэрэглэгчид зардлаа өвөрмө аргаар танаж байна

Аяллын эрэлт үргэлжилж байгаа ч хэрэглэгчид үнэ хэмнэх арга идэвхтэй хайж байна. Онлайн аяллын “Expedia” компанийн мэдээллээр төсвийн шүүлтүүр ашигласан хайлт зургаадугаар сарын байдлаар жилийн өмнөхөөс 1,200 гаруй хувиар өсчээ.

Амралтын байр түрээсийн “Vrbo” платформд аяллаасаа хоёр долоо хоногийн дотор байр захиалсан хэрэглэгчдийн тоо мөн хугацаанд 16 хувиар нэмэгдсэн нь энэ төрлийн хямдрал хайх хандлага өссөнийг харуулж байна.

Харин аяллын “Carnival” компанийн он дуусах хүртэл болон түүнээс цааш хийх аяллын захиалга өмнөх оны ижил үеийнхээс өндөр байна. Тус компанийн санхүү хариуцсан захирал Дэвид Бернштейний хэлснээр, АНУ-ын хүн амын тал орчим нь “Carnival”-ийн аяллын хөлгийн боомтоос автомашинаар таван цагийн дотор хүрэх зайд амьдардаг. Ингэснээр зарим аялагч онгоцны тийзний зардлаас “бултах” боломжтой аж.

Аялал тансаг хэрэглээ бус, харин ч хэрэгцээ

“PNC”-ийн ахлах эдийн засагч Брайан Лебланк хэрэглэгчид өндөр үнийг хараад сэтгэл дундуур байгаа ч төлбөрөө хийсээр байгааг онцолжээ. Мичиганы их сургуулийн хэрэглэгчийн итгэлийн индекс наймдугаар сард жилийн өмнөхөөс 11 хувиар буурсан нь шатахууны үнэ өсөх хүлээлттэй холбоотой.

Гэхдээ аяллын зардлын өсөлт зөвхөн бага орлоготой хэрэглэгчдэд хамаарахгүй. “PNC”-ийн шинжилгээгээр өндөр орлоготой өрхүүдийн аяллын зардал 2019 онтой харьцуулахад бусад орлогын бүлгээс илүү хурдтай өссөн байна.

Флорида мужийн их сургуулийн зочлох үйлчилгээний сургуулийн дэд профессор Тарик Догругийн үзэж буйгаа,р цар тахлын дараах “revenge travel” буюу хязгаарлалтын дараа аяллаа нөхөн хийх хандлага түр зуурын үзэгдэл биш болжээ.