“Торгуулиа яаралтай төлнө үү” зэрэг зурвасаар дамжуулан залилан хийх тохиолдол ихэсчээ

Сүүлийн үед төрийн байгууллагын нэрийг ашиглан замын хөдөлгөөний дүрэм зөрчсөн торгууль төлүүлэх нэрээр иргэдэд хуурамч зурвас илгээж, банкны болон хувийн мэдээллийг нь авах цахим залилан гарах болжээ.

Залилагчид “Торгуулиа яаралтай төлнө үү”, “Таны торгууль төлөгдөөгүй байна” гэх мэт агуулгаар иргэдийг яаруулж, мессеж дэх холбоос дээр дарахыг шаарддаг. Уг холбоос нь төрийн байгууллагын албан ёсны цахим хуудастай төстэй хуурамч вэбсайт руу шилжүүлж, торгууль төлүүлэх нэрээр интернэт банкны нэвтрэх нэр, нууц үг, картын мэдээлэл болон нэг удаагийн баталгаажуулах код авах зорилготой аж.

Төрийн болон санхүүгийн байгууллагын нэр ашигласан залилан зөвхөн мессежээр хязгаарлагдахгүй. Банк, цагдаа зэрэг иргэдийн итгэл хүлээсэн байгууллагын нэр барьж утсаар холбогдон “дансанд асуудал гарсан”, “мөнгө яаралтай шилжүүлэх шаардлагатай” гэх мэтээр айлган, хувийн мэдээлэл эсвэл мөнгө авахыг оролддог байна.

Иргэд ийм төрлийн мессеж хүлээн авсан тохиолдолд холбоос дээр дарахаас зайлсхийж, торгууль болон төлбөрийн мэдээллээ тухайн байгууллагын албан ёсны вэбсайт эсвэл аппликейшнаар өөрсдөө нэвтэрч шалгахыг албаныхан анхаарууллаа.

Мөн илгээгчийн дугаар, мессежийн агуулга болон холбоосын хаягийг хамтад нь нягтлах шаардлагатай. Хуурамч вэбсайтын хаяг нь албан ёсны домэйнтэй бараг ижил харагдавч нэг үсэг, тэмдэгтээр ялгаатай байх тохиолдол бий.

Хэрэв санамсаргүйгээр холбоос дээр дарсан бол интернэт банкны нэвтрэх нэр, нууц үг, картын мэдээлэл болон нэг удаагийн баталгаажуулах кодоо оруулахгүй байх хэрэгтэйг холбогдох байгууллагууд сэрэмжлүүлж байна.