Трамп: Ираны эсрэг шинэ ажиллагаа “удаан үргэлжлэхгүй”

АНУ-ын Ерөнхийлөгч Дональд Трамп Ираны эсрэг дахин эрчимжсэн цэргийн ажиллагаа “хэт удаан” үргэлжлэхгүй гэж лхагва гарагт мэдэгдлээ. Түүний тайлбар Тегеран, Вашингтоны хооронд долдугаар сараас хойших хамгийн өргөн хүрээтэй харилцан цохилтын дараа гарч байна. Трамп Цагаан ордонд сэтгүүлчдэд мэдээлэл өгөхдөө Иран радар болон пуужингийн системээ сэргээхээр ажиллаж байсан бөгөөд АНУ-ын сүүлийн цохилтууд эдгээр байгууламжийг онилсон гэж мэдэгджээ. Мөн Ормузын хоолойн орчимд Ираны шинээр байгуулсан довтолгооны болон хамгаалалтын тоног төхөөрөмжүүдийг устгасан хэмээн тайлбарлав. Гэхдээ мөргөлдөөн намжих шинж одоогоор тодорхой бус хэвээр байна. Кувейтийн арми пүрэв гарагт Ираны пуужин болон дроны довтолгооны эсрэг агаарын довтолгооноос хамгаалах хүч ажиллаж байгааг мэдээлжээ. Кувейтэд гарсан гал түймрийг унтраасан бөгөөд хүний амь эрсдээгүй гэж мэдээлсэн байна

Сонгууль ойртох тусам Цагаан ордны тооцоо өөрчлөгдөв “Reuters”-т мэдээлэл өгсөн дөрвөн эх сурвалжийн хэлснээр Трампын өндөр албан тушаалтнууд арваннэгдүгээр сарын 3-ны завсрын сонгуулиас өмнө Ирантай хийж буй дайныг улам өргөжүүлэхгүй байхыг дэмжиж байна. Сонгуулийн дараа цэргийн ажиллагааг эрчимжүүлэх хувилбарыг авч үзэж болох ч ийм шийдвэр хараахан гараагүй аж. Одоогийн байдлаар Трампын засаг захиргаа Иранд эдийн засгийн шахалтаа нэмэгдүүлж, цаашдын хэлэлцээгээр буулт хийлгэхэд түлхүү анхаарч буйг эх сурвалжууд мэдээлжээ. Трамп харин сонгуулийн үр дүн Ираны талаарх шийдвэрт нь нөлөөлөхгүй гэж олон нийтэд мэдэгдсэн. Ираны дайн АНУ-ын сонгогчдын дунд төдийлөн дэмжлэггүй байгаа нь Цагаан ордны хувьд улс төрийн эрсдэлийг нэмэгдүүлж байна. Наймдугаар сарын сүүлчийн “Reuters/Ipsos” санал асуулгаар америкчуудын 31 хувь нь дайныг дэмжсэн бол 63 хувь нь эсэргүүцжээ. Сонгогчдын дунд шатахууны өндөр үнэ мөн гол асуудлын нэг хэвээр байгаа бөгөөд Ирантай хийх мөргөлдөөн өргөжвөл Ормузын хоолойгоор дамжих газрын тосны нийлүүлэлт, улмаар дэлхийн эрчим хүчний зах зээл дахин анхаарлын төвд орох төлөвтэй байна.