АХБ Монгол Улсад $1.49 тэрбумын хөрөнгө оруулалт хийжээ

Азийн хөгжлийн банкны Ерөнхийлөгч Масато Канда 11 жилийн дараа Монгол Улсад айлчилж, Төв Азийн бүс нутгийн эдийн засгийн хамтын ажиллагааны хөтөлбөр буюу КАРЕК-ийн 25 дахь Сайд нарын бага хурал болон “CAREC Business Forum 2026”-д оролцоно.

КАРЕК-ийн 25 жилийн ойд зориулсан Сайд нарын бага хурал есдүгээр сарын 28-наас аравдугаар сарын 2-ны өдрүүдэд нийслэлд болох юм.

2001 онд үйл ажиллагаагаа эхлүүлсэн КАРЕК нь Афганистан, Азербайжан, БНХАУ, Гүрж, Казахстан, Киргизстан, Монгол, Пакистан, Тажикистан, Түркменистан, Узбекистан гэсэн 11 улсыг хөгжлийн түншүүдтэй холбож, тээвэр, худалдаа, эрчим хүч, хөрөнгө оруулалтын хамтын ажиллагааг дэмждэг бүс нутгийн хөтөлбөр юм.

КАРЕК-ийн хүрээнд өнгөрсөн оны эцсийн байдлаар нийт 57.9 тэрбум ам.долларын хөрөнгө оруулалттай 300 бүс нутгийн төсөл хэрэгжсэн байна.

Монгол Улс 2003 онд тус хөтөлбөрт нэгдсэнээс хойш 19 төсөлд нийт 1.49 тэрбум ам.долларын хөрөнгө оруулалт татжээ. Үүнээс 13 төсөл тээврийн салбарт, тав нь худалдаа, нэг нь хөдөө аж ахуйн чиглэлд хэрэгжсэн байна.

Хөрөнгө оруулалтын хэмжээгээр тээврийн салбарт нэг тэрбум орчим ам.доллар, хөдөө аж ахуйд 270 сая, худалдааны салбарт 193.7 сая ам.долларын санхүүжилт ногджээ.

КАРЕК-ийн санхүүжилттэй төслүүдийн хүрээнд Улаанбаатар–Дарханы авто зам, Замын-Үүдийн логистикийн хөгжил, хилийн боомтуудын шинэчлэл болон баруун бүсийн авто замын коридор зэрэг дэд бүтцийн төслүүд хэрэгжсэн байна.

Бүс нутгийн холболт, хөрөнгө оруулалтын дараагийн үеийг хэлэлцэнэ

КАРЕК-ийн 25 дахь Сайд нарын бага хурлаар эдийн засгийн коридор, дижитал холболт, худалдаа, хөрөнгө оруулалт, эрчим хүч болон хөрөнгийн зах зээлийн хамтын ажиллагааны дараагийн чиглэлийг хэлэлцэхээр төлөвлөжээ.

Мөн Улаанбаатарын тунхаглал болон бүс нутгийн хамтын ажиллагаатай холбоотой бусад баримт бичиг батлагдах хүлээлттэй байна.

Үүний зэрэгцээ есдүгээр сарын 30-наас аравдугаар сарын 1-нд “CAREC Business Forum 2026” форумын үеэр ногоон эрчим хүч, ухаалаг тээвэр, логистик болон чухал ашигт малтмалын салбар дахь хөрөнгө оруулалт, бизнесийн боломжийг хэлэлцэх юм.

КАРЕК-ийн хүрээнд хэрэгжиж ирсэн төслүүдийн дийлэнх нь Монголын тээвэр, логистик болон хил дамнасан худалдааны дэд бүтцэд төвлөрсөн тул Улаанбаатарын уулзалтаас гарах дараагийн шийдвэрүүд бүс нутгийн холболт, худалдаа, хөрөнгө оруулалтын шинэ төслүүдэд чиглэх эсэх нь анхаарал татаж байна.