Аялал жуулчлалын арга хэмжээнүүд бизнесүүдэд ₮13 тэрбумын орлого бүрдүүлжээ

Улаанбаатар хотноо энэ онд аялал жуулчлалын 19 арга хэмжээ зохион байгуулж, давхардсан тоогоор 300 мянга гаруй хүн үзэж сонирхсон талаар НЗДТГ-аас мэдээллээ. Улсын хэмжээнд есдүгээр сарын 1-ний байдлаар 737,338 жуулчин ирсэн нь өмнөх оны мөн үеэс 258 мянга гаруй хүнээр буюу 54.1 хувиар өссөн байна. Жилийн эцэс гэхэд 630 мянга орчим жуулчин хүлээн авах тооцоо гарчээ. Нийт жуулчдын 60-аас 70 хувь нь Улаанбаатар хотоор дамжин зорчдог бөгөөд энэ онд шууд нислэгтэй хотуудын тоо нэмэгдсэн нь жуулчдын урсгал өсөхөд нөлөөлсөн гэж холбогдох байгууллага үзэж байна.

Тухайлбал, БНХАУ-ын хувийн агаарын тээврийн “Spring Airlines” компани Улаанбаатар-Шанхай чиглэлд шууд нислэг үйлдэж эхэлсэн бол Казахстаны агаарын тээврийн “SCAT Airlines” компани Астана-Улаанбаатар чиглэлд шууд нислэгтэй болсон байна. Монголын агаарын тээврийн “Хүннү Эйр” компани мөн есдүгээр сарын 28-наас Улаанбаатар-Дели чиглэлд тогтмол нислэг үйлдэхээр төлөвлөжээ.

Нийслэлээс 2026 оныг “Бизнес эрхлэгчдийг дэмжих жил” болгон зарласантай холбоотойгоор аялал жуулчлалын арга хэмжээнүүдэд нийт 815 жижиг, дунд бизнес эрхлэгчийг хамруулсан байна. Эдгээр арга хэмжээний үеэр иргэд, аж ахуйн нэгжүүд 13 тэрбум орчим төгрөгийн орлого олжээ. Аялал жуулчлалын урсгалыг нийслэлийн худалдаа, үйлчилгээний салбартай холбох нь жуулчдын зарцуулалтаас дотоодын бизнесүүдэд үлдэх орлогыг нэмэгдүүлэх нэг суваг болж байна.

НҮБ-ын Аялал жуулчлалын байгууллагын энэ оны эхний улирлын тайланд Монгол Улс Ази, Номхон далайн бүсийн аялал жуулчлалын өсөлтөөр тэргүүлэх орнуудын нэгээр нэрлэгджээ. Тус тайланд Монгол Улс жуулчдын урсгалын өсөлтөөр 39 хувийн үзүүлэлттэй дөрөв, аялал жуулчлалын зарцуулалтын өсөлтөөр 29 хувьтай хоёр, салбарын орлогын өсөлтөөр 27 хувьтай гуравдугаар байрт тус тус эрэмбэлэгдсэн байна.