Банкууд хиймэл оюуны агентын огцом өсч буй зардлыг хязгаарлахыг зорьж байна — McKinsey
McKinsey-гийн дэлхийн банкны жилийн тоймд дурдсанаар хиймэл оюуны агентуудыг ажиллуулах токены зардал банкуудын нийт хөдөлмөрийн зардлын 20 хувьд амархан хүрч болзошгүй байна.
Дэлхийн банкууд хиймэл оюуны агентуудын огцом нэмэгдэж буй зардлыг хазаарлахыг хичээж байна. McKinsey-гийн дэлхийн банкны салбарын жилийн тойм (Global Banking Annual Review)-д дурдсанаар агентуудыг ажиллуулдаг токены зардал банкуудын нийт хөдөлмөрийн зардлын 20 хувьд амархан хүрч болзошгүй гэж Reuters агентлаг 11-р сарын 10-нд мэдээлэв.
"AI FinOps" багууд гарч ирэв
Хиймэл оюуны зардлыг хянах үүрэг зарим банкинд "AI FinOps" гэж нэрлэгдэх шинэ багуудад шилжжээ. Эхэндээ банкууд ажилтнуудын асуултыг нарийн төвөгтэй байдлаас нь хамааруулан өөр өөр загвар руу чиглүүлэх системээр зардлаа хэмнэхийг оролдсон.
"Гэвч агентууд ажиллаж эхлэхэд ийм загварууд үр дүнгүй болдог. Учир нь агентууд хоорондоо харилцаж, токен маш хурдан хуримтлагддаг" гэж McKinsey-гийн ахлах түнш, тайлангийн зохиогчдын нэг Вик Сохони Reuters-т өгсөн ярилцлагадаа хэлжээ.
Иймээс банкууд агентлаг хиймэл оюуныг хаана нэвтрүүлэхээ илүү сонгомол шийдэж, хамгийн өндөр өгөөж хүлээгдэж буй чиглэлд төвлөрч байна. Бүтээмжийн хэмнэлтийг хэмжихэд харьцангуй хялбар ч өндөр зардал хаана үндэслэлтэй вэ гэдгийг тодорхойлохдоо банкууд хиймэл оюунаас үүдэх орлогын өсөлтийг илүү харгалзах болсон гэж Сохони онцолжээ.
Хэрэглэгчид хурдан нэвтрүүлж байна
Тайланд дурдсанаар хэрэглэгчид хиймэл оюуныг өмнөх технологиудаас хамаагүй хурдан хэрэглээндээ нэвтрүүлж байна. Гар утасны интернэт өргөн тархахад 5-10 жил шаардлагатай байсан бол хиймэл оюуны агентууд гурван жилийн дотор түгээмэл хэрэглээ болно гэж McKinsey таамаглажээ.
Дэлхийн 46,000 жижиглэнгийн банкны харилцагчийг хамарсан судалгаагаар ихэнх нь банкны үйлчилгээг харьцуулах, өндөр хүүтэй хадгаламж хайх, зээлээ дахин санхүүжүүлэх, нэгтгэхэд хиймэл оюун ашиглаж байна. Хиймэл оюун хэрэглэгчдийн 72 хувь нь банкны агентад нэг санхүүгийн үйлдэл гүйцэтгэхийг зөвшөөрөхөд бэлэн гэсэн ч бие даан батлах гүйлгээний дүнг 500 доллараар хязгаарлана гэжээ. Meta-гийн Muse агентыг АНУ-д гарснаас хойшхи эхний 22 хоногт 5 сая удаа татсан байна.
Ашигт ажиллагаанд үзүүлэх нөлөө
Хиймэл оюуны агентууд банкуудад орлогоо нэмэгдүүлж, зардлаа бууруулахад туслах боломжтой ч хадгаламжийг хүүгүй данснаас өндөр өгөөжтэй данс руу шилжүүлснээр ашигт дарамт учруулж болзошгүй. Ихэнх банк гадны хиймэл оюуны агентад өөрийн системд гүйлгээ батлах эрх олгодоггүй тул одоогоор энэ нөлөө хязгаарлагдмал байгаа аж.
Эх сурвалж: Investing.com / Reuters, McKinsey Global Banking Annual Review 2026
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
