Берлин аюулгүй байдлын хэрэгцээгээ их хэмжээний зээлээр санхүүжүүлэхээс буцахгүй

Германы Засгийн газар батлан хамгаалах болон аюулгүй байдлын зардлаа эрс нэмэгдүүлэхийн тулд шинээр өр авах шаардлагатай гэж үзэж байна. Тус улсын Сангийн сайд Ларс Клингбайль 2027 оны төсвийн төслийг Холбооны парламент болох Бундестагт танилцуулахдаа аюулгүй байдлын орчин өөрчлөгдсөнөөр илүү өндөр зардал гаргах нь бодлогын сонголтоос илүү зайлшгүй хэрэгцээ болж буйг онцолжээ.

Клингбайль санхүүгийн эх үүсвэргүйгээр батлан хамгаалах зорилтоо хэрэгжүүлэх боломжгүйг тайлбарлахдаа “пуужингүйгээр саран дээр нисэхтэй адил” хэмээн зүйрлэв. Германы Засгийн газар ирэх онд батлан хамгаалах үндсэн зардлыг 109 тэрбум евро болгохоор төлөвлөсөн нь энэ оны 82.2 тэрбум еврогоос 27 орчим тэрбум еврогоор өндөр үзүүлэлт юм.

Украинд үзүүлэх дэмжлэг болон бусад аюулгүй байдлын зардлыг хамруулбал нийт хэмжээ 130.1 тэрбум еврод хүрнэ.

Өсөн нэмэгдэж буй зардлыг санхүүжүүлэхийн тулд Берлин 2027-оос 2030 онд нийт 838.2 тэрбум еврогийн зээл авахаар төсөвлөжээ. Ингэснээр батлан хамгаалах хэрэгцээг нэмэгдүүлэх зорилт Германы төсвийн сахилга бат болон өрийн хязгаарыг тойрсон олон жилийн маргаантай шууд огтлолцож байна.

Аюулгүй байдлын эрсдэл зардлыг нэмэгдүүлэв

Герман улс батлан хамгаалах зардлаа нэмэгдүүлэхийг НАТО-гийн холбоотнуудаас шаардаж буй АНУ-ын Ерөнхийлөгч Дональд Трампын байр суурьтай зэрэгцэн өөрийн аюулгүй байдлын бодлогоо чангатгаж байна. Үүний зэрэгцээ Германы эрх баригчид кибер халдлага, холимог заналхийлэл болон Орос, Иран зэрэг улстай холбоотой эрсдэлийг анхааруулсаар байгаа нь төсвийн хэлэлцүүлгийг зөвхөн санхүүгийн бус, үндэсний аюулгүй байдлын асуудал болгожээ. Засгийн газар өнгөрсөн долоо хоногт Лейпциг/Халле нисэх онгоцны буудалд дроноор халдах оролдлогын ард ОХУ байсан гэж дүгнэснээ мэдээлсэн байна.

Дэд бүтэц, хөрөнгө оруулалтад мөн зардал нэмнэ

Батлан хамгаалахын зэрэгцээ Засгийн газар төрийн хөрөнгө оруулалтыг нэмэгдүүлж, эдийн засгийн өсөлтийг дэмжихээр төлөвлөжээ. 500 тэрбум еврогийн дэд бүтцийн сан болон батлан хамгаалах салбарын зээлжилтийн дүрмийг сулруулсны дүнд ирэх оны нийт хөрөнгө оруулалт 117.5 тэрбум еврод хүрэхээр байна. Харьцуулбал өнгөрсөн онд өмнөх Засгийн газрын үед хөрөнгө оруулалтын хэмжээ 78.9 тэрбум евро байжээ.

Германы эдийн засаг хоёрдугаар улиралд 0.3 хувиар өссөн бөгөөд хэд хэдэн эдийн засгийн институт төрийн өндөр зарцуулалт сэргэлтийг дэмжиж байгааг онцолсон байна. Иймээс батлан хамгаалах болон дэд бүтцийн зарцуулалт нь зөвхөн аюулгүй байдлын бодлогоос гадна дотоодын эрэлт, хөрөнгө оруулалтын идэвхэд нөлөөлөх суваг болж байна.

Гэсэн ч өрийн хэмжээ эрчимтэй өсөх төлөв улс төрийн маргааныг намжаахгүй байна. Саксони-Анхальт мужийн сонгуулиар барууны чиг баримжаатай “Alternative for Germany” буюу “AfD” нам тэргүүлж, Канцлер Фридрих Мерцийн эвслийн дотор төсөв болон эдийн засгийн бодлогын талаар дахин санал зөрөлдөөн үүсчээ.

Клингбайль их хэмжээний өрийг шүүмжилж буй байр суурийг хүлээн зөвшөөрсөн ч өмнөх төсвийн хатуу бодлого дэд бүтцийн хөрөнгө оруулалтыг олон жил хойшлуулсан гэж үзэж буйгаа илэрхийлэв. Түүний хэлснээр, Засгийн газар “ирээдүй болон аюулгүй байдалдаа хөрөнгө оруулж”, цаашид бодлого хэрэгжүүлэх санхүүгийн боломжоо хадгалахыг зорьж байна.

2027 оны төсвийг тойрсон Бундестагийн хэлэлцүүлэг Германы батлан хамгаалах бодлогын чиглэлээс гадна их хэмжээний өр, төрийн хөрөнгө оруулалтад түшиглэсэн эдийн засгийн сэргэлтийн стратеги хэр тогтвортой байхыг тодорхойлох гол сорилтын нэг болж байна.