BTS хамтлаг Nickelodeon Kids’ Choice Awards-аас гурван шагнал хүртлээ
Өмнөд Солонгосын BTS хамтлаг 2026 оны “Nickelodeon Kids’ Choice Awards” ёслолоос шилдэг цомог, шилдэг дуу, шилдэг хөгжмийн хамтлаг гэсэн гурван шагнал хүртжээ.

Өмнөд Солонгосын BTS хамтлаг энэ жилийн “Nickelodeon Kids’ Choice Awards” шагнал гардуулах ёслолоос гурван төрөлд тэргүүлжээ. Тус хамтлагийн “ARIRANG” шилдэг цомгоор, “Swim” шилдэг дуугаар шалгарсан бол BTS тав дахь удаагаа үзэгчдийн хамгийн дуртай хөгжмийн хамтлагийн шагналыг хүртсэн байна.
Харин энэ онд нээлтээ хийсэн “Spider-Man: Brand New Day” шилдэг оны киногоор тодорч, гол дүрийн жүжигчид болох Том Холланд болон Зендаяа нар үзэгчдийн хамгийн дуртай эрэгтэй, эмэгтэй жүжигчний шагналыг хүртжээ.
Үүний зэрэгцээ Жүжигчин Крис Пратт кино, телевиз болон энтертайнментийн салбарт бүтээсэн инээдмийн дүрүүдээрээ “King of Comedy” буюу “Инээдмийн хаан” шагналын эзэн болсон байна. Тэрбээр шагналаа гардан авах үеэрээ дөрвөн хүүхдийнхээ тухай хошигнон, улмаар багш нарыг хайрлаж, хүндэтгэхийн ач холбогдол болон амьдралын бэрхшээлийг даван туулахад хошин шогийн мэдрэмж чухал болохыг онцолжээ.
Лос-Анжелес хотын “Television City”-д болсон ёслолыг дуучин Алекс Уоррен хөтөлсөн бөгөөд Жейми Миллер “Babydoll”, Эш “Stop The Wedding!” дуугаа тайзнаа толилуулсан байна.
“Nickelodeon Kids’ Choice Awards” нь кино, телевиз, хөгжим, видео тоглоомын салбарын шилдгүүдийг үзэгчдийн санал асуулгаар тодруулдаг уламжлалт арга хэмжээ юм. Ялагчдад улбар шар өнгийн агаарын хөлөг хэлбэртэй цом гардуулдаг бөгөөд алдартнуудыг ногоон өнгийн өтгөн шингэнээр шүршдэг үзүүлбэрээрээ онцлогтой.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





