Дэлхийн хамгийн хуурай цөлд бороо орсноор 17,000 ам км талбайд цэцэгс дэлгэрчээ

Дэлхийн хамгийн хуурай бүс нутгуудын нэг болох Чилийн Атакама цөлд энэ оны өвөл орсон их хэмжээний борооны дараа 200 гаруй зүйлийн зэрлэг ургамал цэцэглэжээ. Ягаан, шар, нил ягаан, цагаан өнгийн цэцэгс цөлийн өргөн уудам нутгийг бүрхсэн нь сүүлийн 30 орчим жилийн хамгийн өргөн хүрээтэй цэцэглэлтийн нэг болж байгааг орон нутгийн эрх баригчид болон судлаачид мэдээлэв.

Чилийн Үндэсний ойн корпорац болон Биологийн олон янз байдал, тусгай хамгаалалттай газар нутгийн албаны аравдугаар сарын эхээр гаргасан тооцооллоор цэцэглэлтийн идэвхжил 17,667 ам км буюу Атакама мужийн нийт нутаг дэвсгэрийн 23 орчим хувийг хамрах боломжтой гэж үзжээ.

Их хэмжээний хур тунадас цөлийн ургамлыг сэргээжээ Энэ оны долоо, наймдугаар сард орсон аадар бороо Атакамагийн зарим хэсэгт үер үүсгэж, олон арван айл өрхийн орон сууцыг эвдэж сүйтгэсэн байна. Харин хур тунадас хөрсний гүнд нэвчсэнээр олон жил, зарим тохиолдолд хэдэн арван жил унтаа байдалд хадгалагдсан үр, булцуу соёолох нөхцөл бүрджээ.

EFE агентлагийн мэдээлснээр Вальенар хот орчимд долоодугаар сараас есдүгээр сарын хооронд 183.5 миллиметр хүртэл хур тунадас бүртгэгдсэн байна. Тус бүсэд ердийн жилд дунджаар хоёр миллиметр орчим хур тунадас ордог аж.

Цэцэглэлтийн үеэр Атакамагийн унаган ургамлууд болох añañuca, garra de león, pata de guanaco зэрэг олон төрлийн цэцэг ургажээ. Зарим газарт өмнө нь цэцэглэлт бүртгэгдэж байгаагүй нь хөрсөн дор удаан хугацаанд хадгалагдсан ургамлын үр, булцуу энэ жил соёолсонтой холбоотой байж болзошгүй гэж судлаачид үзэж байна.

Цэцэглэлт арваннэгдүгээр сар хүртэл үргэлжилнэ Чилид “Desierto Florido” буюу “Цэцэглэсэн цөл” хэмээн нэрлэдэг байгалийн энэхүү үзэгдэл нь хангалттай хур тунадас орсон жилүүдэд тохиолддог. Энэ жилийн цэцэглэлтийг 1997 оноос хойших хамгийн эрчимтэй үзэгдлүүдийн нэг гэж мэргэжилтнүүд тодорхойлжээ.

Байгалийн ховор үзэгдлийг үзэхээр олон мянган жуулчин Атакама мужийг зорьж байгаа бөгөөд ихэнх цэцэг арваннэгдүгээр сард гандах төлөвтэй байна. Харин хуурайшилтад илүү тэсвэртэй зарим ургамал ирэх оны нэгдүгээр сар хүртэл цэцэглэх боломжтой аж.