Эх газрын Хятадын чинээлэг гэр бүлүүд Сингапурыг дахин сонирхож эхэллээ

Эх газрын Хятадын чинээлэг гэр бүлүүд хөрөнгөө хамгаалах, бүс нутгийн эрсдэлээс сэргийлэх зорилгоор Сингапурыг дахин сонирхож эхэлжээ. Зөвлөхүүдийн үзэж буйгаар геополитикийн тодорхойгүй байдал нэмэгдэж, Бээжин оффшор хөрөнгийн хяналтаа чангатгаж байгаа нь Сингапурын тогтвортой, зохицуулалт сайтай санхүүгийн орчны эрэлтийг нэмэгдүүлж байна.

Сингапурт 2023 онд илэрсэн 3 тэрбум ам.долларын мөнгө угаалтын хэргийн дараа банкны харилцагчийн шалгалт, оршин суух болон гэр бүлийн оффисын шаардлагууд чангарсан юм. Энэ нөхцөл нь хэсэг хугацаанд шинэ хөрөнгө оруулагчдын сонирхлыг сааруулсан ч сүүлийн саруудад нөхцөл байдал өөрчлөгдөж эхэлснийг зөвлөхүүд онцолжээ.

Тухайлбал, Сингапурын Мөнгөний газар долдугаар сард ганц гэр бүлийн оффист зориулсан татварын урамшууллын зарим нөхцөлийг зөөлрүүлж, өөрчлөлт энэ сарын 1-нээс хэрэгжиж эхэлсэн. Зах зээлийн оролцогчид үүнийг зохицуулалтын бодлогоос ухарсан алхам бус, харин тодорхой шаардлагад илүү уян хатан хандаж эхэлсний илрэл гэж үзэж байна.

Сингапурын Мөнгөний газрын төлөөлөгчийн хэлснээр олон улсын хөрөнгө эзэмшигчид тус улсын зохицуулалтын өндөр стандарт, хууль эрх зүйн тогтвортой орчин, хөрөнгө удирдлага болон мэргэжлийн үйлчилгээний хөгжсөн экосистемийг чухалчилдаг аж.

Хятадын чинээлэг иргэдийн сонирхол үл хөдлөх хөрөнгийн зах зээлд ч ажиглагдаж байна. Үл хөдлөх хөрөнгийн технологи, үйлчилгээний “Juwai IQI” компанийн мэдээллээр Хятадын худалдан авагчдын Сингапур дахь дээд зэрэглэлийн үл хөдлөх хөрөнгийн талаарх лавлагаа оны эхний хагаст өмнөх оны мөн үеэс 35 хувиар өсчээ.

Гэхдээ хөрөнгөө Сингапур руу шилжүүлэх сонирхол зөвхөн орон сууц худалдан авахаар хязгаарлагдахгүй байна. Тухайлбал, чинээлэг гэр бүлүүд хөрөнгө удирдлагын бүтэц, гэр бүлийн оффис байгуулж, урт хугацаанд хөрөнгөө хэрхэн хамгаалах вэ гэдэгт илүү анхаарч буйг зөвлөхүүд хэлжээ.

Хууль зүйн үйлчилгээний “Bayfront Law” компанийн Райан Линий хэлснээр үйлчлүүлэгчдийн хандлага ч өөрчлөгдөж байна. Тэрбээр энэ талаар “Одоо хүмүүс надад Сингапурт ирээд, иргэн болохыг үнэхээр хүсэж байна гэж хэлдэг” хэмээжээ.

Зөвлөхүүдийн үзэж буйгаар Дубай, Токио болон Хонг Конг зэрэг санхүүгийн бусад төвтэй харьцуулахад Сингапур хэл, соёлын хувьд Хятадын хөрөнгө эзэмшигчдэд илүү ойр бөгөөд бүс нутгийн эрсдэлийн үед “аюулгүй боомт” гэсэн байр сууриа бэхжүүлж байна.

Харин Хонг Конгийн Санхүүгийн үйлчилгээ, Сангийн хороо тус хот нийтлэг эрх зүйн тогтолцоо, хөрөнгийн чөлөөт урсгал, валютын хөрвөх чадвар, харьцангуй бага татвар болон олон улсын стандартад нийцсэн зохицуулалтаараа өрсөлдөх чадвараа хадгалж буйг онцолжээ.

Гэсэн хэдий ч хөрөнгө болон гэр бүлийн оффисоо Сингапур руу шилжүүллээ гээп Хятад дахь татвар, хууль эрх зүйн үүргээс "мултарч байна" гэсэн үг биш юм. Ялангуяа иргэншил, татварын статус өөрчлөгдөөгүй тохиолдолд Хятадын хууль, тайлагналын шаардлага үйлчилсэн хэвээр байж болзошгүй тул хөрөнгө шилжүүлэх шийдвэрийг татвар, хууль эрх зүйн нарийн төлөвлөлттэй уялдуулах шаардлагатайг зөвлөхүүд анхааруулж байна.

Ийнхүү Хятадын чинээлэг гэр бүлүүдийн хөрөнгө, гэр бүлийн оффис Сингапур руу чиглэх хандлага эргэн эрчимжиж байгаа нь Азийн санхүүгийн төвүүдийн хооронд чинээлэг хөрөнгө эзэмшигчдийг татах өрсөлдөөнийг улам нэмэгдүүлэх төлөвтэй байна.